Հայաստանի ազգային պատկերասրահն այս ամիս նշում է Ազգային պատկերասրահի ֆիլմերրի ցուցադրության ծրագրի ստեղծման 5-ամյակը: Բացի այս, ԱՊ ֆիլմերի ցուցադրության ծրագիրը հուլիս ամիսը նվիրում է ամերիկյան «Janus Films»-ի 50-ամյակին: Այս մասին Aysor-ին տեղեկացրեց Ազգային պատկերասրահի ֆիլմերի ցուցադրության ծրագրի հիմնադիր ղեկավար Մելիք Կարապետյանը:
«Ծրագրի 5-ամյակը կնշվի հուլիսի 5-ին` «Ակումբ» ակումբում: Ամերիկյան «Janus Films»-ի 50-ամյակի կապակցությամբ հուլիս ամսին կցուցադրվի «Art house» ֆիլմերի 50 տարիների արտադրանքի հավաքածու»,- հայտնեց Մ. Կարապետյանը:
Տեղեկացնենք, որ 2004 թ-ի հուլիսի առաջին օրերին էր, որ ֆիլմերի ցուցադրության ծրագիրն իրականացվեց Ազգային պատկերասրահում: Այդ ժամանակ ցուցադրվեցին հայկական համր ֆիլմեր` «Ոսկե ծիրան» միջազգային 1-ին կինոփառատոնի շրջանակներում: Հենց դրանով էլ տրվեց ֆիլմերի ցուցադրության մեկնարկը, որը 5 տարիներ շարունակ յուրաքանչյուր ամիս կինոսիրողին է ներկայանում նոր ու հետաքրքիր ծրագրով:
Մ. Կարապետյանի տեղեկացմամբ` ամռան ամիսներին ֆիլմերը նախկին չորեքշաբթի, շաբաթ և կիրակի օրերի փոխարեն Ազգային պատկերասրահում կցուցադրվեն միայն շաբաթ և կիրակի օրերին: Սակայն ծրագրում նորություն կա` երեքշաբթի օրերին` երեկոյան ժամին, ֆիլմերը կցուցադրվեն «Ակումբ»-ում:
Մ. Կարապետյանը, խոսելով հանդիսատեսի հաճախելիության մասին, նշեց, որ «ընդհանուր առմամբ հանդիսատեսը պասիվ է, բայց, օրինակ, վերջին` «Արգենտինական տանգո» ծրագիրը բավական հաջող անցավ»:
«Պասիվ լինելու պատճառներից մեկը ֆիլմերի ցուցադրության ցերեկային ժամերն են: Մյուս պատճառը լեզուն է, քանի որ ծրագիրի համաձայն` ֆիլմերը ցուցադրվում են բնօրինակ լեզվով», - հայտնեց Մ. Կարապետյանը:
Ծրագրի ղեկավարի խոսքերով, որոշակի դեր է կատարում նաև հաստատուն ֆինանսավորում չունենալը: Նա նշեց, որ նույնիսկ ցուցադրվող ֆիլմերի ծրագիրը տպագրելու համար դժվարությամբ են ձեռք բերվում միջոցներ, որոնք էլ, հաճախ, տրամադրում են տվյալ ծրագրում կազմակերպչական մաս ունեցող կազմակերպությունները:
«Օրինակ «Արգենտինական տանգո» ծրագիրն իրականացվել է Արգենտինայի դեսպանության հետ, և ծրագիրը տպագրելու, ինչպես նաև ֆիլմերը ձեռքբերելու ֆինասավորումը կատարել է հենց դեսպանատունը», - մանրամասնեց Մ. Կարապետյանը:
Հաստատուն բյուջե չունենալը, ըստ ղեկավարի, պատճառ դարձավ, որ ֆիլմերի ցուցադրության ծրագիրը տպագրվի եռամսյակը մեկ, այն էլ միայն անգլերեն լեզվով, քանի որ թարգմանության հետ կապված խնդիրները ևս ֆինանսավորում էին պահանջում:
Նշենք, որ ֆինանասավորման բացակայությունը խոչընդոտ է հանդիսանում նաև ֆիլմերի ձեռքբերման համար: Մ. Կարապետյանը հայտնեց, որ «նախկինում ինքը ֆիլմերը գնում էր իր սեփական միջոցներից, իսկ այժմ դրանք տրամադրում են ծրագրին մասնակցող կազմակերպությունները, երբեմն էլ ընկերներն ու մտերիմները»:
Չնայած ամենին` Մ. Կարապետյանն ընդգծեց, որ Ազգային պատկերասրահի ֆիլմերի ցուցադրության ծրագիրն ունի մի շատ կարևոր առանձնահատկություն. ծրագրում ֆիլմերը ցուցադրվում են ընդամենը մեկ անգամ:
30.06.2009, 11:19
No comments:
Post a Comment