«Փառատոնը գերազանց առիթ է աշխարհի ֆիլմերը Հայաստանում ցուցադրելու և հայկական ֆիլմերը ցուցադրելու աշխարհում», - կարծում է ամերիկահայ պրոդյուսեր Անահիտ Նազարյանը:
Տեղեկացնենք, որ Ա. Նազարյանը «Ոսկե ծիրան» միջազգային կինոփառատոնի շրջանակներում արդեն երրորդ անգամ է Հայաստանում: Այս տարի նա ներկայացնում է Ֆրենսիս Ֆորդ Կոպոլայի «Տետրո» ֆիլմը: ֆիլմի երևանյան պրեմիերան տեղի է ունենալու այսօր` 22:00-ին Մոսկվա կինոթատրոնում:
Ա. Նազարյանը լրագրողների հետ հանդիպման ժամանակ խոստովանեց, որ իր համար շատ հաճելի է գտնվել Հայաստանում և ֆիլմեր ներկայացնել: Նա նաև նշեց, որ չնայած Ֆ. Կոպոլան չի սիրում մասնակցություն ունենալ փառատոններում, բայց իրեն հաջողվում է արդեն երկրորդ անգամ Հայաստան բերել աշխարհահռչակ ռեժիսորի ֆիլմերը:
Նշենք, որ Ֆ. Կոպոլայի «Տետրա» ֆիլմը ցուցադրվել է միայն Կաննի կինոփառատոնում, և երկրորդ անգամ ցուցադրվում է այստեղ` «Ոսկե ծիրանի» շրջանակներում:
Ա. Նազարյանի խոսքերով, Ֆ. Կոպոլան ցանկանում է գալ Հայաստան, բայց ոչ փառատոնի շրջանակներում, քանի որ չի սիրում հավաքույթներ, հանդիպումներ, մամուլի ասուլիսներ և այլն:
Խոսելով «Ոսկե ծիրան» կինոփառատոնի մասին` Ա. Նազարյանը նշեց, որ այն «գերազանց» առիթ է` աշխարհում ցրված հայերին հավաքելու մեկ տեղ և ծանոթանալու նրանց կատարած աշխատանքի հետ:
«Սա ինչ-որ առումով բոլորիս տունն է, և ինձ համար շատ հաճելի է հնարավորություն ունենալ գտնվելու այստեղ, ցույց տալու իմ աշխատանքը և տեսնելու մյուս հայերի նկարահանած ֆիլմերը», - ամփոփելով իր խոսքն, ընդգծեց Անահիտ Նազարյանը:
16.07.2009, 15:22
No comments:
Post a Comment