«Երեկ, երբ «Սպարտակ» բալետի մեկենասներին հանձնում էինք շնորհակալագրեր, իրենք պատրաստակամություն հայտնեցին այլ ծրագրերին ևս օժանդակել: Սա նշանակում է, որ գործընթացը շարունակվում է, և այստեղ պետք է համապատասխան վերաբերմունք, միավորող գաղափար և կոնցեպտուալ ծրագրեր, որոնց նրանք կհավատան»,- լրագրողների հետ հանդիպման ժամանակ` խոսելով մշակութային ծրագրերին օժանդակող բարերաների մասին` հայտնեց ՀՀ մշակույթի նախարար Հասմիկ Պողոսյանը:
Հ. Պողոսյանը նշեց, որ արդեն գրանցվում են դեպքեր, երբ մշակութային ծրագրերի իրագործման համար անհրաժեշտ գումարի երկու երրորդը տրվում է մեկենասների կողմից:
«Մեզ պետք է, որ մշակութային դաշտում շոշափելի դարձնենք բոլոր այն ծրագրերը, որոնք կարող են պոտենցյալ հովանավորների կողմից խրախուսվել»,- ընդգծեց Հ. Պողոսյանը:
Խոսելով «Ոսկե ծիրան» միջազգային կինոփառատոնի շրջանակներում ստեղծված «Մանթաշյան Ասպետ» շքանշանների և Ալ. Մանթաշյանի արձանիկի ստեղծման մասին, որոնք տրվելու են մշակութային միջոցառումների հովանավորներին` Հ. Պողոսյանը հայտնեց, որ «այս մրցանակի առկայությունը կարևոր է, հատկապես, երբ այն կապվում է այնպիսի անվան հետ, որը դասական բարեգործի կերպար է»:
Հ. Պողոսյանը նշեց նաև, որ մեկենասների ներդրումները պատահական չեն, քանի որ «դրանք մնայուն արժեքներին են ծառայում»:
«Այսօր մեզանում շատ կարևոր է, որ մենք հասկանանք, որ մնայուն արժեքներ ենք թողնում` այդ գումարները տրամադրելով, և դասական մեկենասը նա է, ով գումարներ է ներդնում հանուն վաղվա օրվա»,- ամփոփելով իր խոսքը` նշեց Հ. Պողոսյանը:
10.07.2009, 20:31
No comments:
Post a Comment