«Անվտանգության խորհրդի նիստում քննարկվել է նոր միջուկային էներգաբլոկի կառուցման ընթացքի վերաբերյալ տեղեկատվությունը և ընդունվել է համապատասխան որոշում»,- հայտարարեց ՀՀ Էներգետիկայի և բնական պաշարների նախարար Արմեն Մովսիսյանը` ի պատասխան ԱԺ պատգամավոր Արա Նռանյանի հարցին այն մասին, թե ինչպիսի՞ ընթացք ունի նոր էներգաբլոկի շինարարությունը:
Ա. Մովսիսյանը նշեց, որ Հայաստանը հայտարարել է մրցույթ ոչ թե շինարարությունն իրականացնելու համար, այլ այն ընկերության համար, որը պետք է կառավարի ատոմակայանի ամբողջ շինարարության ընթացքը: Նա հայտնեց, որ մրցույթին մասնակցելու հայտ են ներկայացրել մոտ 13 ընկերություններ: Մրցույթին մասնակցել է 2 ընկերություն, որի արդյունքում հաղթող է ճանաչվել ավստրալիական ընկերության ամերիկյան ծագում ունեցող դուստր ընկերությունը:
«Այս պահին այդ ընկերության հետ բանակցություններ են ընթանում կառավարման գործընթացի պայմանագրային ձևի վերջնական որոշման համար»,- նշեց Ա. Մովսիսյանն ու մանրամասնեց, որ կառավարման գործընթացն իրենից ներկայացնում է վերահսկողություն` նախագծային աշխատանքներից մինչև շինարարական վերահսկողություն, աշխատակիցների ուսուցման կազմակերպում:
Անդրադառնալավ Ա. Նռանյանի հարցի մյուս հատվածին` այն մասին, թե արդյոք կա՞ ցանկություն բաժնետոմսերի մի մասը վաճառել Թուրքիային, Ա. Մովսիսյանը նշեց, որ շինարարության գործընթացին ներդրումներ կատարել ցանկացողների առումով որևէ սահմանափակում չկա:
«Թե ովքեր կմասնակցեն բաժնետոմսերի ձեռքբերմանը, որևէ նշանակություն չի ունենա մեր օրենքների դեպքում, քանի որ ատոմակայանը պետք է շահագործվի հայկական օրենքներով, մեր միջազգային պարտավորություններով ստանձնած օրենքներով»,- ընդգծեց Ա. Մովսիսյանը:
Փարատելով պատգամավորի անհանգստությունը այն մասին, որ քաղաքական որոշումները կարող են խոչընդոտել մասնագիտական աշխատանքների լիակատար կատարմանը` էներգետիկայի և բնական պաշարների նախարարը բացատրեց, որ բաժնետեր հանդիսանալ, չի նշանակում մասնակցել շինարարական գործընթացին:
«Թուրքական որևէ ընկերություն չունի այն չափանիշները, որպեսզի կարողանա ատոմակայան կառուցել»,- հավաստիացրեց Ա. Մովսիսյանն ու հավելեց. «Մենք ունենք պայմանավորվածություն, որ այն աշխատանքները, որոնք ի վիճակի են կատարելու մեր տեղական շինարարները, մերոնք են կատարելու: Ինչի՞ պիտի տանք Թուրքիային կամ որևիցե այլ երկրի»:
20.05.2009, 20:19
No comments:
Post a Comment