«Բոլորիս շատ լավ հայտնի է, որ վերջին շաբաթների ընթացքում Ստամբուլում, Բաքվում, Լեհաստանում Թուրքիայի վարչապետ Ռաջեփ Թայիփ Էրդողանը մի քանի անգամ շատ կոշտ կերպով շեշտեց, որ Հայաստանի հետ հարաբերությունները լինելու են նախապայմաններով: Մի քանի անգամ ինքը, նաև այլ բարձրաստիճան պաշտոնյաններ, նշեցին, թե որոնք են այդ նախապայմանները»,- ԱԺ-ի նիստում` մինչ Կառավարության ներկայացուցիչներից որևէ մեկին հարց ուղելը` հիշեցրեց ԱԺ-ում ՀՅԴ խմբակցության ղեկավար Վահան Հովհաննիսյանը:
Վ. Հովհաննիսյանի խոսքերով, այդ նախապայմաններն են Կարսի պայմանագիրի ստորագրումը, Ցեղասպանության ճանաչման հետապնդումից հրաժարվելը և Ղարաբաղի հիմնահարցը` հայկական շահերը ադրբեջանական շահերին ենթարկելու լուծումով:
«Հայստանը շարունակում է վստահեցնել աշխարհին և մեզ, որ նախպայմաններ չկան և հարցը լուծվելու է առանց նախապայմանների: Մենք այնուամենայնիվ ավելի հակված ենք կարծելու, որ թուրքկանան տեսակետն, ի վերջո, հաղթելու է և այդ նախապայմանները կմնան ուժի մեջ: Մենք պարտավորված ենք լինելու փոխել այս քաղաքականությունը, կամ, պարզապես, ենթարկվել»,- նշեց Վ. Հովհաննիսյանն ու հավելեց. «Քանի որ ես չեմ կարծում, որ մեր ղեկավարությունը և մեր կառավարությունը պատրաստ է զիջել հայկական ազգային շահերը, հարցս հետևյալն է. Ժամանակը չէ՞ արդյոք արագացման ենթարկել դեպի Իրան տանող երկաթուղու կառուցումը` ամեն գնով դա անելու պայմաններում»:
Վարչապետ Տիգրան Սարգսյանը նախ նշեց, որ «իրենք նույնպես ուշադիր հետևում են բոլոր հայտարարություններին, որոնք արվում են հայ-թուրքական հարաբերությունների վերաբերյալ` նաև թուրքիայի բարձրաստիճան անձանց կոմղից»:
«Եվս մեկ անգամ ուզում եմ ձեզ հավաստիացնել, որ ՀՀ դիրքորոշումն այդ բանակցություններում չի կարող փոխվել, ՀՀ նախագհը հստակ հնչեցրել է մեր դիրքորոշումը` ոչ միայն միջազգային հանրությանը, ոչ միայն գլոբալ խաղացողներին, այլև, առաջին հերթին, մեր ժողովրդին, սփյուռքահայությանը տեղյակ պահելով»,- հայտնեց Տ. Սարգսյանն ու ընդգծեց. «Ես ևս մեկ անգամ հավաստիացնում եմ, որ հարաբերությունները Թուրքիայի հետ կարող են կարգավորվել միայն առանց նախապայմանների»:
Վարչապետը հիշեցրեց, որ Հայաստանն ունի հզոր գործիք, այն է` ցանկացած պայմանավորվածություն և պայմանագիր, որը պետք է հիմք դնի դիվանագիտական հարաբերություններին կամ սահմանի բացմանը, պետք է վավերացվի ԱԺ-ի կողմից, ինչը ենթադրում է, որ այդ գործընթացը լինելու է հրապարակային և պաշտպանելու է Հայաստանի սկզբունքային դիրքորոշումը:
«Բնականաբար մեր դիրքորոշումը պետք է լինի պրոակտիվ. մենք երբեք չենք կարող մոռանալ Ցեղասպանության մասին, և այդ առումով, այն ազգային շարժումները, որ գոյություն ունեն, որոնք հետամուտ են լինում Հայ դատի գործին, պետք է ամբողջ թափով շարունակվեն»,- մանրամասնեց Տ. Սարգսյանը:
Ինչ վերաբերում է երկաթգծի կառուցմանը, ապա վարչապետը հիշեցրեց, որ երեկ Կառավարությունում եղել է խորհրդակցություն այդ մասին: Նա նշեց, որ այդ հարցի շուրջ սկզբունքային և քաղաքական որոշումներն արդեն կայացվել են, որոնց մասին Հանրապետության նախագահը հայտարարեց իր` Իրան կատարած այցի ժամանակ:
Տ. Սարգսյանի խոսքերի համաձայն` փոխադարձ որոշումը կա այդ աշխատանքները սկսելու համար և պետք է առավելագույն ջանքեր գործադրվեն, որ կառուցման համար նախատեսված ժամկետները լինեն մինիմալ:
Հարցի առնչությամբ Վահան Հովհաննիսյանը հանդես եկավ մի շարք նկատառումներով: Նա նշեց, որ իր կարծիքով «այլևս նպատակահարմար չէ խոսել սահմանի բացման մասին, այլ մեկ սահմանակետի` միջանցքի մասին, քանի որ հենց ասում ենք սահման, նրանց ախորժակները գնում են դեպի 1921 թ.»:
«Նախագահն ասաց, որ ողջամիտ ժամանակներում պետք է իրականցվի այս ամենը. սա չի կարող տարիներով ձգվել, որովհետև մենք տանուլ ենք տալիս բարոյական և քաղաքական առումով: Ինչքա՞ն է տևելու այս ողջամիտ ժամանակահատվածը, մինչև՞ ֆուտբոլ, թե՞ պետք է Էրդողնը մեկ անգամ էլ Հայաստանում ասի, որ առանց Ղարաբաղը զիջելու մենք ոչնչի չենք հասնի, որ մենք հասկանանք, որ մինչև ֆուտբոլը սպասել պետք չի: Միգուցե արդեն ժամանա՞կն է կասեցնել այս կերպ տարվող բանակցությունները»,- հարցրեց Վ. Հովհաննիսյանը:
Ի պատասխան վարչապետ Տիգրան Սարգսյանը հիշեցրեց, որ ՀՀ նախագահն այդ առումով էլ «բավականին հստակ հայտարարությամբ հանդես եկավ` ասելով, որ այդ ֆուտբոլային խաղը կլինի այն ժամկետը, որի ընթացքում արդեն հստակություններ կմտնեն այս բանակցային գործընթացում»:
«Իհարկե, մենք չենք կարող այդ ժամկետն անվերջ ձգձգել, և այդ ֆուտբոլային խաղը հենց այն պահն է, որ ժամանակի առումով հստակություն է մտցնելու»,- ընդգծեց Տ. Սարգսյանը:
