Նույնաչափ վճարներ ԼՂՀ-ի և Ջավախքի ուսանողների համար

«Առաջարկվող փոփոխության իմաստը կայանում է նրանում, որ օրենսդրորեն սահմանվի ՀՀ պետական և ոչ պետական բուհերում վճարովի համակարգում սովորող այն ուսանողների, ովքեր ունեն Վրաստանի Հանրապետության քաղաքացիություն, բայց ծագումով Սամցխե-Ջավախեթիից են, ինչպես նաև ԼՂՀ քաղաքացիների համար սահմանված ուսման վարձը չի կարող ավել բարձր լիել, քան ՀՀ քաղաքացիներինը»,- հայտարարեց ԱԺ պատգամավոր, Գիտության, կրթության, մշակույթի, երիտասարդության և սպորտի հարցերի մշտական հանձնաժողովի նախագահ Արմեն Աշոտյանը:

Ա. Աշոտյանը նշեց, որ օրինագծի ներկայացման հիմնավորումը «ակնհայտորեն տեղավորվում է ՀՀ ազգային անվտանգության օրենքի շրջագծում»: Ըստ նրա, հիմնական խնդիրն այն է, որ Ջավախքի ուսանողների համար սահմանվում է բարձր վճար, քանի որ նրանք համարվում են արտասահմանցի ուսանողներ:

«Հաշվի առնելով Ջավախքի սոցիալ-տնտեսկան կացությունը և այնտեղի համար իրականացվող Հայաստանի բազմաթիվ ծրագրերը, որպեսզի նախ և առաջ թեթևացվի այդ մարդկանց հոգսը, և նրանք, ծանր աշխատանք կատարելով, ստիպված չլինեն Հայաստանում սովորող իրենց երեխաների համար վճարել ավելի շատ գումար»,- ընդգծեց Ա. Աշոտյանը:

Ա. Աշոտյանի խոսքերով, Կառավարությունը ներկայացրել է բացասական եզրակացություն, ինչի «հիմնավորումը բավարար հիմք չի ծառայում` իրավաբանական տեսնակյունից»: Ըստ Կառավարության ներկայացրած հիմնավորման, նախագծով սահմանված արտոնությունները հակասում են Սահմանադրությամբ նախատեսված` օրենքի համար բոլորը հավասար են դրույթին:

«Օրենքի առաջ բոլորը հավասար են դրույթի ոգին միանգամայն ուրիշ է: Օրենքի հավասարությունը չի նշանակում, որ օրենքը գործում է բոլորի համար հավասար, այն հավասար է գործում տվյալ օրենքի թիրախ հանդիսացող տվյալ խմբի համար»,- մանրամասնեց Ա. Աշոտյանը:

Օրինագծի հեղինակը նշեց նաև, որ սույն օրինագիծը չի վերաբերվու հայկական Սփյուռքին, քանի որ, «ըստ էության, ԼՂ Հանրապետությունը և Սամցխե-Ջավախեթին չեն համարվում Սփյուռք»:

Սփյուռքի համար չի կիրառվում նաև այն պատճառով, որպեսզի չկրճատվի բուհերի ֆինանսավորումը, քանի որ, ինչպես նշեց Ա. Աշոտյանը, պետության կողմից պետական բուհերը թերի կերպով են ֆինանսավորվում և բուհերի, հատկապես մասնավոր բուհերի ֆինանսավորումը վճարովի համակարգում սովորողների վճարների հիման վրա է կատարվում:

Օրինագծի հեղինակը ներկայացրեց նաև մեկ այլ մոտեցում: Ըստ այդ մոտեցման, Սփյուռքահայ ուսանողները հնարավորություն ունեն բուհ ընդունվել կենտրոնացված քննությունների համակարգով և այդպիսով օգտվել բոլոր այն հնարավորություններից ու առավելություններից, ինչ ունեն ՀՀ քաղաքացի ուսանողները:

09.04.09, 20:29

Aysor.am