Ինչպե՞ս են փաստահավաք խմբի գաղտնի նյութերը հայտնվել մամուլում

«Ինչպե՞ս է, որ փաստահավաք խմբի` մեզ տրամադրած նյութը դարձել է հրապարակային, և ո՞վ այն տրամադրել մամուլին հրապարակման համար»,- հարցրեց ԱԺ Մարտի 1-2-ի իրադարձություններն ուսումնասիրող ժամանակավոր հանձնաժողովի ղեկավար Ս. Նիկոյանը:

Ինչպես հանձնաժողովի անդամներին տեղեկացրեց հանձնաժողովի նախագահ Սամվել Նիկոյանը` թերթում նշված է, որ նյութը հրապարակման է տրամադրել «ԱԺ-ի մեր աղբյուրը»: Բացի այդ, նա նշեց, որ այն նույն նյութն է, ինչը տրամադրվել է հանձնաժողովին փակ ծրարով:

«Ստացվում է, որ որևիցե մեկը բացահայտում է իրեն: Բայց ես կարծում եմ` հակառակն է. սա հետքերը, իրական աղբյուրը թաքցնելու ու քողարկելու լավագույն միջոցն է»,- նշեց Ս. Նիկոյանն ու ընդգծեց, որ «երկու դեպքում էլ անբարոյականություն է կատարվել»:

Նա տեղեկացրեց, որ իր վրդովմունքն այսօր հայտնել է փաստահավաք խմբի ղեկավարին` ասելով. «Եթե ուզում եք դուրս տալ ինֆորմացիա, տվեք: Ուզում եք խախտել նախագահի հրամանագիրը, խախտեք, ինչքան ուզում եք: «Հանձնաժողովից և ինձանից գործ չունենաք: Անբարոյական խաղերի մեջ, ինձ չմտցնեք: Մի փորձեք մատնացույց անել այնտեղ, որտեղ դա այդպես չէ: Գործեք բարոյական ճանապարհով»:

Հանձնաժողովի անդամ Գուրգեն Արսենյանն էլ հորդորեց մամուլին այսուհետ նման հրապարակումների պարագայում փակագծերում նշել, որ «պարոն Նիկոյանը և հանձնաժողովը դրա հետ կապ չունի», ինչի հետ համաձայնեց Ս. Նիկոյանն` ասելով. «Այո: Կամ, եթե կապ ունի, հստակ փաստերով թող ասվի, որ կապ ունի»:

30.04.2009, 20:27

Aysor.am

Հ. Հարությունյան. «Միգուցե ճիշտ անկյան տակ չեն կրակել»

«Մի՞գուցե ճիշտ անկյան տակ չեն կրակել, մի՞գուցե հրմշտոց է եղել այդ խառնաշփոթ իրավիճակում, մի՞գուցե այն ավտոմեքենաների գործողությունները, որոնք փորձել են խոյահարել զինվորների շարքը, Չերյոմուխայով են կասեցվել»,- մարտի 1-2-ի իրադարձությունների ուսումնասիրությմբ զբաղվող ԱԺ ժամանակավոր հանձնաժողովի նիստում նման վարկածներ առաջ քաշեց ՀՀ Ոստիկանության նախկին պետ Հայկ Հարությունյանը` պատասխանելով ԲՀԿ պատգամավոր Նաիրա Զոհրաբյանի հարցին այն մասին, թե Չերյոմուխա-7-ի կիրառման ի՞նչ դեպք է տեղի ունեցել, որի արդյունքում կա երեք զոհ:

Տեղեկացնենք, որ մինչ այդ, Հ. Հարությունյանը, պատասխանելով Ն. Զոհրաբյանի` չերյոմուխայի պիտանելիության ժամկետների մասին հարցին, հայտնեց, որ «Չերեմուխայի պահպանման վերաբերյալ տեխնիկական ինստրուկցիաներ չկան, իսկ պիտանելիության վերաբերյալ առաջարկվող ժամկետներն էֆեկտիվութան մասին են, որոնք էլ որոշվում են փորձարկումների միջոցով»:

