«ՀՀ էներգետիկայի և բնական պաշարների» նախարար Արմեն Մովսիսյանը ներկայացրեց ԱԺ այսօրվա նիստի ընթացքում քննարկման դրված «ՀՀ նոր էներգաբլոկի(ների) կառուցման մասին» օրինագիծը երկրորդ ընթերցմամբ և ամբողջությամբ ընդունելու մասին հարցը:
Հիշեցնենք, որ օրինագիծով հիմնականում սահմանվում է. «Նոր միջուկային էներգաբլոկի(ների) կառուցման համար հարթակը պետք է բավարարի նոր ատոմային էլեկտրակայանների հարթակին ներկայացվող պահանջներին և հարթակի ընտրությունը կատարվում է ՀՀ օրենսդրության և գործող քաղաքաշինական նորմատիվատեխնիկական ու «Ատոմային էներգետիկայի միջազգային գործակալության» անվտանգության ստանդարտների պահանջներին համապատասխան»:
«Մինչ երկրորդ ընթերցմամբ ներկայացվելը, օրինագծի վերաբերյալ ստացվել են առաջարկություններ, որոնք հիմնականում ընդունվել են»,- հայտարարեց Ա. Մովսիսյանն ու կոչ արեց պատգամավորներին ընդունել օրենքի նախագիծը:
Նույնօրինակ կոչով հանդես եկավ նաև ԱԺ Տնտեսական հարցերի մշտական հանձնաժողովի նախագահի տեղակալ Վարդան Բոստանջյանը, ով ներկայացնում էր հանձնաժողովի եզրակացությունը:
«Հանձնաժողովը տվել է իր դրական եզրակացությունը, խնդրում եմ կողմ քվեարկեք նախագծին»,- ամփոփելով իր ելույթը` հայտնեց Վ. Փոստանջյանը:
ԱԺ այսօրվա նիստի օրակարգում քննարկման ներկայացվեց նաև «Ֆիրմային անվանումների մասին» ՀՀ օրենքում և մի շարք օրենքներում լրացումներ ու փոփոխություններ կատարելու մասին օրինագծերի փաթեթը երկրորդ ընթերցմամբ և ամբողջությամբ ընդունելու մասին հարցը, որը ներկայացրեց ՀՀ Էկոնոմիկայի նախարար Ներսես Երիցյանը:
«Այս փոփոխությունները պայմանավորված են ոլորտում ֆիրմային անվանումների գրանցման ռեժիմը նույնականացվում է այլ տնտեսվարող սյուբեկտների ֆիրմային անունների գրացման ընթացակարգերին, ինչը հնարավորություն է տալու գրանցման պահին ստուգել ֆիրմային անվանումը մտավոր սեփականության տեսակետից պաշտպանված լինելու հարցը»,- հայտարարեց Ներսես Երիցյանը:
Ն. Երիցյանը նշեց նաև, որ սույն ընթացակարգով հնարավոր է հասնել նաև էլեկտրոնային ճանապարհով ֆիրմային անունների արագ գրանցման ինստիտուտի կայացմանը: Նա նաև նշեց, որ օրինագծերի փաթեթի վերաբերյալ առաջին ընթերցմամբ քննարկելուց հետո դիտողություններ և գրավոր առաջարկություններ չեն եղել:
ԱԺ Ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը, ներկայացնելով հանձնաժողովի դրական եզրակացությունը, ևս փաստեց, որ հանձնաժողովն օրինագծի վերաբերյալ գրավոր առաջարկություններ չի ստացել պատգամավորների կամ Կառավարության կողմից:
Նշենք, որ սույն օրինագծերը քվեարկության կներկայացվեն ԱԺ չորրորդ գումարման հինգերորդ նստաշրջանի հաջորդ քառօրյայի ընթացքում:
21.05.2009, 18:11
No comments:
Post a Comment