«Մի քիչ հոգնած ենք, պատրաստ ենք մեկնարկի, վախեցած ենք, որովհետև, ինչպես յուրաքանչյուր տարի, այս տարի էլ մեզ թվում է, թե ոչինչ չենք հասցրել, բայց պարզվում է ամեն ինչ հասցրել ենք»,- հայտարարեց «Ոսկե ծիրան» միջազգային կինոփառատոնի տնօրեն Հարություն Խաչատրյանը` լրագրողների հետ հանդիպման ժամանակ:
Հ. Խաչատրյանը հայտնեց, որ փառատոնի նախապատրաստական աշխատանքներն արդեն ավարտվել են: Պատրաստ է նաև ֆիլմերի ցուցադրության ծրագիրը:
«Կարծում եմ` հետաքրքիր ծրագիր է, հետաքրքիր ֆիլմեր են: Կտեսնեք նաև վատ ֆիլմեր, որոնք չեք հավանի»,- մանրամասնեց Հ. Խաչատրյանը:
Որպես այս տարվա նորություն` Հ. Խաչատրյանը հայտնեց, որ «Ոսկե ծիրանի» շրջանակներում հիմնվում է կինոյի զարգացման հիմնադրամ, ակումբ, ինչպես նաև` ՀՀ մշակույթի նախարարության հետ համատեղ «Մանթաշյան Ասպետ» ոսկե և արծաթյա շքանշաններ: Հիմնադրամը և ակումբը նույնպես կրելու են հայ մեծանուն բարերար Ալ. Մանթաշյանի անունը:
«Այն մարդիկ, ովքեր լրջորեն զբաղված են մշակույթը և կրթությունը հովանավորելով, պետք է ստանան այսպիսի շքանաշաններ»,- ընդգծեց Հ. Խաչատրյանը:
Հ. Խաչատրյանը տեղեկացրեց նաև, որ ակումբի հիմնադիրներն են մշակույթի նախարար Հասմիկ Պողոսյանը, ռեժիսոր Ատոմ Էգոյանը, «Ոսկե ծիրան» կինոփառատոնը: Նա նշեց նաև, որ քանդակագործ Տիգրան Արզումանյանի կողմից պատրաստվել է Ալ. Մանթաշյանի փոքրիկ արձանիկը, որը` որպես խորհրդանշական նվեր տրվելու է մեկենասներից նրան, ով կդառնա ակումբի նորընծա նախագահ:
Թե ու՞մ կշնորհվի արձանկիը, Հ. Խաչատրյանը չհայտնեց. այն պարզ կլինի միայն փառատոնի փակման օրը: Բայց հորդորեց լրագրողներին գուշակություններ անել և «ով ճիշտ գուշակի, նույնպես կստանա մրցանակ»:
Փառատոնի տնօրենը նշեց նաև, որ այս տարի առաջին անգամ «Ոսկե ծիրան» կինոդպրոցը ցուցադրելու է իր ծրագիրը: Հ. Խաչատրյանի խոսքերով, շնորհիվ մշակույթի նախարարության հովանավորության, մի քանի ամիսների ընթացքում կինոդպրոցը տվել է իր առաջին կինոարտադրությունը:
Հ. Խաչատրյանը համոզված է, որ ավելի շատ պետք է խրախուսվեն երիտասարդները, պետք է ստեղծվի հիմնադրամ, որի միջոցներով յուրաքանչյուր տարի 20-30 երիտասարդներ հնարավորություն կունենան ֆիլմեր նկարահանել:
10.07.2009, 20:23
No comments:
Post a Comment