«Եթե նույնիսկ շատ թարմ Չերեմուխա-7 լիներ և մոտ տարածությունից կրակվեր մարդու ուղղությամբ, այն կարող էր վնասել մարդու նուրբ օրգանները»,- բացատրեց Հ. Հարությունյանն ու հավելեց, որ «նման իրավիճակում և ծայրահեղ պաշտպանության նպատակների համար ոստիկանության աշխատակիցը կարող էր օգտագործել ձեռքի տակ եղած ցանկացած առարկա»:

«Այդ դեպքում ինչպե՞ս կբացատրեք ՀՀ ոստիկանապետի նախկին տեղակալ Գրիգոր Գրիգորյանի հայտարարությունն այն մասին, որ դիպուկահարին ինքն է հրահանգ տվել կրակելու, եթե հայտարարում եք, որ նպատակային կրակոցներ չեն եղել»,- հարցրեց Ն. Զոհրաբյանը:

Հ. Հարությունյանը կրկին հավաստիացրեց, որ «նպատակային կրակոցներ տեղի չեն ունեցել, թեկուզ բոլոր իրավական հիմքերը կային դրա համար»:

«Բացառությամբ դիպուկահարի, որը նկատել է, որ զինվորի վրա են կրակում, և, կրակողին ոտքից վիրավորելով, վնասազերծել է»,- մանրամասնեց նախկին ոստիկանապետը:

30.04.2009, 20:18

Aysor.am

«Ոստիկանությունը ինչու՞ ավելի վաղ չկանխեց …»

«Եթե տեղեկություն ունեիք, որ Ազատության հրապարակում զենք է կուտակվում, որ այդպիսի սադրիչ ծրագրավորումներ են տեղի ունենում, ապա ինչու՞ սպասեցիք, որ այդ ամենը կատարվի, նոր գնայիք: Դուք կարող էիք ի սկզբանե գնալ և կանխել, որ այդպիսի բաներ չլինեին»,- նման հարց ուղղեց Մարդու իրավունքների պաշտպան Արմեն Հարությունյանը ՀՀ Ոստիկանության նախկին պետ Հայկ Հարությունյանին մարտի 1-2-ի դեպքերն ուսումնասիրող ԱԺ ժամանակավոր հանձնաժողովի նիստի ընթացքում:

Ի պատասխան Հայկ Հարությունյանը նշեց, որ Ազատության հրապարակում զենքի կուտակման մասին տեղեկությունները ոստիկանությունը ստացել է փետրվարի 29-ին: Նա հայտնեց, որ մինչ ստացված տեղեկությունը ստուգվել և հստակեցվել է, արդեն «գիշերային ժամ է եղել և իրենք սպասել են լուսաբացին»:

«Մեր կողմից ոչ մի հապաղում տեղի չի ունեցել: Մեր գործողություններն ինչ-որ առումով կանխիչ դեր կատարեցին, միգուցե ծրագրավորած էր շատ ավելի զենք բերել, բաժանել, քան այն, ինչ կար»,- հավելեց Հ. Հարությունյանը:

Ա. Հարությունյանը մնացած հարցեը, Սամվել Նիկոյանի հորդորով, ժամանակի սղության պատճառով, համաձայնեց գրավոր ուղղել Հ. Հարությունյանին: Նա նշեց, որ իրենք Ֆրանսիայի դեսպանատան մոտ «ագրեսիվ զանգված» չեն տեսել և հարցրեց, թե միգուցե՞ ինքն ու Հայկ Հարությունյանը տարբեր ցույցերի և տարբեր հավաքների մասին են խոսում:

«Երբ դուք այնտեղ էիք, արդեն 2 տրոլեյբուսները գծիծ հանվա՞ծ և շրջվա՞ծ էին, և կենտրոնական փողոցը փակվա՞ծ էր»,- հակադարձեց Հ. Հարությունյանը:

Մարդու իրավունքների պաշտպանը հարկ չհամարեց «շատ խոսել», բայց «որպես իրավաբանը իրավաբանին» ասաց. «Կա նաև մարդու ինքնապաշտպանության առողջ բնազդը և պոզիտիվ իրավունքը պետք է հիմնվի բնական իրավունքի վրա: Եթե դա հակասում է բնական իրավունքին, ուրեմն այդ պոզիտիվ իրավունքն է սխալ և դրա մեկնաբանողն է սխալ»:

