«Մենք բարձրացրել ենք այն հարցրեը, որոնք կան», - հայտարարեց Հայաստանի Մարդու իրավունքների պաշտպան Արմեն Հարությունյանը և հավաստիացրեց, որ իր` «Մարդու իրավունքների պաշտպանությունը` ՀՀ զինված ուժերում կարգապահական քաղաքականություն իրականացնելիս» արտահերթ զեկույցում բարձրացված խնդիրները «մեղմ» չեն ներկայացվել:
Ըստ Ա. Հարությունյանի, զեկույցում վեր հանված «ցավալի խնդիրները» պարզապես ներկայացված են «քաղաքակիրթ լեզվով, չկա հայհոյանք»:
«Խնդիրը նրանում չէ, որ հարցը սուր է, պետք է այն սուր ձևով բարձրացնել: Խնդիրը նրանում է, որ դրա մասին պետք է քաղաքակիրթ լեզվով խոսվի, այլ ոչ թե հայհոյանքով», - բացատրեց Մարդու իրավունքների պաշտպանը:
Զինված ուժերի վերաբերյալ Մարդու իրավունքների պաշտպանն այս տարվա ընթացքում ստացել է 30 դիմում-բողոք: Սակայն զեկույցի պատրաստումը, Ա. Հարությունյանի խոսքերով, կատարվել է ոչ միայն ստացված բողոքների, այլև իրենց կատարած մոնիտորինգների հիման վրա:
Ա. Հարությունյանը նշեց նաև, որ իրեն անհրաժեշտ տեղեկատվությունն ինքը ստացել է, իսկ գաղտնիները պարզապես չի հրապարակել: Նա փաստեց, որ դա հետևանք է ՀՀ պաշտպանության նախարարության հետ արդյունավետ համագործակցության:
Ա. Հարությունյանը նշեց նաև, որ զեկույցի պատրաստմանը ԵԱՀԿ հայսատանյան գրասենյակից բացի, մասնակցություն են ունեցել նաև ոլորտում գործող հասարակական կազմակերպությունները:
27.05.2009, 13:08
No comments:
Post a Comment