«Մեզանում առկա է անհոգիությունը, նյութապաշտությունը, նյութամոլությունը, որը ժամանակավոր է և ցանկացած անցումային երկրում այս ընթացքը պետք է լինի»,- կարծում է գրող, հրապարակախոս Մերուժան Տեր-Գուլանյանն, ով այսօր լրագրողների հետ խոսեց նորանկախ պետությունների թերությունների մասին:
Մ. Տեր-Գուլանյանը միևնույն ժամանակ համոզված է, որ «մենք այդ ընթացքը պիտի ապրենք, խնդիրն այն է, թե ինչպե՞ս անենք, որ դրա միջից վնասով դուրս չգանք»:
Նորանկախ պետության կյանքում գրող-հրապարակախոսը նկատում է նաև «հոգևորի պակասը» ու կրկին` որպես հուսադրող հանգամանք նշում, թե «համոզված եմ` այս փորձության միջով կանցնենք և գենետիկ նկարագիրն իրեն կվերգտնի»:
Մ. Տեր-Գուլանյանի համար անհասկանալի է Եևանի կենտրոնի շինարարությունը, որը «խախտում է բոլոր բարոյական և իրավական նորմերը», նրա համար անհասկանալի է, որ պետական իշխանությունները չեն անհանգստանում, «որոշ շինություններ Երևանի կենտրոնում բարձր են Օպերայի շենքից»: Միևնույն ժամանակ, նա փաստում է, որ մարդիկ «պահանջներ են ներկայացնում պետությանը, քանի որ հույս ունեն, որ դրանք կկատարվեն»:
Դրական կողմեր էլ ունի Հայաստանի երրորդ Հանրապետությունը: Ըստ Մ. Տեր-Գուլանյանի, երիտասարդները Անկախության օրը` սեպտեմբերի 21-ը, իսկապես, տոնում են: Նրա խոսքերով, այս է, որ հիմք է տալիս հաստատ ասելու. «Մենք լուրջ պետականություն դառնալու բոլոր հիմնասյուներն ունենք»:
27.05.2009, 19:37
No comments:
Post a Comment