Հայաստանի Վերահսկիչ պալատի նախագահ իշխան Զաքարյանն այսօր լրագրողներին ներկայացրեց պալատի 2007-2008 թթ. ուսումնասիրությունների արդյունքները: Ի. Զաքարյանի տեղեկացմամբ` մասնավորապես մշակույթի ոլորտում հայտնաբերել են մոտ 204 միլիոն դրամի խախտումներ:
Ուսումնասիրությունների արդյունքները ցույց են տվել, որ նախարարությունը Կառավարության պահուստային ֆոնդի հատկացրած գումարների ծախսի մասով թույլ է տվել 61 միլիոն 499 հազար դրամ ֆինանսական խախտում, որը պետք է վերադարձվի բյուջե: Բացի այդ` նախարարության ՊՈԱԿ-ների գործունեության մասով հայտնաբերել է 24 միլիոն դրամի, իսկ հուշարձանների պահպանության գծով՝ 118,5 միլիոն դրամի խախտում, որոնք նույնպես պետք է վերադարձվեն բյուջե:
Այսպիսով` մշակույթի նախարարությանը դեռևս 2006 թվականից «Սայաթ-Նովա» օպերան բեմադրելու համար հատկացրել են 14,9 միլիոն դրամ, սակայն օպերան մինչ օրս բեմադրված չէ, իսկ գումարն էլ չի վերադարձվել բյուջե: Թատերական գործիների միավորում ՀԿ-ին հատկացվել է 11 մլն 780 հազար դրամ: Ի. Զաքարյանի տեղեկացմամբ` ՎՊ-ը խնդիր է դրել 8,6 մլն դրամը վերադարձնել պետական բյուջե այն պատճառով, քանի որ ՀԿ-ի ծախսերի վերաբերյալ ներկայացված փաստաթղթերը ՎՊ-ն արժանահավատ չի համարում ու հիմք չի ընդունում:
Նախարարության կողմից հրատարկվող գրքերից Ի. Զաքարյանն արդյունավետ համարեց միայն երկու գրքի հրատարակություն` Մանկական Հանրագիտարանը և Ավիկ Իսահակյանի «Բարև վարպետ» աշխատությունը: Մնացած մի քանի տասնյակ գրքերը, ըստ ՎՊ նախագահի, տպագրվել են 500-ական օրինակով, սակայն դրանց մեծ մասը գրախանութների արխիվներում է:
Հուշարձանների վերականգման ծրագրի ուսումնասիրության արդյունքում հայտնաբերել է 186 մլն դրամի խախտում, որից 118, 5 մլն դրամը պետք է վերադարձվի պետական բյուջե:
Խախտումներից բացի ՎՊ-ն արձանագրել է մի շարք «բավականին կոպիտ դեպքեր»: Ըստ այդմ` «Գուգարք» ՓԲԸ-ի պայմանագրի համաձայն` 321 միլիոն դրամ է հատկացվել այդ ընկերությանը, որը պետք է զբաղվեր Լոռու մարզում գտնվող 10-րդ դարով թվագրվող Քոբայրավանքի ու Հնեավանքի վերականագնողական աշխատանքներով: Ուսումնասիրությունները ցույց են տվել, որ կա 57 միլիոն դրամի փաստաթղթերով ուղղակի չհիմնավորված ծախս, որից 38 միլիոնը կանխիկ հանվել է «Գուգարք» ՓԲԸ-ի պատասխանատուների կողմից:
ՎՊ նախագահի խոսքերով, բացի այն, որ խախտումներ են իրականացվել, կատարված աշխատանքն էլ անարդյունավետ է: Ի. Զաքարյանը ներկայացրեց Հնեավանքի, Քոբայրավանքի, Վահանավանքի վերականգնողական աշխատանքների արդյունքները, ըստ որոնց, «վերականգնումը տեղի է ունեցել չորս-հինգ գույնի ու տեսակի քարերով»: Այսպիսի դեպքեր ՎՊ-ն արձանագրել է վերականգման ծարգրով նախատեսված 44 մշակութային հուշարձանից 6-ում, սակայն համոզված է, որ «մյուսներում էլ նույն վիճակը կտիրի»:
ՎՊ նախագահն ասաց, որ հայտնաբերված չարաշահումների մասին զրուցել է մշակույթի նախարար Հասմիկ Պողոսյանի հետ, սակայն իրենց դիրքորոշումը մնում է անփոփոխ` գումարները պետք է վերադարձվեն բյուջե:
30.06.2009, 20:34
No comments:
Post a Comment