Thursday, July 9, 2009

Տուն-թանգարանում վերջին աշխատանքներն են տարվում

«Հիմա մենք ունենք մի բարեկեցիկ թանգարան. լուսահոգի վարչապետ Անդրանիկ Մարգարյանի անմիջական մասնակցությամբ տրամադրված 180 միլիոն դրամով նորոգվեց թանգարանի կենտրոնական մասնաշենքը», - տեղեկացրեց Խ. Աբովյանի տուն-թանգարանի տնօրեն Հովհաննես Զատիկյանը:

Հ. Զատիկյանը հայտնեց նաև, որ տուն-թանգարանում վերջին աշխատանքներն են տարվում` 20 միլիոն դրամ արժողությամբ ցուցասրահի ձևավորման համար: Գումարի 10 միլիոնը հատկացվել է պետբյուջեից, մնացած 10 միլիոնը տրամադրել է «ՎիվաՍելլ-ՄՏՍ» ընկերության տնօրեն Ռալֆ Յիրիկյանը:

«Արդեն մեկ շաբաթ է սկսվել է թանգարանի հին շենքի և տոհմատան հիմնանորոգման աշխատանքները, որն իրականացվում է Հայաստանի Սոցիալական ներդրումների տնօրեն Աշոտ Կիրակոսյանի միջամտության շնորհիվ` Համաշխարհային բանկի տրամադրած 35 միլիոն դրամով: Հաջորդ աշխատանքը 200 տեղանոց դահլիճի կահավորումն է, որտեղ կկարողանանք կազմակերպել տարբեր տեսակի միջոցառումներ», - տուն-թանգարանում իրականացվող աշխատանքների մասին հայտնեց Հ. Զատիկյանը:

Թանգարանի տնօրենը նշեց նաև, որ Սպայի տան բակում է գտնվել Հայաստանի առաջին պետական դպրոցը, որի հիմնադիրն է եղել Խ. Աբովյանը: Հ. Զատիկյանն, ով արխիվներից հայթայթել է դպրոցի մանրակերտը` բոլոր գծագրերով, նույնիսկ աշակերտական նստարանների ու դասասենյակների չափերով, ասաց, որ «եթե 5 միլիոն դրամ կարողանան հայթայթել, հուշահամալիրը կկառուցվի թանգարանի բակում»:

«Դա կլինի և աբովյանագիտական կենտրոն, և Խ. Աբովյանի անվան ՀՊՄՀ-ն այնտեղ կբացի մասնաճյուղ` թանգարանային ամբիոնի համար, և այդ բաժնի առաջին կուրսի ուսանողներն իրենց դասերը կանցկացնեն այդտեղ», - բացատրեց Հ. Զատիկյանը և հավելեց, որ կառուցումից հետո իրենք կդիմեն Կառավարությանը, որպեսզի համալիրը կոչվի Անդրանիկ Մարգարյանի անվան գիտամշակութային ուսումնական կենտրոն:

Հ. Զատիկյանը շնորհակալություն հայտնեց նաև ՀՀ մշակույթի նախարարությանը, որ «միշտ օժանդակել է և սատարել է ցանկացած առաջարկի` թանգարանը միջազգային չափանիշներին համապատասխան դարձնելու նպատակով»:

02.07.2009, 14:41

Aysor.am

No comments:

Post a Comment