«ՀՅԴ-ն վաղուց արտահայտել է այն տեսակետը, որ համաներումը պետք է լիներ ավելի շուտ` անմիջապես մարտի 1-ից հետո և կարծում ենք, որ քայլն արդարացված է` ճիշտ է: Այն թուլության կամ ուժեղության նշան չէ, այլ յուրաքանչյուր քաղաքական ուժ պետք է մտածի, թե համաներումն ինչի՞ն է նպաստում»: Այս տեսակետն արտահայտեց ԱԺ պաշտպանության, ազգային անվտանգության, ներքին գործերի հարցերով մշտական հանձնաժողովի նախագահ Հրայր Կարապետյանը` լրագրողների հետ հանդիպման ժամանակ:
Ըստ Հ. Կարապետյանի, եթե համաներումը «պետք է նպաստի, որպեսզի ներքաղաքական իրավիճակը կայունանա, որ մարդիկ լինեն ազատության մեջ, և միջազգային կառույցների հետ կապված լուծի մեր երկրի խնդիրները, ապա չպետք է ասել, թե դա թուլության կամ ուժեղության նշան է»: Հ. Կարապետյանն անհասկանալի համարեց այն, որ «ՀՀՇ-ական իշխանությունները ժամանակին համաներում չէին անում դաշնակցականներին»:
«Ի՞նչ է սա նշանակում. եթե նրանք գտնում են, որ համաներում չանելն ուժի նշան է, ընդհանրապես չգնայի՞ն այդ քայլին: Մինչդեռ, կարծում եմ, շատ կոպիտ սխալ էր, որ հենց Լևոն Տեր-Պետրոսյանի ղեկավարած իշխանությունը չգնաց նմանատիպ քայլի: Քայլ, որը պետք է ամրապնդեր երկրի ներքաղաքկան իրավիճակի կայունությունը, քայլ, որը ժամանակին պետք է բարձրացներ մեր երկրի միջազգային հեղինակությունը», - կարծիք հայտնեց հանձնաժողովի նախագահը:
Հ. Կարապետյանը համոզված է, որ համաներումը «հանդուրժողականություն բերեց»: Նա նշեց, որ «շատ ու քիչ տրամաբանություն պետք է ունենալ, որպեսզի հասկանալ, որ եթե մարդիկ ազատ են արձակվում, ապա լարվածությունը պետք է թուլանա»:
Բացի այդ, Հ. Կարապետյանը հավելեց, որ նույնիսկ այն, որ համաներման արդյունքում «անմիջապես ազատ չեն արձակվում, բայց այն ազդում է դատական վճռի վրա, նույնպես համաներման հետևանք է»:
Չնայած Հ. Կարապետյանն ընդգծեց, որ «քաղաքական իմատով համաներումն անհրաժեշտ քայլ էր և վաղուց հասունացած», այնուամենայնիվ, նա նշեց, որ «լավ օրից չէ, որ այսպիսի քայլի են գնում»:
«Ճիշտ է, առիթը մարտի 1-2-ի իրադարձություններն էին, բայց չմոռանանք, որ համաներման տակ ընկել են նաև այն մարդիկ, ովքեր կեղծարարությամբ են զբաղվել ընտրությունների ժամանակ: Ի՞նչ է նշանակում, ամեն անգամ ընտրություններին կարելի՞ է զբաղվել ընտրակեղծիքներով և հետո համաներում կլինի և իրենք կազատվե՞ն: Սա սխալ է, և մեր թերությունն է, որ այս մասով մենք չենք բացառել համաներումը», - ասաց Հ. Կարապետյանը:
Այս առումով հանձնաժողովի նախագահը նշեց, որ մինչ ԱԺ հաջորդ ընտրությունները, պատգամավորները պետք է զբաղվեն ընտրական օրենսգրքի օրենքների վերաբերյալ այնպիսի միջոցառումների իրականացման գործով, որոնք պետք է հաջորդ ընտրություններում բացառեն նմանատիպ ընտրակեղծիքները և ավելի խստացնեն պատիժները: Նա հիշեցրեց, որ Ստրասբուրգում ՀՅԴ պատգամավոր Արմեն Ռուստամյանի արած առաջարկությունը հենց դրան է վերաբերել, ինչն էլ ընդունվել է:
04.07.2009, 14:23
No comments:
Post a Comment