«Այս ընտրական կամպանիայի վրա կարող են ազդել արտաընտրական գործոններ, որոնցից մեկն ընտրությունների քաղաքականացումն է, մյուսը` գլոբալ ճգնաժամի ազդեցությունը բնակչության վրա, քանի որ տեղական ինքնակառավարման մարմինն այն օղակն է, որին դիմում է մարդ, երբ նեղն է ընկնում», - ներկայացնելով «Սոցիոմետր» սոցիոլոգիական կենտրոնի կատարած հարցումների արդյունքները` հայտարարեց կենտրոնի ղեկավար Ահարոն Ադիբեկյանը:
Ա. Ադիբեկյանը տեղեկացրեց, որ հարցումների մեծ մասը տրամադրվել է գլոբալ ճգնաժամի ազդեցությունների գնահատմանը, որի արդյունքում պարզվել է, որ թե Հանրապետության, և թե ընտանիքների վիճակը նույն բացասական ազդեցությունն են կրել:
«Ընտանիքների մոտ 71 տոկոսը գտնում է, որ թե իրենց ընտանիքի վիճակն է վատացել, թե վատացել է հանրապետության վիճակը: Սրանից հետևում է, որ գլոբալ ճգնաժամը արտացոլվել է ոչ միայն տարբեր ոլորտներում, այլև սոցիալական տարբեր խմբերում և իշխանությունում», - մանրամասնեց սոցիոլոգը:
Եկամուտների նվազումը 71 տոկոսի մոտ, ըստ հարցումների, ավտոմատ կերպով չի բերել մյուս կարիքների բավարարման նվազմանը, հետևաբար «բնակչությունը որոշ ռեսուրս ունի, որով կարողանում է ինքը մեղմացնել ճգնաժամի հարվածները, չնայած այդ ռեսուրսները սահմանափակ են»: Այդ պատճառով էլ, Ա. Ադիբեկյանի կարծիքով, ընտրողների զգալի մասը ընտրություններից լուրջ սպասելիքներ ունի:
Սոցիոլոգը համոզված է, որ բացի ավանդական խնդիրներից` աղբահանում, փողոցների լուսավորություն, ասֆալտապատում, տրանսպորտի աշխատանք և այլն, որոնք կապված են քաղաքային իշխանությունների անմիջական պարտավորությունների հետ, ընտրողներն «ավելին են ակնկալում, ինչը շատ կարևոր է ճգնաժամի պայմաններում»:
«Իմաստ չունի, որ ընտրությանը մասնակցողները տան խոստումներ այն մասին, ինչը պարտավոր են անել, քանի որ կա ուրիշ խնդիր` ճգնաժամի մեղմացումը», - ընդգծեց Ա. Ադիբեկյանն ու կոչ արեց ընտրություններին մասնակցողներին դիմել օտար երկրների փորձին և խոստումներում ընդգրկել այնպիսի խնդիրներ, ինչպիսիք են բնակարանային շինարարությունը, մանկապարտեզների ֆինանսավորումը, ծերերին, բռնադատվածներին օժանդակելը և այլն:
Սոցիոլոգը կարևորեց այն հանգամանքը, որ «խոստումը պետք է լինի իրականացվելի, միևնույն ժամանակ, պետք է հաշվի առնել առկա կարծրատիպերը»: Նա նշեց, որ քչերի մոտ հավատ կընծայի այն, որ, օրինակ, «Օրինաց երկիր» կուսակցությունը խոստանա ասֆալտապատում իրականացնել կամ «Բարգավաճ Հայաստան» կուսակցությունը խոստանա հասարակությանն իրազեկել օրենքներից:
Ըստ Ա. Ադիբեկյանի` «այնքան կարևոր չէ, թե ինչ են խոստանում, որքան պարտադիր է խոստումը կատարելը»:
«Լավ կլինի` 5 տոկոսի մոտ վստահելի լինես, քան 15 տոկոսի մոտ կասկածելի վստահություն ձեռք բերես, որովհետև հետագայում վերջիններիս հիասթափությունն ավելի խոր հարված կհասցնի քո իմիջին, քան այն 5 տոկոսն է, որին դու խոսք ես տվել և կարողացել ես իրականացնել»,- ամփոփելով իր խոսքն, ասաց Ա. Ադիբեկյանը:
06.05.2009, 16:03
No comments:
Post a Comment