«Չեմ կարծում, որ պաշտպանվելու նպատակով պետք է զինվեին մահակներով, երկաթե ձողերով, հրազենով… Ավելի լավ էր պաշտպանվելու նպատակ ունեցողները վահաններ ձեռք բերեին»,- ընդգծեց Հ. Հարությունյանն ի պատասխան:

30.04.2009, 18:02

Aysor.am

«Մարտի 1-ին ոստիկանությունը զսպվածություն է ցուցաբերել»

«Դա պատերազմի դաշտ չէր, որպեսզի հրաման տրվեր կրակել և ամբողջ զորքը կրակեր: Նման հրաման ոչ ոք չէր կարող տալ և չի էլ տրվել` ո´չ իմ, ո´չ էլ ՀՀ նախկին նախագահ Ռոբերտ Քոչարյանի կողմից»,- հայտարարեց ՀՀ Ոստիկանության նախկին պետ Հայկ Հարությունյանը մարտի 1-2-ի իրադարձություններն ուսումնասիրող ԱԺ ժամանակավոր հանձնաժողովի նիստում` պատասխանելով հանձնաժողովի անդամ, ՀՅԴ պատգամավոր Արծվիկ Մինասյանի հարցին այն մասին, թե «արդյոք ցուցարարների վրա կրակ բացելու հրաման տրվե՞լ է. եթե այո, ապա ու՞մ կողմից, ի՞նչ իրավական փաստերով և հիմքերով, ինչո՞վ էր պամանավորված զենք կիրառելու անխուսափելիությունը»:

Ըստ Հ. Հարությունյանի, ոստիկանության զորքերից «ընդամենը մի խումբ է իրադարձությունների վայրում գտնվել` զինված հաշվեցուցակային ինքնաձիգերով, որոնք եղել են մինչև 25 մարդ, որոնք անմիջապես շարքերում ընդգրկված չեն եղել, այլ տեղակայված են եղել առանձին տեղ, որպես ռեզերվային խմբեր: Նրա խոսքերով, հիշյալ խումբն օգտագործել է անգնդակ և լուսածիր փամփուշտներ` «զուտ նախազգուշական նպատակներով»:

«Պատկերացնու՞մ եք, եթե հրաման լիներ կրակ բացել և կրակել, հազարավոր զոհեր կլինեին, նման բան տեղի չի ունեցել և ոստիկանները նպատակային կրակոցներ չեն արձակել»,- ընդգծեց Հ. հարությունյանը:

Ա. Մինասյանի մյուս հարցին, թե կատարվող իրադարձությունների մասին «ո՞վ է տեղեկացրել այն ժամանակ գործող նախագահ Ռոբերտ Քոչարյանին և նա տվել է հրաման կամ հանձնարարություն հրազեն օգտագործելու վերաբերյալ», Հ. Հարությունյանը պատասխանեց` ասելով, որ ինքն է անձամբ զեկուցել:

«Տեղի ունեցածի վերաբերյալ ինձ զեկուցել է ոստիկանության զորքերի հրամանատարը` չնայած` ես ինքս աշխատասենյակում նստած լսում էի նռնակների պայթյունի և կրակոցների ձայնը: Զեկուցել է նաև ոստիկանության պետի մյուս տեղակալները` Արմեն Երիցյան և Հովհաննես Հունանյանը, որից հետո ես անմիջապես զեկուցել եմ Հանրապետության նախագահին: Զեկուցել եմ նաև, որ արդեն իսկ ունենք վիրավորներ ոստիկանության ուժերից»,- մանրամասնեց ոստիկանության նախկին պետը և հավելեց. «Հանրապետության նախագահն ինձ հանձնարարել է ցուցաբերել մաքսիմալ զսպվածություն, որը նաև հանձնարարվել է ոստիկանությանը»:

«Ի՞նչ եք կարծում, արդյո՞ք կարելի էր թույլ տալ, որպեսզի կրկնվեին այն ավանդույթները, որ Ազգային ժողովի նախագահին աշխատասենյակում ծեծեին, կամ Հանրապետության այլ ղեկավարների վրա ձեռք բարձրացնեին … Կարծում եմ, որ դա անթույլատրելի էր և ոստիկանությունը պետք է ամեն ինչ աներ, որ մինիմում տույժերի գնով, դա իրականացնել թույլ չտար, որը կարծում եմ հաջողվեց»,- նշեց Հ. Հարությանյանը:

