«Արվեստը միայն անձնական փորձով է ճանաչվում: Ես չեմ կարող պատմել իմ ֆիլմերի մասին, դուք պետք է գաք, տեսնեք ու հասկանաք», - լրագրողների հետ հանդիպման ժամանակ հայտնեց ամերիկացի կինոռեժիսոր Ռոբ Նիլսոնը:
Տեղեկացնենք, որ Ռոբ Նիլսոնն առաջին անգամ է մասնակցում «Ոսկե ծիրան» կինոփառատոնին: Փառատոնին ներկայացված են ռեժիսորի երկու` «Հյուսիսային լույսեր» և «Կարիք» ֆիլմերը:
Ամերիկացի ռեժիսորը նշեց, որ, անշուշտ, իր ֆիլմերը նկարահանում է հանդիսատեսի` ժողովրդի համար, բայց մինչ այն ժողովրդի համար դառնալը, ռեժիսորը պետք է ապրի, տառապի, ձգտի ինչ-որ բաների, երազի: Ռ. Նիլսոնը համոզված է, որ «յուրաքանչյուր ֆիլմ իր առանձնահատկությունն ունի, իր յուրահատուկ մոտեցումը, և ինքը փորձում է իր կյանքի զգացումներին հետևել, իսկ արվեստում` իր հերոսներին հետևել»:
Տարբեր մարդկանց իր միևնույն ֆիլմի տարբեր ընկալումների մասին ավելի վառ պատկերացում ստեղծելու համար, Ռ. Նիլսոնը իր կյանքից մի դրվագ պատմեց: Նրա խոսքերով, երբ ավարտել է «Հյուսիսային լույսերը» ֆիլմը, առաջին անգամ վերջնական տարբերակը դիտել է իր 10-ամյա աղջկա հետ:
«Ես կարծում էի, թե նա 10 րոպե հետո կթռնի կողքիցս: Բայց մինչև վերջ դիտեց ֆիլմը: Սակայն երբ հարցրեցի` աղջիկս, ինչպիսի ֆիլմ էր, պատասխանեց` ձանձրալի»,- ծիծաղում է ու հավելում. «Նա պահպանել է հավատարմությունը և միշտ էլ մինչև վերջ դիտում է ֆիլմերս, նույնիսկ եթե դրանք ձանձրալի են»:
Ռ. Նիլսոնը համոզված է, կինոդիտողը հավանում է հոլիվուդյան ֆիլմերը, «քանի որ իրեն սովորեցրել են, որ պետք է հավանի, քանի որ նա մանկությունից ի վեր այդ ֆիլմերն է դիտում»:
«Ցանկացած տեսակի գինի խմելուց, նույն արդյունքն ես ստանում, բայց բարձրակարգ գինի խմելու համար որոշակի փորձառություն է անհրաժեշտ: Նույն էլ ֆիլմերի դեպքում է. դժվար ֆիլմեր դիտելու ու հասկանալու համար փորձառություն է անհրաժեշտ»,- բացատրեց ռեժիսորը:
Որպես օրինակ Ռ. Նիլսոնը նշեց երեկ «Ոսկե ծիրան» փառատոնի շրջանակներում ցուցադրվող Յ. Սկոլինովսկու «Չորս գիշեր Աննայի հետ» ֆիլմը: Նա հայտնեց, որ սկսզբում դահլիճը լեփ լեցուն է եղել, ու չնայած հետզհետե մարդիկ հեռացել են, բայց մնացել են նրանք, ովքեր հասկացել են ֆիլմը, ու վերջիններս քիչ չեն եղել:
«Այդ ֆիլմը դիտողներից մեծ մասը կասի, որ այն ձանձրալի էր: Բայց հայտնի չէ, թե ձանձրալին որն է», - ընդգծեց Ռ. Նիլսոնը:
Նշենք նաև, որ «Հյուսիսային լույսեր» ֆիլմը կարող եք դիտել այսօր երեկոյան և հուլիսի 19-ին Մոսկվա կինոթատորնում, իսկ «Կարիք» ֆիլմը հուլիսի 18-ին Մոսկվա կինոթատրոնում և հուլիսի 19-ին Նաիրի կինոթատրոնում:
14.07.2009, 14:16
No comments:
Post a Comment