«Իմ բոլոր գործընկերներին, հատկապես «Ժառանգության» պատգամավորներին, ուզում եմ հիշեցնել Աստվածաշնչյան առակը` «Դիմացինի աչքում չոփը տեսնելուց առաջ, քո աչքի գերանը տես»»,- հայտարարեց Հանրապետական կուսակցություն խմբակցության անդամ Գագիկ Մինասյանը` Ս. Նիկոյանի առաջադրման վերաբերյալ իրենց խմբակցության կարծիքը հայտնելու ժամանակ:
Նշենք, որ Գ. Մինասյանին ելույթն այսպես սկսելու համար առիթ հանդիսացավ Լ. Ալավերդյանի ելույթը` Ս. Նիկոյանի թեկանծության վերաբերյալ: Տեղեկացնենք, որ Լ. Ալավերդյանն իր ելույթում նաև անդրադարձավ միջազգային ատյաններում պատգամավորների կողմից Հայաստանը ներկայացնելու խնդրին: Նա, մասնավորապես նշեց, որ Լեռնային Ղարաբաղի հակամարտության հարցը «չի գտնվում այն մակարդակում, որում պետք է գտնվեր, միջազգային պատվիրակություններում աշխատողների պատճառով»:
Գ. Մինասյանն իր ելույթում նշեց, որ «մի խմբակցության (Aysor` նկատի ունի «Ժառանգություն» խմբակցությանը) սկզբունքային անդամներ, որոնց ղեկավարը անցյալ արվա ընթացքում երկիր չմնաց, որ չգնա, միջոցառում չմնաց, որ չմասնակցի` նույնիսկ կանանց օրգաններին վերաբերող, ոչ մի անգամ այդ խնդիրը չդարձրեցին քննարկման առարկա»:
«Այստեղ են ասում, «Սելը չճռաց, սելվորն է ճռում»: Այնպես որ, յուրաքանչյուրն իր չափը պետք է ճանաչի և իմանա` որտեղ ինչ է ասում»,- ընդգծեց Գ. Մինասյանը:
Գ. Մինասյանը, անդրադառնալով Սամվել Նիկոյանին և նրա գործունեությանը, ընդգծեց, որ «վերջին մեկ տարվա ընթացքում կատարած գործունեությունը պատիվ է բերում ոչ միայն Ս. Նիկոյանին և Հանրապետական կուսակցությանը, այլև ողջ խորհրդարանին»:
«Այդ վատագույն իրավիճակում` բազմաթիվ կողմերի ճնշումների իրավիճակում, նա կարողացել է ղեկավարել հանձնաժողովը և աշխատանքները տանել ճշմարտության ուղղությամբ»,- մանրամասնեց Գ. Մինասյանն ու հայտնեց այն համոզմունքը, որ Ս. Նիկոյանը կկրկնապատկի ջանքերը` ԱԺ հեղինակությունը բարձրացնելու համար, և կոչ արեց քվեարկել Ս. Նիկոյանի օգտին:
18.05.2009, 17:19
No comments:
Post a Comment