«Չնայած ոստիկանությունը կարող էր օգտագործել ցանկացած հրազեն և «Ոստիկանության մասին» ՀՀ օրենքի համաձայն ոստիկանությունը ձեռքի տակ գտնվող ցանկացած առարկա կարող է նման իրավիճակում օգտագործվել, բայց նորից եմ կրկնում, ոստիկանությունն այս հարցում զսպվածություն է ցուցաբերել»,- ամփոփելով խոսքը` նշեց Հ. Հարությունյանը:

30.04.2009, 17:55

Aysor.am

Դաշնակները կշարունակեն ղեկավարել երկու մշտկան հանձնաժողովները

«Ուժեղ ընդդիմությունը ուժեղացնում է նաև պետականությունը: Գիտակցելով, որ այս քայլը միտված է քաղաքական դաշտի առողջացմանը` ընդունում ենք կոալիցիայի առաջարկությունը, և մեր խմբակցության անդամները կշարունակեն իրենց աշխատանքը ԱԺ երկու մշտական հանձնաժողովների իրենց ղեկավար պաշտոններում», - հայտարարեց ԱԺ-ում ՀՅԴ խմբակցության ղեկավար Վահան Հովհաննիսյանը ԱԺ այսօրվա նիստում:

Վ. Հովհաննիսյանի խոսքերի համաձայն` այն գաղափարախոսությունը, որը դրված է կոալիցիայի առաջարկության հիմքում «հոգեհարազատ է իրենց և իրենք` կոալիցիայի ներսում, թե դրսում, տարիներ շարունակ պայքարել են, որպեսզի մեր երկրում ընդդիմության իրավունքներն ընդլայնվեն և դրանով ստեղծվի բանավեճի քաղաքակիրթ դաշտ»:

«Մենք մեր կողմից պատրաստ ենք նոր մշակույթ ներդնել Հայաստանի քաղաքական ասպարեզում և, լինելով ընդդիմություն, կարող ենք և պայքարելու ենք, որպեսզի ընդդիմությունն ավելի ու ավելի հակակշռման և զսպման մեխանիզմներ ունենա` աշխատելով իշխանության հետ», - հայտնեց Վ. Հովհաննիսյանը:

Նա նաև նշեց, որ «այս գումարման խորհրդարանի գործունեության ընթացքում արդեն նման առաջարկով հանդես գալու փորձ արվել է, և իրենք ողջունում են, որ կոալիցիայի երեք քաղաքական ուժերը պատրաստակամ են հավատարիմ մնալ այդ սկզբունքներին և մոտեցումներին»:

30.04.2009, 14:34

Aysor.am

«Կան քաղաքական ուժեր` դեմ սահմանի բացմանը` առանց նախապայմանների»

«Պատասխան տալու՞ եք Թուրքիայի վարչապետի վերջին շրջանի հայտարարություններին, ով, միանալով Ադրբեջանցի իր գործընկերոջը, ուզում է ՄԱԿ-ի անվտանգության խորհրդում Հայաստանին ճանաչել բռնազավթիչ, օկուպանտ: Ձեզնից որևէ մեկը իրենց և միջազգային հանրությանը հնչեցնելու՞ է, թե իրականում ո՞վ է օկուպանտ Հայոց բարձրավանդակում: Ի՞նչ դրույթներ է պարունակում համապարփակ շրջանակը, որը համաձայնեցված է Հայաստանի և Թուրքիայի միջև: Ի՞նչ դրույթներ է պարունակում «ճանապարհային քարտեզը»: Երբ խոսվում է համաձայնեցման մասին, կոնկերտ ո՞ր դրույթներն էին համաձայնեցված կողմերի միջև»:

Այս հարցերի շարքը ՀՀ վարչապետ Տիգրան Սարգսյանին ներկայացրեց «Ժառանգություն» կուսակցության ղեկավար Րաֆֆի Հովհաննիսյանը:

Ի պատասխան, վարչապետ Տիգրան Սարգսյանը նշեց, որ հարցի առնչությամբ երեկ ԱԳ նախարարը հնարավորություն է ունեցել ԱԺ-ում մանրակրկիտ բացատրություններ տալու` Հայաստանի վարած քաղաքականության վերաբերյալ:

