«Մենք այս կազմակերպության նախագահությունը մեզ վրա ենք վերցնում մեծ պատասխանատվությամբ և նախագահության ընթացքում հույս ունենք շարունակել կազմակերպության գործունեությունը` այն դարձնելով առավել արդյունավետ», - լրագրողների հետ հանդիպման ժամանակ հայտնեց Ադրբեջանի փոխարտգործնախարար Մահմուդ Մամեդգուլիևը:
Նշենք, որ այսօր Երևանում մեկնարկեց Սևծովյան տնտեսական համագործակցության կազմակերպության (ՍԾՏՀ) ԱԳ նախարարների նիստը, որին մասնակցելու համար Հայաստան են ժամանել նաև Ադրբեջանի փոխարտգործնախարարը և Թուրքիայի արտգործնախարար Ալի Բաբաջանը: Տեղեկացնենք, որ ՍԾՏՀ կազմակերպության նախագահությունը վեց ամսով հանձնվեց Ադրբեջանին:
Մահմուդ Մամեդգուլիևի խոսքերի համաձայն` Ադրբեջանն առաջին հերթին հետամուտ է լինելու որոշ դիվանագիտական խնդիրներ լուծելու գործին, որոնք «խանգարում են համագործակցությանը և խոչընդոտ են հանդիսանում կազմակերպության գործունեության արդյունավետության համար»:
«Դուք շատ լավ գիտեք, որ տարածաշրջանային համագործակցությունն արդյունավետ կլինի խաղաղ և կայուն պայմաններում: Հետևաբար մեր նախաձեռնություններն ուղղված կլինեն կազմակերպության ակտիվության բարձրացմանը, որպեսզի այն հոգ տանի Սևծովյան տարածաշրջանում գոյություն ունեցող կոնֆլիկտների մասին, ինչը ցավոք սրտի, այնպիսի իրավիճակում է, որը լիակատար չի նպաստում տարածաշրջանային համագործակցությանը», - հայտնեց Մ. Մամեդգուլիևը` որպես նախագահության ընթացքում Ադրբեջանի գործունեության ռազմավարության մյուս հիմանական կետ:
Ադրբեջանի փոխարտգործնախարարը նշեց նաև, որ շարունակվելու են համագործակցությունները միջազգային կազմակերպությունների և դրանց անդամ երկրների հետ, հատկապես Եվրամիության, որի «փորձի փոխանակումը կնպաստի ՍԾՏՀ կազմակերպության ամրապնդմանն ու ծավալած գործունեության արդյունավետությանը»:
Ադրբեջանի նախաձեռնությունները կյանքի կոչելու համար` Մահմուդ Մամեդգուլիևը հայցում էր կազմակերպության անդամ երկրների համագործակցությունը, փոխընբռնումն ու աջակցությունը:
16.04.09, 15:53
No comments:
Post a Comment