«Կարծում եմ, որ այս հարկային փաթեթը, համաձայն որի, հարկային տեսչության ներկայացուցիչները պետք է հայտնվեն գործարաններում և հսկեն ամբողջ գործընթացը, միտված է ամբողջ տնտեսությունը վերահսկելու և սեփականության վերաբաշխում իրականացնելու և, ըստ էության, նաև խորացնելու հակամրցակցային իրավիճակը Հայաստանում»,- հայտնեց «Պոլիտէկոնոմիա» հետազոտական կենտրոնի տնօրեն Անդրանիկ Թևանյանը:
Հիշեցնենք, որ այսօր տեղի ունեցավ «Հայաստան. դիմակայելով համընդհանուր աղետին» տնտեսագիտական ֆորումը, որին մասնակցեցին և զեկույցներով հանդես եկան հայաստանյան և արտերկրյա տնտեսագետները:
Ինչ վերաբերում է Կառավարության վարած քաղաքականությանը` տնտեսական ճգնաժամի ազդեցությունները մեղմելու նպատակով, Ա. Թևանյանն այն կարծիքին է, որ «Կառավարությունը նպատակի և միջոցի շփոթում է իրականացնում»:
«Նպատակը դրված է բյուջեի փող հավաքելը, մինչդեռ տնտեսության զարգացումը երկրորդ պլան է մղվել, այն ինչ պետք է հակառակը լիներ` բյուջեն պետք է լիներ զարգացած տնտեսության հետևանք»,- բացատրեց Ա. Թևանյանը:
Ըստ Ա. Թևանյանի, այն պայմաններում, երբ տնտեսական անկումն արդեն հունվար-ապրիլ ամսիների տվյալներով կազմում է 9.7 տոկոս, չի իրականացվում բյուջետային քաղաքականության և տնտեսական քաղաքականության փոփոխություն:
«Դա խոսում է այն մասին, որ Կառավարությունը համառորեն չի ուզում հրաժարվել իր այն քաղաքականությունից, որի հիմքում դրված է ուղղակի բյուջե փող հավաքելը»,- ամփոփեց Ա. Թևանյանը:
25.05.2009, 19:11
No comments:
Post a Comment