«Ես շատ լավ գիտակցում եմ, որ խոսքը գնում է ոչ թե նրա մասին, թե ինչպիսին են բանակցությունների սկզբունքային կետերը, այլ այն մասին, որ հայ-թուրքական հարաբերությունների մեր պատկերացումները տարբեր են: Այսինքն` մենք քաջ գիտակցում ենք, որ կան քաղաքական ուժեր, որոնք կողմ չեն, որպեսզի մենք Թուրքիայի հետ հաստատենք առանց նախապայմանների դիվանագիտական հարաբերություններ և բացենք սահմանը»,- հայտարարեց Տ. Սարգսյանը:

Տ. Սարգսյանը վստահեցրեց, որ բանակցությունները կլինեն հրապարակային և «մեր ժողովուրդը, ինչպես նաև պատգամավորները` ժողովրդի ներկայացուցիչները, հնարավորություն կունենան տալու իրենց գնահատականները, մանավանդ, որ փաստաթուղթն անխուսափելիորեն հայտնվելու է ԱԺ-ում»:

«Այս տեսակետից ես ձեզ հավաստիացնում եմ, որ որևիցե պայմանավորվածություն, գաղտնի սկզբունք, գաղտնի կետեր, որոնք մենք ձեզ չենք ներկայացնելու, չկան և չեն լինելու: Որոշումները լինելու են ձերը, և մենք չենք կարող թափանցիկ աշխատելու կարևոր սկզբունքային կետը շրջանցել»,- նշեց վարչապետը:

Ամփոփելով խոսքը` Տ. Սարգսյանն ընդգծեց, որ «մեր ազգային շահերից բխում է, որ ՀՀ արտաքին քաղաքականությունը չի կարող լինել և չպետք է լինի հակաթուրքական, այլ պետք է լինի պրոհայկական. սա սկզբունքային հարցադրում է, և հենց այս հարցադրման շուրջ է, որ այսօր կա բանավեճ»:

29.04.2009, 19:30

Aysor.am

Ա. Շահբազյան. «Ստացվում է, որ իրե՞նք են խաբում թուրք ժողովրդին»

«Արդյո՞ք սա չի խոսում այն մասին, որ կան նախապայմաններ, մասնավորապես հայ-թուրք հարաբերությունների հաստատման նախապայմաններից մեկը` պատմության ուսումնասիրության հանձնաժողովի ստեղծումն է»,- ՀՀ Արտաքին գործերի նախարար Էդվարդ Նալբանդյանին նման հարց ուղղեց ՀՅԴ պատգամավոր Արտյուշ Շահբազյանը ԱԺ չորրորդ գումարման հինգերորդ նստաշրջանի ապրիլի 27-30-ի քառօյայի այսօրվա նիստի «հարց-պատասխան» բաժնում:

Նշենք, որ Ա. Շահբազյանը ներկայացրեց երեկ տեղի ունեցած Թուրքիայի նախագահ Աբդուլահ Գյուլի վարած Թուրքիայի անվտանգության խորհրդի նիստի արդյունքում հրապարակված հայտարարությունից Հայաստանին առնչվող կետը: «Հայ և թուրք ժողովուրդների համատեղ պատմությունը պետք է գնահատվի օբյեկտիվ և գիտական մոտեցմամբ, որը կամրապնդվի անվիճելի ապացույցներով ու փաստաթղթերով և ազատ կլինի բոլոր կանխակալ պատկերացումներից»:

Ի պատասխան ՀՀ արտգործնախարար Էդվարդ Նալբանդյանը հայտնեց, որ «մենք բազմիցս նշել ենք, որ մեր` Հայաստանի, Թուրքիայի և Շվեյցարիայի համատեղ հայտրարության մեջ ասվում է, որ այն առաջընթացը, որը ձեռք է բերվել, գոհացնում է երկու կողմերին»:

«Դուք կարծում եք, մեզ կարո՞ղ են գոհացնել ինչ-որ նախապայմաններ, երբ մենք բազմիցս Հանրապետության նախագահի մակարդակով հայտարարել ենք, և ես ինքս էլ հայտրարել եմ, որ որևէ նախապայման չկա: Մենք բանակցությունները մեկնարկել ենք փոխադարձ ըմբռնումով, որ չկան նախապայմաններ, և եկել ենք առաջընթացի` նույն ըմբռնումով»,- հակադարձեց Է. Նալբանդյանը:

