Վերջերս «Ոսկե ծիրան» միջազգային կինոփառատոնի մամուլի խոսնակը փառատոնը լուսաբանող լրագորղներին տեղեկացրեց, որ փառատոնի շրջանակներում կազմակերպվում է հայկական մերժված մի քանի ֆիլմերի ցուցադրություն` «հաշվի առնելով «Ոսկե Ծիրան» փառատոնի հասցեին արված մի քանի հայտարարությունները, որոնք առնչվում են փառատոնի կողմից մերժված հայկական ֆիլմերին»:
Նշենք, որ ցուցադրվելու էին Արմեն Ռոնովի «Աննա և Կարենին» ֆիլմը, Ս. Մելոյանի «Տեղ» ֆիլմը և Գ. Ստեփանյանի «Անձրևից հետո, անձրևից առաջ» ֆիլմը: Փառատոնի կազմակերպիչները նախատեսել էին անցկացնել քննարկում, որին, ըստ էության, մասնակցելու էին նաև ֆիլմերի ռեժիսորները:
Սույն հայտարարությունը ստանալուց մեկ օր հետո` հուլիսի 4-ին, Aysor-ը ստացավ մեկ այլ նամակ, որով տեղեկացվում էր, որ ֆիլմերի ցուցադրությունը «ինչ-ինչ պատճառներով չի կայանա: Հույս ունենք` նմանատիպ ցուցադրություն կկայանա ոչ ուշ ապագայում»:
Այս առիթով Aysor-ը զրուցեց «Ոսկե ծիրան» միջազգային կինոփառատոնի գեղարվեստական հարցերով տնօրեն Սուսաննա Հարությունյանի հետ: Ս. Հարությունյանը տեղեկացրեց, որ «ֆիլմերը ցուցադրելու գաղափարը պահի տակ հղացավ, պարզապես փառատոնի նախապատրաստական աշխատանքների հետ կապված գաղափարն օդում մնաց»:
«Հետո երևի ավելի ճիշտ ձևաչափ կգտնենք և ռեժիսորների ցանկությամբ ֆիլմերը կցուցադրենք»,- մանրամասնեց Ս. Հարությունյանը:
Հիշեցնենք, որ Aysor-ն անդրադարձել է «Ոսկե ծիրան» փառատոնի կողմից մերժված ֆիլմերից մեկին` Արմեն Ռոնովի (Մկրտչյանի) «Աննա և Կարենին» ֆիլմին: Այս ֆիլը Սանկտ-Պետերբուրգի «Ուղերձ մարդուն» միջազգային կինոփառատոնում արժանացել է երկու մրցանակների` հատուկ մրցանակ «Կինոյում նոր խոսք ասելու համար» և մրցանակ` «Նոր կինո» անվանակարգում:
Այն հարցին, թե «Ոսկե ծիրանի» կողմից ինչու՞ է մերժվել Ա. Ռոնովի ֆիլմը, Ս. Հարությունյանն ի պատասխան ասաց. «Մերժվել չի կարելի ասել, պարզապես չի ընդգրկվել մրցութային ծրագրերում»:
«Խնդիրը նրանում է, որ մեր բուն նպատակն է լավագույնը հայկական ֆիլմերից ներկայացնել, և ես հավաստիացնում եմ, որ ոչ իսկապես լավ ֆիլմ չի վրիպում մեր աչքից»,- հայտնեց Ս. Հարությունյանն ու մանրամասնեց. «Մենք փորձում ենք բոլոր ֆիլմերի համար գտնել իր ճիշտ տեղը, և պարզ է, որ մենք տարաձայնություներ ենք ունենում ռեժիսորների հետ, որովհետև բոլորի համար իր ֆիլմը լավագույնն է: Բայց մենք մեր կոնցեպցիան ունենք, մեր ծրագրերն ունենք, նաև` սահմանափակ հնարավորություններ: Մենք չենք կարող մրցութային ծրագրի մեջ ընդգրկել 40-50 ֆիլմ»:
Հենց Ա. Ռոնովի ֆիլմի մերժման հետ կապված Ս. Հարությունյանը չցանկացավ որևէ որոշակի բան ասել, քանի որ, ըստ նրա «այդ խնդիրը մի փոքր էլ ուրճացված է», բացի այդ` ինքն անձամբ չի դիտել ֆիլմը:
««Հայկական պանորամա» ծրագրի համար մենք ունենք ընտրական հանձնաժողով. ես անձամբ չեմ կարող բոլոր ֆիլմերը նայել: Այդ պատճառով իմ կարծիքը` որպես կինոքննադատ, չեմ կարող ասել, բայց ես հավատում եմ մեր հանձնաժողովի անդամներին»,- բացատրեց Ս. Հարությունյանը:
Այնուամենայնիվ, Ս. Հարությունյանը հայտնեց, որ «որքան ես գիտեմ, ֆիլմը էքսպերիմենտալ բնույթ է կրում և հենց էքսպերիմենտալի առումով էլ հաղթանակ է տարել այլ փառատոններում»:
«Գուցե այն մեր այս տարվա մրցութային ֆիլմերի մեջ, պարզապես, տեղ չի գտել, որովհետև ֆիլմերն էլ նաև պետք է իրար համապատասխան լինեն. մյուս ֆիլմերի կողքին այն չէր նայվի»,- հայտնեց Ս. Հարությունյանը:
Ռեժիսոր Արմեն Ռոնովն Aysor-ին հայտնեց, որ ինքը նախապես տեղյակ չի եղել իր ֆիլմի ցուցադրության և քննարկման մասին:
«Ինձ զանգահարեց փառատոնի մամուլի քարտուղարը և հրավիրեց մասնակցելու իմ ֆիլմի դիտմանն ու քննարկմանը: Դա լկտիություն է` ինձ կանչել իմ ֆիլմի դիտմանը, երբ որ ես տեղյակ չեմ»,- հայտնեց Ա. Ռոնովն ու հավելեց. «Նրանք իմ ֆիլմը որտեղի՞ց, ընդհանրապես, ունեն: Սկսենք այստեղից: Ոչ ոք իրավունք չունի ֆիլմս Հայաստանում ցուցադրելու առանձ ինձ հետ հաշվի նստելու»:
Ա. Ռոնովը նաև հայտնեց, որ ինքն այդ նախագիծը մերժել է, և «ընդհանրապես մերժում եմ այսօր` այս պահին, իմ ֆիլմերի ցուցադրումը և քննարկումը Հայաստանում»:
