«Ծիլ բուսաց» ներդաշնակ զարգացման ստուդիան Նարեկացի արվեստի միությունում կազմակերպել էր ցուցահանդես` նվիրված արվեստի վաստակավոր գործիչ Հենրիկ Իգիթյանի հիշատակին: Ցուցահանդեսում ներկայացված էին ստուդիայի տարբեր սերունդների 3-14 տարեկան սաների այն աշխատանքները, որոնք առանձնացրել ու հավանության է արժանացրել Հենրիկ Իգիթյանը:
Երեխաների աշխատանքները ստեղծվել են հանճարեղ կոմպոզիտորների երաժշտությունների վերարտադրման արդյունքում: Երեխաները պատկերել էին Բախի, Մոցարտի, Վիվալդիի, Հայդենի, Հեգելի, Կաչչինի և այլ հանճարեղ կոմպոզիտորների հայտնի ստեղծագործությունները:
«Ծիլ բուսաց» ներդաշնակ զարգացման ստուդիայի հիմնադիր և ղեկավար, երաժշտագետ և դաշնակահարուհի Արմենուհի Մարտիրոսյանը ցուցահանդեսի բացման խոսքում պատմեց ստուդիայի և Հ. Իգիթյանի մտերիմ կապի մասին: Նա նշեց, որ մեծանուն արվեստաբանին ապշեցնում էին հատկապես 2.5-3 տարեկան երեխաների աշխատանքները:
«Այս երեխաները փոքրիկ հրաշքներ են, և մենք զգում ենք, որ կյանքում կան բաներ, որոնց բացատրությունը մենք չունենք, ու դրանք վերագրում ենք երկնային շնորհին»,- իր խոսքում հայտնեց ՆԱՄ-ի հիմնադիր նախագահ Նարեկ Հարությունյանը:
Ն. Հարությունյանը ստուդիային նվիրեց ՆԱՄ-ի կողմից հրատարակված Ռ. Հախվերդյանի երգերի անիմացիոն ժողովածուն` ընդգծելով. «Կյանքում կա նախախնամություն և, մենք դրան հավատում ենք»:
Շնորհակալություն հայտնելով ստուդիայի հիմնադիր ղեկավար Ա. Մարտիրոսյանին` Ն. Հարությունյանը նշեց, որ նրա կատարած գործը «շատ սուրբ է, և մենք խոնարհվում ենք այս երեխաների առջև, քանի որ մենք նայում ենք նրանց ու սովորում ենք, հպարտանում եմ, որ մենք ունենք այսպիսի երեխաներ»:
Շնորհակալական խոսքեր ասաց նաև Հ. Իգիթյանի կինը` Արմենուհի Հարությունյանը: Նա նշեց, որ «երեխաները մեր ապագան են և եթե մենք հիմա` ներկայում, չմտածենք մեր ապագայի մասին, մենք կկորցնենք նաև անցյալը»:
«Հիմա մենք պետք է երեխաների մասին մտածենք, որպեսզի ունենան հուսալի ու պայծառ ապագա: Երեխաները առնչվում են հրեշտակների հետ, դրա համար էլ մեծերը չեն կարողանում հասկանալ նրանց, նրանք մաքուր հոգիներ են և այդ մաքրությունը բերում է այսպիսի ինքնաարտահայտման»,- ասաց Ա. Հարությունյանը:
Ցուցադրվեց նաև մի ֆիլմ, որը պատմում էր ստուդիայի մասին, որտեղ նկարահանվել ու իր կարծիքն է հայտնել նաև Հ. Իգիթյանը:
03.07.2009, 19:47
No comments:
Post a Comment