Է. Նալբանդյանը նաև անդրադարձավ խնդրի առնչությամբ հայտարարությունից անմիջապես հետո արված տարբեր մեկնաբանությունների: Նա հիշեցրեց, որ ԱՄՆ պետքարտուղարության հայտարարությունում` բացի ողջույնից, ասվում է, որ հարաբերությունները երկու երկրների միջև պետք է կարգավորվեն առանց նախապայմանների:

Ըստ Է. Նալբանդյանի Թուրքիայի անվտանգության խորհրդի նիստի հայտարարությունում, որը տեղակայված է Թուրքիայի նախագահի կայքում, Հայաստանի և 1915 թ-ի վերաբերյալ ասվում է` «Քննարկվել է նաև 1915 թ-ի դեպքերի վերաբերյալ վերջերս մի շարք երկրների կողմից արված հայտարարությունները և այդ ուղղությամբ նախաձեռնությունները»:

ՀՅԴ պատգամավոր Ա. Շահբազյանը պնդեց, որ պաշտոնական կայքում տեղադրված է նաև իր ներկայացրած տեղեկատվությունը: Նա հայտարարությանը մոտեցավ «արտգործնախարարի տրամաբանությամբ» և հարցրեց. «Կարելի՞ է ենթադրել, որ ապրիլի 22-ի հայտարարության նախօրեին Թուրքիայի վարչապետ Ռեջեփ Էրդողանի արած հայտարարությունները, և դրանից հետո եղած հայտարարությունները չեն համապատասխանում իրականությանը: Ստացվում է, որ թուրքերը պատրա՞ստ են հարաբերություններ հաստատել` մի կողմ դնելով նախապայմանները: Այս դեպքում ստացվում է, որ իրե՞նք են խաբում թուրք ժողովրդին»:

Է. Նալբանդյանն առաջարկեց չանդրադառնալ թուրքական կողմի մեկնաբանություններին և դիրքորոշումներին: Նա ընդգծեց, որ «մենք եկել ենք առաջընթացի բանակցություններում, և այդ առաջընթացը հենց այն է, որ գոհացնում է երկու կողմերին, այսինքն` առանց նախապայմանների գնալ լիակատար հարաբերությունների կարգավորման»:

29.04.2009, 19:08

Aysor.am

Վ. Խանամիրյան. Պարեք հայկական պար, հայկական տարազով

Հայաստանի պարարվեստի գործիչների միության նախագահ Վանուշ Խանամիրյանը, ով ՀՀ Մշակույթի նախարար Հասմիկ Պողոսյանի հրամանով այսօր` Պարի միջազգային օրը, ոսկե հուշամեդալ ստացավ, իր խորին շնորհակալությունը հայտնեց նախարարությանը:

Aysor-ի հետ զրույցում Վ. Խանամիրյանը հուզմունքը զսպելով նշեց, որ «դրանից ավելի լավ բան չկա, երբ գնահատվում է «Վանուշ» պարախումբը, որտեղ պարում են 50-60 տարեկան պարողներ»:

Վ. Խանամիրյանը խոսեց նաև պարարվեստի բնագավառում առկա հիմնական խնդիրներց: Նա նշեց, որ պարարվեստի հիմնական խնդիրն օտար մշակույթը կրող պարի ներթափանցումն է:

«Ինչ էլ ուզում եք ասել, մենք աշխարհին կարող ենք զարմացնել և աշխարհը կարող ենք գրավել միայն մեր հայկական պարով և հայկական տարազներով, եթե ամենաճշգրիտ ձևով ու ճիշտ երաժշտության ներքո պարենք»,- ընդգծեց Վ. Խանամիրյանն ու հավելեց, որ ինքը պարարվեստի բնագավառի բոլոր պարուսույցներին կոչ է անում երեխաներին հայկական տարազ հագցնել ու հայկական երաժշտության տակ պարել սովորեցնել:

«Մեր հայկական պարերն ամեն ինչ ասում են: Միշտ ասում եմ` չեմ սիրում, որ մեր երեխաները մերկանում են: Չէ՞ որ պարուսույցների ամենակարևոր և գլխավոր դերերից մեկն է, որ բոլորին հայեցի ու ազնիվ պահենք»,- նշեց Վ. Խանամիրյանը:

