Հայ մեծանուն մանկավարժ, գրող, լուսավորիչ Խաչատուր Աբովյանի 200-ամյակի հոբելյանական միջոցառումները մեկնարկելու են այս ամսվա կեսերից` Խ. Աբովյանի տուն-թանգարանում նոր ցուցասրահի բացմամբ: Միջոցառումները կամփոփվեն Ալ. Սպենդիարյանի անվան օպերայի և բալետի ազգային ակադեմիական թատրոնի շենքում կայանալիք հանդիսավոր համերգով:
Այս մասին լրագրողների հետ հանդիպման ժամանակ հայտնեց Խ. Աբովյանի տուն-թանգարանի տնօրեն Հովհաննես Զատիկյանը: Նա տեղեկացրեց նաև, որ ՀՀ վարչապետի գլխավորությամբ ստեղծվել է կառավարական հանձնաժողով, որը հստակեցրել է միջոցառումների ծրագիրը:
«Հոբելյանական ծրագրերը բազմաբովանդակ են. դրանք` բացի կառավարական մակարդակով անցկացվելուց, կանցկացվեն նաև տարբեր հաստատությունների նախաձեռնությամբ», - մանրամասնեց Հ. Զատիկյանը:
Հ. Զատիկյանը հայտնեց նաև, որ հոբելյանական միջոցառումներ են կազմակերպվելու Խ. Աբովյանի անվան գրականության ինստիտուտում, Խ. Աբովյանի անվան հայկական պետական մանկավարժական համալսարանում, Երևանի պետական համալսարանում, Չարենցի անվան գրականության արվեստի պետական թանգարանում: Նաև մի շարք հաստատություններում կկազմակերպվեն գիտաժողովներ:
Տուն-թանգարանի տնօրենի խոսքերով, միջոցառումներ կկազմակերպվեն նաև Աբովյան քաղաքում և Արարատի մարզի Աբովյան գյուղում, Արցախում` Շուշիում և Ստեփանակերտում: Հ. Զատիկյանը միջոցառումներին մասնակից է ուզում դարձնել նաև Հայաստանի և Արցախի` Խ. Աբովյանի անունը կրող 10 դպրոցներին:
02.07.2009, 13:41
No comments:
Post a Comment