«Հոյակապ է մեր երիտասարդների ներկայությունը «Ոսկե ծիրանին» այսօր, քան այն էր վեց տարի առաջ, երբ փառատոնը նոր էր ծնվել», - լրագրողների հետ հանդիպման ժամանակ հայտարարեց կանադահայ դերասանուհի Արսինե Խանջյանը:
Ա. Խանջյանը համոզված է, որ հայ երիտասարդությունը հետաքրքրված է կինոարտադրությամբ, և «Ոսկե ծիրան» կինոփառատոնը նրանց տալիս է վստահություն` այստեղ ստեղծագործելու համար: Դերասանուհին նշեց նաև, որ իր համար ուրախալի է փառատոնի տարբեր ծրագրերում տեսնել հայ երիտասարդների մասնակցությունը, ինչը մեծ առաջընթաց է համարում:
Խոսելով փառատոնի մասին` Ա. Խանջյանը լրագրողներին պատմեց, թե ինչպես անցած տարի իրեն զանգահարել է փառատոնի տնօրեն Հարություն Խաչատրյանն ու ասել, որ «Ոսկե ծիրանի» 5-րդ տարեդարձն է, և ինքն անպայման պետք է գա Հայաստան:
«Երբ անդրադարձա այդ 5-ամյակին, մտածեցի` ինչ փոքր տարիք է, բայց այնպիսի տպավորություն ունեի, թե փառատոնն արդեն 10 կամ 15 տարեկան է», - ընդգծեց Ա. Խանջյանը:
Այս հանգամանքը Ա. Խանջյանը բացատրում է, ոչ միայն իր և հայազգի երիտասարդ ու պրոֆեսիոնալ կինոգործիչների տպավորություններից ելնելով, այլ հենվելով այն փաստի վրա, որ փառատոնի մասին խոսում են ողջ աշխարհում` օտար հաստատություններում:
«Մեզ համար սա ոչ միայն մեծ առիթ է, այլև մեծ փաստ, որ համաշխարհային իրողության մեջ ունենք նման փառատոն, որը Հայաստանից դուրս` աշխարհում, ներկայացնում է Հայաստանը և արտահայտում է մեր ժողովրդի կարողությունները», - ամփոփելով իր խոսքը, հայտնեց Ա. Խանջյանը:
16.07.2009, 14:34
No comments:
Post a Comment