«Գարդման», «Էմանուել», «Հասմիկ» և «Ապարան» պարային խմբերի ղեկավար Հասմիկ Մկրտչյանը Aysor-ի հետ խոսելով Վանուշ Խանամիրյանի մասին` հայտնեց, որ Վ. Խանամիրյանը Մշակույթի նախարարի կողմից ստացել է արժանի մրցանակ: Նա կիսվեց նաև Վ. Խանամիրյանի մարդկային արժանիքներից` նշելով, որ «պարարվեստի հայրը իր անկեղծությունն ու ջերմությունը փոխանցվել է բոլորին»:

«Վանուշ Խանամիրյանը պարարվեստի հայրն է և հայրապես էլ պահում է պարարվեստի բնագավառի բոլոր ներկայացուցիչներին` հավասարապես ուշադրություն ու ջերմություն հատկացնելով, ինչպես հայրն է խնամում իր երեխաներին»,- զրույցն ամփոփեց Հասմիկ Մկրտչյանը:

29.04.2009, 17:27

Aysor.am

Պատվոգրեր հանձնվեցին հայկական պարի նվիրյալներին

«Այն մարդիկ, ովքեր պահպանել են հայկական պարի ողջ ժառանգությունը, այն փոխանցել են սերնդե սերունդ, ավելացրել են իրենց տաղանդն ու նոր հայացքը, արժանի են խորը հարգանքի ու գնահատականի»,- հայտնեց ՀՀ Մշակույթի նախարարի տեղակալ Դավիթ Մուրադյանը, ով հայկական պարարվեստի նվիրյալներին պատվոգրեր հանձնեց` ՀՀ Մշակույթի նախարարի հրամանով:

Տեղեկացնենք, որ այսօր Պարի միջազգային օրն է: Պատվոգրերի արժանացան պարային համույթների ու պարախմբերի մի շարք ներկայացուցիչներ, այդ թվում` «Հայք» պարային համույթի գեղարվեստական ղեկավար Արթուր Գևորգյանը, «Հայ աստղեր» պարային համույթի գեղարվեստական ղեկավար Սուրեն Խաչատրյանը, «Սալմաստ» պարային համույթի գեղարվեստական ղեկավար Արթուր Սարգսյան, «Արսենալ» պարային համույթի գեղարվեստական ղեկավար Արսեն Մելքոնյանը և այլոք:

«Հայկական պարը հայկական ինքնությունն է, այն ինքնությունը, որն առանց թարգմանության կարող է խոսել այլ ազգերի հետ: Մեր ժողովրդական, էթնոգրաֆիկ պարը կապվում է մեր ազգային ծեսերի, պատմական ավանդույթների, ազատագրական պայքարի հետ և արտացոլում է հայ ժողովրդի հոգին ու պատմությունը»,- ասաց Դ. Մուրադյանը` շնորհավորելով պարարվեստի բնագավառի բոլոր մասնագետներին, ինչպես նաև` բոլոր պարողներին:

Պարարվեստի զարգացման և տարածման համար ոսկե հուշամեդալ հանձնվեց Վանուշ Խանամիրյանի «Վանուշ» պարախմբին:

Դ. Մուրադյանը բացատրեց, թե ինչու պատվոգրեր ստացողների անունների շարքում չկան հայակական բալետի նվիրյալների անուններ: Նա տեղեկացրեց, որ այս տարի նշվելու է Հայաստանի օպերայի և բալետի ակադեմիական թատրոնի հիմնադրաման հոբելյանը, որի ժամանակ էլ «կմեծարվեն ու պատվոգրերի կարժանանա բալետի վարպետներն ու նվիրյալները»:

29.04.2009, 19:22

Aysor.am

Նույնիսկ ճգնաժամի պայմաններում բանկի տնօրենը լավատես է

«Կանխատեսումներ անելն այնքան էլ շնորհակալ գործ չէ: Այն, ինչ վերաբերում է 2008 թ.-ին, պետք է ասեմ, որ Հայաստանն ընդհանուր առմամբ, արժանապատվորեն գլուխ հանեց բանկային համակարգին ուղղված առաջին հարվածից»,- լրագրողների հետ հանդիպման ժամանակ հայտնեց «ՎՏԲ-Հայաստան բանկ» ՓԲԸ գլխավոր տնօրեն-տնօրինության նախագահ Վալերի Օվսյաննիկովը:

