Իր գործունեության ընթացքում «Ոսկե ծիրան» միջազգային կինոփառատոնը հաստատուն համագործակցում է Հայաստանում մի շարք երկրների դեսպանատների և միջազգային այլ առաքելությունների հետ: Այս մասին լրագրողների հետ հանդիպման ժամանակ հայտնեց «Ոսկե ծիրան» կինոփառատոնի գեղարվեստական հարցերով տնօրեն Սուսաննա Հարությունյանը:
Ս. Հարությունյանի խոսքերի համաձայն, «Ոսկե ծիրան» կինոփառատոնը համագործակցում է Հայաստանում Գերմանիայի, Ֆրանսիայի, Նիդերլանդների, Լեհաստանի և ԱՄՆ-ի դեսպանատների հետ: Հենց դեսպանատների հետ համատեղ աշխատանքի շնորհիվ է, որ կայացել են փառատոնի շրջանակներում Հայաստան հրավիրվող բազմաթիվ հյուրերի այցելությունները, ինչպես նաև տվյալ երկրի մշակույթին պատկանող ֆիլմերի ցուցադրությունները:
Ասուլիսին ներկա Հայաստանում Ֆրանսիայի դեսպանատան ներկայացուցիչ Ժան-Պոլ Մարտենը նշեց, որ «Ֆրանսիայի արտաքին գործերի նախարարությունը և Հայաստանում Ֆրանսիայի դեսպանատունը հետաքրքրված են «Ոսկե ծիրան» կինոփառատոնով, հատկապես, որ կինոփառատոնը հատուկ ուշադրության է հատկացնում ֆրանսիական կինոյին»:
Ամերիկյան դեսպանատան աշխատակից Թոմաս Միթնախտը հայտնեց, որ արդեն 3 տարի է, ինչ համագործակցում են «Ոսկե ծիրան» կինոփառատոնի հետ:
«Այս տարի 6 ռեժիսորներ և պրոդյուսերներ կլինեն Հայաստանում, ովքեր ֆիլմեր ներկայացնելուց բացի նաև վարպետության դասեր կանցկացնեն»,- տեղեկացրեց Թոմաս Միթնախտը:
Ս. Հարությունյանը տեղեկացրեց նաև, որ այս տարի փառատոնի շրջանակում «կազմակերպվելու են հատուկ օրեր` նվիրված Եվրոպայի տարբեր երկրների կինոարտադրությանը»:
«Օրինակ, հուլիսի 14-ը կլինի ֆրանսիական օր, 16-ը` լեհական, 17-ը` գերմանական: Բացի այդ կկայանա լեհ դասական կինոյի ներկայացուցիչ Յեժի Սկոլիմովսկու ֆիլմերի հետհայաց ցուցադրությունը», - մանրամասնեց Ս. Հարությունյանը:
Տեղեկացնենք, որ այս տարի առաջին անգամ փառատոնը համագործակցում է Ճապոնական ֆոնդի հետ, ինչի արդյունքում կկայանա աշխարհահռչակ ճապոնացի ռեժիսոր Կոհեյ Օգուրիի ֆիլմերի հետհայաց ցուցադրությունը: Կշարունակվի նաև «Արաբական գիշերներ» ծրագիրը, որը յուրաքանչյուր երեկո կներկայացնի Եգիպտոսի, Պաղեստինի, Լիբանանի, Սիրիայի ռեժիսորների ֆիլմերը: Նշենք, որ ահդ ծրագիրն իրականացվում է Հայաստանում Եգիպտոսի և Լիբանանի դեսպանատների աջակցությամբ:
30.06.2009, 14:38
No comments:
Post a Comment