«Տնտեսության կայունացումը կարող է սկսվել 2009 թ.-ի վերջից 2010 թ-ն ընկած ժամանակահատվածում, իսկ աճ 2009 թ-ին չի լինելու, լավագույն դեպքում այն կսկսվի 2010 թ-ից: Ավելի կոնկրետ կանխատեսում, ցավոք սրտի, ես ունակ չեմ անելու» - պատասխանելով լրագրողների հարցերին` հայտարարեց Հայաստանի Կենտրոնական բանկի փոխնախագահ Վաչե Գաբրիելյանը:
Անդրադառնալով այն հանգամանքին, որ «Հայաստանում վարկերը թանկ են, իսկ ՀՆԱ-ի ֆինանսավորումը բանկերի միջոցով կազմում է 17 տոկոս»` Վ. Գաբրիելյանը հայտնեց, որ ԿԲ-ն այդ ուղղությամբ բազմաթիվ քայլեր է նախաձեռնել` կառուցվածքների ստեղծումից ընդհուպ մինչև օրենսդրական նախաձեռնություն: Նա նշեց, որ 17 տոկոսի մակարդակը ձեռք է բերվել 3 տարվա ընթացքում` ավելացնելով նախկինում գործող 7 տոկոսը, ինչը, ըստ ԿԲ փոխնախագահի, ԿԲ միջոցառումների հաշվին է ավելացել:
«Տնտեսական ճգնաժամի պայմաններում չեմ կարծում, որ մենք կարող ենք էականորեն դա ավելացնել, մենք պետք է իրատեսորեն գնանք առաջ», - մանրամասնեց Վ. Գաբրիելյանը և հավելեց. «Տվյալ դեպքում արդիական է տնտեսական ճգնաժամը»:
Խոսելով հիփոթեքային շուկայի զարգացման միտումների մասին` Վ. Գաբրիելյանը փաստեց, որ «ակտիվացման միտումներ առայժմ չկան»:
«Պետք է նշեմ, որ ամեն դեպքում հիփոթեքային վարկեր տրվում են: Սակայն, որպես կանոն, կան որոշակի խնդիրներ գների անկման հետ կապված, ինչն էապես նվազեցրել է դրանց ծավալը», - բացատրեց Վ. Գաբրիելյանը:
Ինչ վերաբերում է ներգրավվող միջոցների և վարկերի միջև գոյություն ունեցող մարժայի բավական մեծ չափին և այդ ուղղությամբ տարվող աշխատանքներին, ապա Վ. Գաբրիելյանը հավաստիացրեց, որ լուծման «հիմնական միջոցներից մեկը է բանկային համակարգում մրցակցության խթանումն և համապատասխան տեղեկատվության հնարավոր տարածումը»:
25.05.2009, 15:33
No comments:
Post a Comment