Այսօր Թանգարանների միջազգային օրվա կապակցությամբ ամենամյա «Թանգարանների գիշեր» համաշխարհային միջոցառմանը մասնակցում են Հայաստանի Հանրապետության 23 թանգարաններ, որտեղ, ընդհանուր առմամբ, կանցկացվի 48 ինքնատիպ միջոցառում ու ցուցադրություն: Թանգարանների մուտքն այսօր երեկոյան ժամը 18:00-24:00-ն անվճար է:
Տեղեկացնենք, որ «Թանգարանների գիշեր» նախագիծը սկիզբ է առել 1999 թ-ից Ֆրանսիայի մշակույթի նախարարության առաջարկով: Առաջարկի համաձայն` գարնանային որևէ կիրակի օր ֆրանսիական թանգարաններում հասարակության համար անվճար «բաց դռների» օր էր հայտարարվելու: Արդեն 5-րդ տարին է, ինչ Հայաստանը միացել է աշխարհի շուրջ 40 երկրների հազարավոր թանգարանների միաժամանակյա ակցիային:
Հայաստանի ամեն մի թանգարանն այսօր իր այցելուի համար յուրահատուկ տոն է կազմակերպել: Անմասն չեն մնացել նաև հոբելյարները: Հովհաննես Թումանյանի և Կոմիտաս վարդապետի 140-ամյակնների կապակցությամբ Հայաստանի Ազգային պատկերասրահը կազմակերպել է «Հովհ. Թումանյան և Կոմիտաս» ցուցահանդեսի բացում, ինչպես նաև` երաժշտական երեկո, իսկ Հ. Թումանյանի թանգարանում անցկացվելու է գրական երեկո:
Բացի այդ, թումանյանական հեքիաթների բեմականացումներ են կազմակերպել ինչպես ամենայն հայոց բանաստեղծի անվան թանգարանում ու թանգարանի աստիճանների վրա, այնպես էլ Ե. Չարենցի անվան գրականության և արվեստի թանգարանում: Իսկ երեկոյան ժամը 20:00-ից Թումանյանի անվան թանգարանում տեղի կունենա «Բամբիռ» և «Դորիանս» խմբերի համերգը:
Երվանդ Քոչարի 110-ամյակի կապակցությամբ Երվանդ Քոչարի անվան թանգարանում ներկայացվելու է «Մելանխոլիա» քանդակը և կինոնկար ու տեսաֆիլմ «Սասունցի Դավիթ» մոնումենտալ քանդակի մասին:
Չմոռանանք հիշեցնել, որ Մինաս Ավետիսյանի 80-ամյակին նվիրված միջոցառումների շրջանակում Հայաստանի ազգային պատկերասրահում ներկայացված են Մինաս Ավետիսյանի ստեղծագործությունները, իսկ Երևանի պատմության թանգարանում նրա որդու` նկարիչ Նարեկ Ավետիսյանի «Ետդարձ» ցուցահանդեսը: Մինաս Ավետիսյանին նվիրված ցուցահանդեսից բացի, այսօր Երևանի պատմության թանգարանում Ն. Ավետիսյանի հետ քննարկումներ են կազմակերպվելու:
Հարկ է հիշեցնել նաև, որ «Թանգարանների գիշեր» միջոցառմանը միացել են նաև Հանրապետության մարզերում գործող թանգարանները: Այսպես, օրինակ` Սյունիքի մարզի Ադոնցի անվան Սիսիանի պատմության թանգարանը ներկայացնելու է «Մանուշակագույն հորիզոններ» խորագրով հանդիպումներ: Շիրակի մարզում` Գյումրիում` Մերկուրովի տուն-թանգարանում կներկայացվի «20-րդ դարի նշանավոր մարդիկ» խորագիրը կրող Հովսեփ Քարշի լուսանկարների ցուցահանդեսը, իսկ Երանուհի և Մարիամ Ասլամազյանների պատկերասրահում տեղի կունենա դասական համերգ և «Հետգրություն» խորագիրը կրող ցուցահանդեսի ու ֆիլմի ցուցադրություն:
Նշենք նաև, որ այս տարի միջոցառումներին սատարում է Եվրոպայի խորհուրդը, որը նշում է իր ստեղծման 60-ամյակը, իսկ Եվրոպայի Խորհրդի նախաձեռնությանն առաջին անգամ միանում է ՅՈՒՆԵՍԿՕ-ն:
16.05.2009, 16:51
No comments:
Post a Comment