«Երգիչների, դերասանների մասնակցությունը կենտրոնի աշխատանքներին ոչ թե մասնագիտական է, այլ հավատի արտահայտում, որ մենք մեկ ընտանիք ենք, և յուրաքանչյուր երեխա պետք է մեր հոգածության կենտրոնում լինի»,- լրագրողների հետ հանդիպման ժամանակ հայտարարեց ժողովրդական երգիչ Արսեն Գրիգորյանը, ով Հայ օգնության ֆոնդի երեխաների աջակցության կենտրոնի «Բարեկամների խորհրդի» անդամ է:
Հիշեցնենք, որ Հայ օգնության ֆոնդի երեխաների աջակցության կենտրոնի «Բարեկամների խորհուրդը հունիսի 2-ին` երեխաների պաշտպանության օրվա կապակցությամբ, Հաղթանակի զբոսայգում կազմակերպելու է «Լավագույնը երեխաների համար» բարեգործական ակցիա, որին մասնակցելու են հայկական շոու բիզնեսի ներկայացուցիչները:
«Մեր երեխաները մեր ապագան են և մենք պետք է կարողանանք ստեղծել լավագույնը մեր երեխաների համար»,- ընդգծեց Ա. Գրիգորյանը, ով նշեց, որ իր երեխաները միայն այն երեքը չեն, որ ունի, այլ բոլոր հայ երեխաները:
Ա. Գրիգորյանի խոսքերով, հենց այդ սկզբունքով էլ Հայաստանի բազմաթիվ հայտնի մարդիկ` գործարարներ, արվեստի բնագավառի ներկայացուցիչներ, մասնակցում են Հայ օգնության ֆոնդի երեխաների աջակցության կենտրոնի կողմից իրականացնվող այս կարևոր և նվիրական գործին:
«Մեր խնդիրը ոչ միայն դրամ հայթայթելն է, այլ այդ երեխաների շրջապատում լինելը»,- ընդգծեց ասուլիսին ներկա երգչուհի Նադեժդա Սարգսյանը:
Ն. Սարգսյանի խոսքերով, շատ հայտնի և զբաղված մարդիկ, իրենց ժամանակը տրամադրում են ոչ միայն մեծ միջոցառումներին մասնակցելուն, այլ շաբաթական գոնե մեկ օր լինելու կենտրոնի երեխաների հետ: Նա պատմեց, որ կենտրոնի երեխաներից մեկն, օրինակ, «առանց Նազենիի չի կարողանում մնալ»:
«Իրենց հետ անմիջական շփումներն են, որ այդ երեխաներին հույս ու հավատ են ներշնչում»,- փաստեց դերասանուհի, հաղորդավարուհի Նազենի Հովհաննիսյանը:
Ն. Հովհաննիսյանը նշեց, որ կենտրոնի երեխաներն իրենց հասարակության լիարժեք անդամ զգալու համար, կարիք ունեն այդպիսի` առօրեական շփումների:
«Սական, ցավոք սրտի, մեր հասարակությունում չկա այնպիսի մշակույթ, որ, օրինակ, հայտնի մարդիկ կամ միայնակ կանայք երեխաներ որդեգրեն, ինչին խանգարում է կաղապարային մտածողությունը»,- կարծում է Ն. Հովհաննիսյանը, ում խոսքերով, ինքն անձամբ երեխա կորդեգրեր, եթե չլիներ այդ «կարծրացած» մտածողությունը:
Հայ օգնության ֆոնդի երեխաների աջակցության կենտրոնի գործադիր տնօրեն Միրա Անտոնյանը վկայեց, որ կենտրոնի «Բարեկամների խորհրդի» անդամներն են Հայաստանի բոլոր հայտնի արվեստի գործիչներն ու գործարարները:
29.05.2009, 18:52
No comments:
Post a Comment