«Մենք չենք հասկանում, թե ինչպես կարող է, որ միլիորդավոր դոլարներ եկամուտ ակնկալող կազմակերպությունը, խաթարելով մեր անաղարտ բնությունը, նույնիսկ կադաստրային արժեքին համաձայն մեզ չի վճարում` տալով մի քանի անգամ ցածր գին»,- այսպսին է Լոռու մարզի Թեղուտ գյուղի բնակիչներից Հայ հեղափոխական դաշնակցության ստացած նամակի հիմնական բովանդակությունը, որը Աժ-ում ներկայացրեց պատգամավոր Արտյուշա Շահբազյանը և խնդրի շուրջ պարզաբանումներ խնդրեց:
«Շատերիս համար դա ապրուստի վերջին միջոցն է և, զրկելով դրանից, մեզ դատապարտում են կործանման: Ներկայիս տնտեսական ճգնաժամի պայմաններում մեր վիճակը դառնում է ծայրահեղ ծանր: Շանտաժը, խաբեությունը և կեղծ խոստումները հոգնեցրել են մեզ: Մեր ցանկացած բողոք մնում է անպատասխան` հուսալքության մատնելով բոլորիս»,- ասված է բնակիչների կողմից ուղարկված նամակում:
«Այսօր կան դատական գործընթացներ և կազմակերպությունը, գերադասում է միլիոնավոր դոլարներ ծախսել դատարաններում, բայց մի քանի դրամ չավելացնել վճարման արժեքը: Երևի սա սկզբունքայի հարց է»,- հայտարարեց Ա. Շահբազյանն ու հավաստիացրեց. «Իսկապես տարածքի բնակչության համար սա լուրջ սոցիալական խնդիր է. սա միակ եկամտի աղբյուրն է այդտեղ ապրողներից շատերի համար»:
ՀՀ փոխվարչապետ, ՀՀ տարածքային կառավարման նախարար Արմեն Գևորգյանը` որպես պատասխան նշեց, որ ինքը մանրամասն ծանոթ չէ խնդրին, և պատգամավորին խնդրեց հարցն առանձին քննարկել: Նա խնդրեց իրեն փոխանցել նամակը, խոստացավ ուսումնասիրել հարցը, դիմել պատասխանատուներին, ինչպես նաև` խոստացավ հարցի քննարկման ժամանակ հրավիրել նաև պատգամավոր Ա. Շահբազյանին:
20.05.2009, 19:49
No comments:
Post a Comment