«Եվրամիության պատվիրակությունը ջանքեր է գործադրել օգնելու Հայաստանին այս ծրագրի իրականացման հարցում: ԵՄ խորհրդատվական խումբն այստեղ է, որպեսզի տարբեր գերատեսչություններին խորհրդատվական աջակցություն ցուցաբերի», - հայտարարեց Հայաստանում Եվրոպական հանձնաժողովի պատվիրակության ղեկավար Ռաուլ դե Լուցենբերգը` ԵՄ Խորհրդատվական խմբի ու Տնտեսական քաղաքականության և իրավական խորհրդատվության հայ-եվրոպական կենտրոնի (AEPLAC) հանձնախմբի համատեղ նիստում:
Հիշեցնենք, որ Ա. Բաղդասարյանի նախագահությամբ այսօր տեղի ունեցավ համատեղ նիստ, որի ընթացքում ուսումնասիրվեցին մինչ այժմ ԵՄ Խորհրդատվական խմբի կողմից կատարված աշխատանքները, քննարկվեց և հաստատվեց 2009 թ-ի հուլիս-դեկտեմբեր ամիսների համար ներկայացված առաջնային աշխատանքների ծրագիրը:
Ռաուլ դե Լուցենբերգը հայտնեց, որ խորհրդատվական խմբի աշխատանքները սկսվել են երեք ամիս առաջ: Նա նշեց, որ Հայաստանի որոշ գերատեսչություններում հաջողվել է լիարժեք իրականացնել նախատեսված ծրագիրը, որոշներում` դեռ անելիքներ կան, և հայտնեց, որ առաջիկա ամիսների համար իրենք ունեն հստակ ծրագիր:
«Այս ծրագիրը շատ կարևոր է ԵՄ-ի և Հայաստանի համար: Մեզ` որպես շվեդական նախագահության տեղական ներկայացուցիչներ, խնդրել են հետևել այս ծրագրի իրականացմանը և ինչ-որ կերպ աջակցել», - խոսելով կատարվելիք աշխատանքների մասին` ընդգծեց Հայաստանում Լիտվայի Հանրապետության դեսպան Գիեդրուս Ապուոկասը:
ՄԱԿ-ի մշտական համակարգող, ՄԱԿ-ի զարգացման ծրագրի մշտական ներկայացուցիչ Կոնսուելո Վիդալը նույնպես կարևորեց ծրագրի իրականացումը, քանի որ «այն միտված է հասնելու ԵՄ հարևանության քաղաքականության նպատակներին»:
«Եվրամիության խորհրդատվական խումբը նոր մոտեցում է, և այն համատեղ աշխատանք է ՀՀ Կառավարության և ԵՄ միջև», - ընդգծեց ԵՄ խորհրդատվական խմբի ղեկավար Ռոլֆ Բոեհնկեն, ով համառոտ ներկայացրեց խմբի կատարած աշխատանքները:
Ռ. Բոեհնկեի խոսքերի համաձայն, խումբը ներկայացրել է հակակոռուպցիոն ծրագրի նախագիծը` կոռուպցիայի կանխարգելման մասին, նախագծել է հանրային բարեփոխումների վերաբերյալ փաստաթուղթ, ներկայացրել է իր առաջարկությունները հանրային ծառայությունների վերաբերյալ, ինչպես նաև առաջարկություններ է արել Մարդու իրավունքների ազգային գործողությունների վերաբերյալ:
«Առևտրի շրջանակներում մենք աջակցում ենք Էկոնոմիկայի նախարարությանը, աշխատում ենք, որպեսզի նրանք ազատ առևտրի համաձայնագրին միանան: Նաև աշխատում ենք արտոնությունների ընդհանուր համակարգի վրա, ֆինանսական ոլորտում առաջարկում ենք պարտքի կառավարման ծրագիր և այլն», - հավելեց Ռ. Բոեհնկեն:
«Որպեսզի այս ծրագիրն իրապես արդյունավետ գործի, համապատասխան գերատեսչությունների ղեկավարաներն իրենք պետք է բավականին ակտիվ ներգրավվեն և իրենք մշտական համագործակցության մեջ լինեն այն փորձագետների հետ, որոնք իրենց մոտ են աշխատում», - հայտնեց Հայաստանում Մարդու իրավունքների պաշտպան Արմեն Հարությունյանը:
03.07.2009, 13:37
No comments:
Post a Comment