Ընդդիմությունը լուրջ տարբերություններ չունի՞ իշխանություններից

«Ե´վ ընդդիմադիրները, և´ իշխանություններն ունեն մեկ նպատակ` վերականգնել Վրաստանի տարածքային ամբողջականությունը, բայց և’ առաջին, և’ երկրորդ կողմը Ռուսաստանին դիտում է` որպես օկուպանտ երկիր»,- լրագրողների հետ հանդիպման ժամանակ հայտնեց «Նորավանք» գիտակրթական հիմնադրամի վրացական հարցերով փորձագետ, պատմական գիտությունների թեկնածու Թամարա Վարդանյանը:

Ըստ պատմաբանի, Վրաստանի հայերը «չեն մասնակցում այս խժդժություններին այդ երկու քաղաքական ուժերի մեջ լուրջ տարբերություններ չտեսնելու համար»: Թ. Վարդանյանի կարծիքով, այստեղ կա նաև կրոնի խնդիրը, ինչը ևս ձեռնտու չէ վիրահայերին:

«Ընդդիմադիր ուժերը սիրաշահում են վրաց պատրիարքին, ով Վրաստանում մեծ հեղինակություն ունի, և առաջ են քաշում կրոնի դերի բարձրացման խնդիրը, ինչը մեզ ձեռնտու չէ, քանի որ մենք ձգտում ենք, որ Հայ առաքելական եկեղեցին այնտեղ ստանա իրավական կարգավիճակ»,- բացատրեց Թ. Վարդանյանը:

Պատմաբանը նշեց նաև, որ Վրաստանն ունի նաև արտաքին քաղաքականության վերանայման խնդիր: Ըստ նրա, այն ուղղությունը, որով առաջնորդվում է Վրաստանն արտաքին քաղաքականության ոլորտում, դրսի հրահանգների և խորհուրդների հետևանք է: Այս տեսակետը նա բացատրեց Վրաստանում վրաց փորձագիտական հանրույթի չկայացած լինելով:

«Ամերիկան շարունակելու է Վրաստանում պահել հակառուսական մթնոլորտը, բայց հարցը կայանում է նրանում, որ Վրաստանը դրանից չի շահում, և այն, որ Վրաստանում չկա կայացած, ինքնուրույն վերլուծական հանրույթ, բացասաբար է անդրադառնում Վրաստանի արտաքին քաղաքականության վրա»,- ընդգծեց Թ. Վարդանյանը:

Պատմական գիտությունների թեկնածուն խոսեց նաև Վրաստանի թուրքամետ և ադրբեջանամետ ուղղվածությունից, որը Վրաստանի գլխավոր նպատակի` տարածքային ամբողջականության վերականգման տեսնակյունից, «ոչ մի դրական արդյունքի չի հանգեցնելու»:

15.04.09, 17:30

Aysor.am