««Միայն թե պատերազմ չլինի» արտահայտությունը գործում է ինչպես Ռուսաստանում, այնպես էլ Հայաստանում: Անշուշտ, այս կատակով ասված նախադասությունը շատ երևույթների վերաբերյալ, ինչպիսին է Լեռնային Ղարաբաղի հակամարտության հարցը, օգտագործելը մեղք է», - այսպես Ռուս դիվանագիտական ընկերակցության փոխնախագահ Վլադիմիր Կազիմիրովը սկսեց լրագրողներին պատմել Լեռնային Ղարաբաղի և Ադրբեջանի հակամարտության գոտում զինադադարի կնքման 15-ամյակի մասին:
Նշենք, որ Վլադիմիր Կազիմիրովը 1992-1996 թթ-ին եղել է Ռուսաստանի միջնորդ առաքելության ղեկավար, Լեռնային Ղարաբաղի խնդրով ՌԴ Նախագահի լիազոր ներկայացուցիչ, ԵԱՀԿ Մինսկի խմբի անդամ և ռուսաստանյան համանախագահ:
Վ. Կազիմիրովի խոսքերի համաձայն, միանգամայն հասկանալի է, որ ԼՂՀ-ի և Ադրբեջանի միջև պատերազմի վերսկսումը ոչ միայն «աղետալի կլինի երկու պետությունների և ողջ տարածաշրջանի համար, այլև այն կլինի մեծ ցնցում և փորձություն` միջազգային հանրության համար»:
«Ոչ մի դեպքում չպետք է թողնել, որ պատերազմական գործողությունները վերսկսվեն», - ընդգծեց ռուս դիվանագետը` «ոչ ազգային, այլ մասնագիտական էգոիզմով»:
Վ. Կազիմիրովը պատերազմական գործողությունների վերսկսման բացառելը բացատրեց ոչ միայն դրա դրական կողմերի և խաղաղության պահպանման առումով, այլև «այն համաձայնագրի իրականացման, որի սկզբունքների վրա Մինսկի խմբի համանախագահները, Հայաստանի, ԼՂՀ-ի և Ադրբեջանի նախագահներն աշխատանք են տանում»:
Միևնույն ժամանակ Վ. Կազիմիրովն առաջարկեց հարցը դիտել այլ տեսանկյունից: Ենթադրենք, ըստ նրա, որ «համաձայնագրի սկզբունքները մշակվել են, այդ սկզբունքների շուրջ փոխադարձ համաձայնություն է ստեղծվել, պատկերացնենք, որ այն նույնիսկ կնքվել է … Բայց կկատարվի՞ արդյոք այն կամ ինչպե՞ս կկատարվի»: Սրանք են այն գլխավոր հարցադրումները, որոնց շուրջ ռուս դիվանագետն առաջարկում է շեշտադրումներ կատարել:
Վ. Կազիմիրովն հիշեցրեց, որ 15 տարի առաջ կնքված զինադադարի մասին համաձայնագիրը մինչ այժմ չի իրականացվում: Դիվանագետի համոզմամբ` այն չի իրականացվում, քանի որ «դրանում կան դրույթներ, որոնք ստորագրողներից ոչ բոլորին են դուր գալիս»:
Ռուս դիվանագետը հիշեցրեց նաև, որ ժամանակին Սերժ Սարգսյանը, լինելով ՀՀ պաշտպանության նախարար, ԱԺ-ում իր կողմից բարձրացրած հարցադրմանը` կնքված համաձայնագրի կատարման վերաբերյալ, պատասխանել է, որ «Հայաստանը պատրաստ է կատարել համաձայնագրի պահանջները, եթե այն կատարվի նաև Ադրբեջանի կողմից»:
«Նույն դիրքորոշումը հայտնեց նաև Ստեփանակերտը, իսկ Ադրբեջանը բերանը ջուր առավ ու լռում է մինչ այժմ», - մանրամասնեց Վ. Կազիմիրովը:
Անդրադառնալով զինադադարի խախտման դեպքերին Վ. Կազիմիրովը նշեց, որ ադրբեջանական մամուլը ժամանակին հեղեղվում էր զինանդադարի խախտման մասին արձանագրությունների հրապարակումներով:
«Մինչդեռ, մի կողմից զինադադարի խախտումները Ադրբեջանին «դուր չէին գալիս, մյուս կողմից Ադրբեջանը փոխարենը ոչինչ չէր առաջարկում, և մինչ օրս ես որևէ առաջարկ չեմ լսել», - հայտնեց Վ. Կազիմիրովը:
Այնուամենայնիվ Վ. Կազիմիրովն ընդգծեց, որ «որպեսզի կատարվի համաձայնագիրը, նախևառաջ պետք է բացառել պատերազմական գործողությունների վերսկսումը»:
15.05.2009, 13:31
No comments:
Post a Comment