Այս տարի «Ոսկե ծիրան» միջազգային կինոփառատոնի «Միջազգային խաղարկային» ֆիլմերի ժյուրին նախագահում է ճապոնացի աշխարհահռչակ ռեժիսոր Կոհեյ Օգուրին: Ռեժիսորը փառատոնին ներկայանում է իր` «Մահվան խայծը» ֆիլմով, որը նկարահանվել է 1990 թ-ին:
Լրագրողների հետ ճեպազրույցի ժամանակ Կ. Օգուրին պատմեց ֆիլմի մասին: Նա հայտնեց, որ ֆիլմի հիմքում ընկած է մի քրիստոնյա հեղինակի համանուն պատվածք:
«Ես ինքս քրիստոնյա չեմ, բայց գիտեմ քրիստոնեական փիլիսոփայության մասին, և հասկանում եմ, թե ինչ է նշանակում քրիստոնյաների համար մեղքը: Ֆիլմի սյուժեն կայանում է նրանում, որ ամուսինների մեջ վեճ է առաջանում, որովհետև ամուսինը դավաճանում է կնոջը»,- նշեց Կ. Օգուրին:
Տեղեկացնենք, որ «Մահվան խայծը» ֆիլմը փոքր ընտանիքի մասին է: Ընտանիքի կինը, ով երկու զավակների մայր է, բացահայտում է, որ իր ողջ ամուսնական կյանքի ընթացքում` 10 տարի շարունակ, ամուսինը դավաճանել է իրեն:
Կնոջ համար ողբերգություն է դառնում ոչ միայն այն հանգամանքը, որ ամուսինն իր աշխատավարձն ու ժամանակը վատնել է ուրիշ կնոջ վրա, այլ այն, որ տարիներ շարունակ խաբել է իրեն ու սիրել է մեկ ուրիշին: Նա չի հավատում, որ ամուսինը կդադարի խաբել իրեն:
Հենց «մեղքն էլ» այս ընտանիքի մեծ ողբերգությունն է: Ի վերջո, ամուսիները հայտնվում են հոգեբուժարանում, քանի որ չեն հաշտվում դավաճանության փաստի հետ:
Ֆիլմը հեռու է մեզ ծանոթ գունեղ ճապոնական կինոյից: Կ. Օգուրին, պատասխանելով Aysor-ի հարցին, թե ինչու՞ է ռեժիսորն արտահայտման ավելի պարզ տարբերակ ընտրել, հայտնեց, որ «20-րդ դարի գունեղ կինոյի փոխարեն նոր կինո կգա»:
Խոսելով ճապոնական կինոյի զարգացումների և առկա խնդիրների մասին` Կ. Օգուրին նշեց, որ, չնայած Ճապոնիայում շատ կինոընկերություններ դադարում են կինո նկաահանել, բայց երիտասարդները, ինչպես աշխարհի մյուս վայրերում, ձևեր գտնում են կինո նկարահանելու համար: Նա փաստեց, որ «ճապոնական կինոն շատ հին պատմություն ունի և մեծ ընկերություններ կան, որ մինչ այսօր գործում են»:
13.07.2009, 18:51
No comments:
Post a Comment