«Որոշվել է մրցանակը հանձնել Հանրային հեռուստաընկերությանը, քանի որ, ի տարբերությւոն մասնավոր հեռուստաընկերությունների, այն պարտավոր է բարձրորակ հեռուստաեթեր ապահովել», - ամփոփելով «Տհաճ եթեր» մրցանակաբաշխության արդյունքները` հայտարարեց «Էքսպերտների միավորում» ՀԿ ղեկավար Նարեկ Մալյանը:
Տեղեկացնենք, որ «Էքսպերտների միավորում» ՀԿ-ն փետրվար-մարտ ամիսներին մոնիտորինգ է իրականցրել 110 մանդատավորված էքսպերտների կողմից, ովքեր հայտնի մտավորականներ են և փորձագետներ:
«Տհաճ եթեր» մրցանակը Հանրային հեռուստաընկերությանը հանձնվելու է նաև այն պատճառով, որ հեռուստաընկերությունը չունի ֆինանսական խնդիրներ, քանի որ նրա դոտացիան ավելի խոշոր է, քան մնացած հեռուստաընկերությունները միասին վերցրած», - մանրամասնեց Ն. Մալյանը:
ՀԿ-ի ղեկավարը նշեց նաև, որ քվեարկությունը բաց է եղել, և 110 էքսպերտները գրավոր ներկայացրել են իրենց որոշումը` հարցաթերթիկների լրացմամբ, որտեղ գրառվել են նաև հիմնավորումներն ու կարծիքները:
Մոնիտորինգն իրականացնելու համար, ըստ Ն. Մալյանի, ուսումնասիրվել է միջազգային փորձը:
«Մոնիտորինգի ընթացքում ի հայտ են եկել բազմաթիվ բացթողումներ և թերացումներ, չնայած այն բանի, որ կարգավորող օրենքը ևս թերի է», - ընդգծեց Ն. Մալյանը:
Ն. Մալյանը տեղեկացրեց նաև, որ մոնիտորինգի են ենթարկվել «ԱԼՄ», «ԱՐ», «Արարատ», «Արմենիա», «Արմնյուզ», «Ավետիս», «Դար 21», «Երկիր մեդիա», «Երևան», «TV 5», «Կենտրոն», «Հայրենիք», «Հայ TV», «Հ1», «Հ2», «Շանթ» և «Շողակաթ» հեռուստաընկերությունները: Մոնիտորինգի չի ենթարկվել «Արմենակոբ» հեռուստաընկերությունը, քանի որ այն դադարեցրել է իր գործունեությունը:
29.06.2009, 14:37
No comments:
Post a Comment