«Գիրքը խորհրդանշում է անցյալիս կատարած բացթողումներն ու սխալները, որոնք տարիներ հետո տառապնքի աղբյուր են հանդիսացել: Այն ոչ միայն իմ և շրջապատումս գտնվող մարդկանց կյանքի վերարտադրությունն է, այլ հենց կյանքն է»,- Aysor-ի հետ զրույցում հայտնեց Ռ. Կաշխչյանը, ում «Հին մասրենի» բանաստեղծությունների ժողովածուի շնորհանդեսը տեղի ունեցավ այսօր Նարեկացի Արվեստի միությունում:
Գրքում հիմնականում սիրո թեմայով բանաստեղծություններ են: Բանաստեղծուհու խոսքերով, եթե կա սեր, կա նաև ընտանիք, որը հիմքն է հայրենասիրության, ազգասիրության և ամեն ինչի:
«Իմ տարիքին ոչ հարմար, շատ երիտասարդական զգացումներով գրված բանաստեղծություններ են»,- կատակում է բանաստեղծուհին:
Գրքում նկարագրված են «չվայելած սիրո տառապանքը հերոսի, ով սիրել է, փորձել է հասնել իր սիրո օբյեկտին, և եթե մի փոքր պատառիկ էլ վայելել է սերը, ապա դա այնքան կարճ է տևել, որ ինքը մինչև ուշքի է եկել, արդեն ամեն ինչ կորցրել է և ոչինչ չի հասկացել»:
«Ես կուզենայի, որ գրքի ընթերցողն այս սխալների վրա կառուցեր իր ճիշտ ապագան»,- ընդգծեց բանաստեղծուհին և հավելեց. «Եթե ես իմ ջահել տարիներին կարողանայի ուրիշի սխալները տեսնել, հասկանալ, ես դրանով կարող էի ավելի ճիշտ կառուցել իմ ապագան»:
«Հին մասրենին» Կաշխչյանի երկրորդ ժողովածուն է: Առաջին ժողովածուն լույս է տեսել 2002 թ-ին «Կարոտ» վերնագրով:
Ռ. Կաշխչյանը ստեղծագործելիս զբաղվում է այգեգործությամբ: Նշենք, որ բանաստեղծուհին Պոլիտեխնիկական ինստիտուտի շրջանավարտ է և ներկայումս աշխատում է` որպես գյուղատնտես:
«Այս գիրքը ես գրել եմ ոչ թե ինձ համար, այլ ձեզ համար»,- կարևորելով ընթերցողի դերը հեղինակի կյանքում` նշեց Ռ. Կաշխչյանը:
30.05.2009, 22:12
No comments:
Post a Comment