«Երբ լսում ես Արամ Խաչատրյանի երաժշտությունը, անկախ քեզանից, ուզում ես պարել: Ես էլ եմ շատ պարել նրա երաժշտության ներքո»,- լրագրողների հետ հանդիպման ընթացքում հայտարարեց հռչակավոր բալետմայստեր Յուրի Գրիգորովիչը, ով ՀՀ Նախագահի տիկին Ռիտա Սարգսյանի և ՌԴ Նախագահի տիկին Սվետլանա Մեդվեդևայի հովանու ներքո, ՀՀ մշակույթի նախարարության նախաձեռնությամբ, Ալ. Սպենդիարյանի անվան օպերայի և բալետի ազգային ակադեմիական թատրոնում` «Արտ Թիմ» պրոդյուսերական ընկերության հետ, այսօր և վաղը ներկայացնում է Արամ Խաչատրյանի «Սպարտակ» բալետը:
Տեղեկացնենք, որ «Սպարտակ» բալետը Հայաստանում բեմադրելու վերաբերյալ ՀՀ մշակույթի նախարարությունը մեկ տարի առաջ պայմանավորվածություն է ձեռք բերել պետական ակադեմիական Մեծ թատրոնի անվանի բալետմայստեր Յուրի Գրիգորովիչի հետ, և անմիջապես մեծ թափով սկսվել են աշխատանքները: «Սպարտակի» բեմադրությունում Ալ. Սպենդիարյանի անվան օպերայի և բալետի ազգային ակադեմիական թատրոնի բալետային խմբի հետ մասնակցում են նաև Հայաստանի «Բարեկամություն» համույթի պարողներն ու Երևանի պարարվեստի պետական ուսումնարանի սաները:
Ինչպես լրագրողներին հայտնեց ՀՀ Մշակույթի նախարար Հասմիկ Պողոսյանը, «Սպարտակի» բեմադրման համար Հայաստանի պետական բյուջեից հատկացվել է 20 միլիոն դրամ, իսկ անհրաժեշտ մնացած գումարը տրամադրել են հովանավորները: Նա նշեց, որ «Սպարտակը» լինելու է Ալ. Սպենդիարյանի անվան օպերայի և բալետի ազգային ակադեմիական թատրոնի հիմնական խաղացանկում:
Նշենք, որ 3 գործողությամբ, 12 պատկերով և 9 մենապարով «Սպարտակի» լիբրետոն Յուրի Գրիգորովիչինն է` ըստ Ռաֆայելլո Ջովանյոլիի համանուն վեպի և պատմական սյուժեների: Օգտագործված են Նիկոլայ Վոլկովի սցենարը, դեկորները և բեմական զգեստները` ըստ Սիմոն Վիրսալաձեի էսքիզների:
Յուրի Գրիգորովիչն ընդգծեց, որ «Սպարտակը» Հայաստանում բեմադրելը իր մեծ ցանկություններից մեկն է եղել, քանի որ Արամ Խաչատրյանը երազել է այն տեսնել Հայաստանում: Նա նշեց, որ այս ներկայացումը հատկապես հետաքրքիր կլինի նայելը, քանի որ «այստեղ համատեղ հանդես են գալու հայ և ռուս պարողները»:
Ասուլիսի ընթացքում Յուրի Գրիգորովիչն անդրադարձավ նաև հայ բալետ պարողներին, որոնց աշխատանքն, ընդհանուր առմամբ, իրեն գոհացնում է: Նա նշեց, որ Հայաստանում շատ դժվար է պարող պահելը, քանի որ «այստեղ շատ դժվար է ապրելը»:
Ընդգծելով այն հանգամանքը, որ «Սպարտակի» այս նոր բեմականացմամբ ստեղծագործական խումբը հասել է բարձր մակարդակի, Յուրի Գրիգորովիչը կարևորեց «այդ մակարդակը պահելը և նորանոր ներկայացումներ բեմադրելը»:
ԱՅՍՕՐ, 19:07
No comments:
Post a Comment