«Հասարակության մեջ հայտնի մարդիկ, արվեստագետները, հայկական արտադրողները, հասարակական կազմակերպությունները հունիսի 2-ին` Հաղթանակի զբոսայգում` Հայ օգնության ֆոնդի երեխաների աջակցության կենտրոնի հետ համատեղ, իրականացնելու են «Լավագույնը երեխաներին» բարեգործական ակցիան»,- այս մասին լրագրողների հետ հանդիպման ընթացքում տեղեկացրեց Հայ օգնության ֆոնդի երեխաների աջակցության կենտրոնի գործադիր տնօրեն Միրա Անտոնյանը:
Նշենք, որ միջոցառումը կազմակերպում է Հայ օգնության ֆոնդի երեխաների աջակցության կենտրոնի «Բարեկամների խորհուրդը», որը ստեղծվել է 2006 թ-ի աշնանը` Հայաստանի երկրորդ նախագահի տիկին Բելլա Քոչարյանի նախագահությամբ:
Մ. Անտոնյանը նշեց, որ հունիսի 2-ի միջոցառումը բաղկացած է լինելու երկու մասից: Առաջին մասում` ժամը 16-ից Հաղթանակի զբոսայգում հայկական շոու բիզնեսի ներկայացուցիչները վաճառելու են հայկական արտադրողների ապրանքները` պաղպաղակ, քաղցրավենիք, հրուշակեղեն, հյութեր և այլն, ինչն ուղեկցվելու է կրկեսային և սպորտային համարների ցուցադրությամբ:
«Արտադրողներն իրենց արտադրանքը տրամադրել են անվճար, իսկ սիրված երգիչ-երգչուհիները, դերասանները, հաղորդավարները, շատ հայտնի հասարակական գործիչներ, հագնելով գոգնոցներ, պարզապես որպես վաճառողներ են հանդես գալու: Այդ ամբողջի նպատակն է` որքան հնարավոր է շատ միջոցներ հավաքել` այդ կարևոր գործին ծառայեցնելու համար»,- մանրամասնեց ասուլիսին ներկա, կենտրոնի «Բարեկամների խորհրդի» անդամ, դերասանուհի, հաղորդավարուհի Նազենի Հովհաննիսյանը:
Միջոցառման երկրորդ մասում շոու բիզնեսի ներկայացուցիչների և տարբեր պարային խմբերի մասնակցությամբ կկազմակերպվի տոնական համերգ, որը կավարտվի հրավառությամբ:
Տեղեկացնենք, որ Միջոցառումը կազմակերպվում է արդեն երկրորդ տարին` նվիրված երեխաների պաշտպանության օրվան: Միջոցառման նպատակն է հասարակության ուշադրությունը հրավիրել դժվար վիճակում հայտնված երեխաների խնդիրներին:
Ակցիայից ստացված հասույթը տրամադրվելու է Հայ օգնության ֆոնդի երեխաների աջակցության կենտրոնին` հիշյալ երեխաներին և նրանց ընտանիքներին բազմաբնույթ աջակցություն ցուցաբերելու, մասնագիտացված ծառայություն մատուցելու համար:
29.05.2009, 17:04
No comments:
Post a Comment