«Կառավարությունը ներկայացված խմբագրությամբ նախագիծը նպատակահարմար չի համարում»,- հայտարարեց ՀՀ Կառավարությանն առընթեր Պետական եկամուտների կոմիտեի նախագահի տեղակալ Արմեն Ալավերդյանը ԱԺ-ի այսօրվա նիստում` քննարկման ներկայացված ««Հաստատագրված վճարների մասին» ՀՀ օրենքում լրացումներ և փոփոխություններ կատարելու մասին» ՀՀ օրենքի նախագծի վերաբերյալ հայտնելով Կառավարության դիրքորոշումը:
Տեղեկացնենք, որ ԱԺ մի շարք պատգամավորների կողմից ներկայացված օրենքի փոփոխությունը պայմանավորված է գազալցման (գազալիցքավորման) կայանների շահագործման պարզեցման և ծառայությունների մատուցման հարմարավետության անհրաժեշտությամբ, ինչպես նաև թույլ կտա հաստատագրված վճարի ամսական չափի հաշվարկումը պայմանավորել տնտեսավարողի տնտեսական գործունեությամբ:
Գործող օրենքով ավտոտրանսպորտային միջոցների գազալցման (գազալիցքավորման) գործունեության հաստատագրված վճարի չափի հաշվարկման համար ելակետային տվյալ է համարվում գազալցման կայանում տեղակայված գազալցման խողովակների քանակը: Դա պարտադրում է տնտեսավարողներին գազալցման խողովակների քանակը հասցնել նվազագույնի, ինչը զգալի անհարմարավետություն է ստեղծում սպառողների համար: Օրենքով նաև նախատեսված է ամսվա ընթացքում ստացված և իրացված գազի ծավալի կարուստ` 12.5 տոկոսի չափով:
Ա. Ալավերդյանի խոսքերի համաձայն` Կառավարությունը մտահոգված է, որ գազալցման խողովակների թվի դուրս բերումն օրենքից կարող է հանգեցնել պետական բյուջեի կորուստների: Միևնույն ժամանակ նա նշեց Կառավարության կողմից ներկայացվող այն պայմանները, որոնց կատարումն Կառավարությունն անհրաժեշտ է համարում:
Ծախսված գազի ճիշտ հաշվարկման հարցի լուծումը հաշվիչների տեղադրման միջոցով, հարկային մարմինների համար ծախսված գազի ծավալների հաշվարկման հսկողությունը, ինչպես նաև` պետական բյուջեի հնարավոր կորուստների բացառումը` Ա. Ալավերդյանի կողմից ներկայացված Կառավարության առաջադրած հիմնական պայմաններն են:
Պետական եկամուտների կոմիտեի փոխագահը, ամփոփելով իր ելույթն, ընդգծեց, որ Կառավարությունը պատրաստ է դրական եզրակացություն տալու, եթե օրինագծի հեղինակներն այն առաջին ընթերցմամբ ընդունվելուց հետո, լրամշակեն Կառավարության առաջարկներով:
21.05.2009, 17:57
No comments:
Post a Comment