Վ. Օվսյաննիկովը, չնայած առկա ֆինանաստնտեսական բարդ իրավիճակին, նշեց, որ լավատես է` Հայաստանի ֆինանսական հետագա զարգացումների առումով:

«Կարծում եմ, որ Հայաստանի ֆինանսական համակարգը դիմակայել է առաջին հարվածին` հատկապես իրացվելիության և կապիտալիզացիայի առումով, և բանկերն ունեն բավարար ռեսուրսներ իրենց գործունեությունն ու հետագա ֆինանսավորումն ապահովելու համար», - մանրամասնեց Վ. Օվսյաննիկովը:

Բանկի նախագահը չցանկացավ կանխատեսումներ անել նաև մակրոէկոնոմիկայի բնագավառում, ընդգծելով, որ «չի կարող ասել, թե ինչ կլինի Հայաստանում»: Նա նշեց, որ բոլորին է հայտնի Կառավարության կողմից ներկայացված հաշվետվություններն այն մասին, որ տեղի են ունենում անկումներ, հատկապես արտահանման բնագավառում, ինչպես նաև ցածր են կրեդիտավորման ծավալները:

«Այժմ բանկերը ֆինանսավորման հետ կապված ընդհանուր առմամբ խնդիրներ չունեն: Օրինակ, մենք տիրապետում ենք զգալի ռեսուրսների: Սակայն հարցը նրանում է, թե ու՞մ տալ գումար, ինչպիսի՞ պարտքառուներին տալ և ինչպիսի՞ մոտեցումներով գնահատել ռիսկերը` հիմնականում կապված այդ միջոցների վերադարձելիության հետ», - հայտնեց Վ. Օվսյաննիկովը:

Վ. Օվսյաննիկովի կարծիքով` բանկային համակարգի տեսանկյունից, առաջին հերթին խնդիրն այս տարի կլինի «կրեդիտավորման փաթեթի ռիսկերի հաշվման խստացումը և փոքր ու միջին բիզնեսի ֆինանսավորման ավելացումը»:

Չնայած դժվարություններին, բանկի նախագահը տեղեկացրեց, որ «ՎՏԲ-Հայաստան բանկ» ՓԲԸ-ն շարունակելու է ընդլայնել իր գործունեության ծավալները, որոնք հիմնականում կլինեն փոքր և միջին բիզնեսի կրեդիտավորումների տեսքով: Բացի այդ, Վ. Օվսյաննիկովի խոսքերի համաձայն, բանկը նաև ֆինանսավորելու է մի շարք շինարարական ծրագրերի իրագործումը, որոնց առնվազն 50 տոկոսն արդեն իրականացված է:

Ըստ Վ. Օվսյաննիկովի, Հայաստանը հնարավորություն ունի դիմակայել ֆինանսատնտեսական ճգնաժամին, որի համար «բավարար հիքեր կան», իսկ «ՎՏԲ-Հայաստնան բանկը» կաշխատի պահպանել այն մակարդակը, որին հասել է 2008 թ-ի ընթացքում:

29.04.2009, 16:10

Aysor.am

Հովիկ Աբրահամյան. «Ի՞նչ հարց ընդգրկեմ քառօյա նիստ»

«Ձեր անհանգստությունն անտեղի է և անհիմն: Եթե դուք ինչ-որ բան մի քանի անգամ ասում եք, դրանից ոչ մի բան չի փոխվում»,- ասաց ԱԺ նախագահ Հովիկ Աբրահամյանը` պատասխանելով «Ժառանգություն» խմբակցության պատգամավորների այն հորդորներին, որ անհրաժեշտ ու հրատապ է ԱԺ այս քառօրյա նստաշրջանում ընդգրկել Հայաստան-Թուրքիա հարաբերություններին առնչվող հարցերը, որոնք ի հայտ են եկել Հայաստանի և Թուրքիայի ԱԳ նախարարությունների ապրիլի 22-ի գիշերը տարածած հաղորդագրությունից հետո:

Հ. Աբրահամյանի խոսքերով, պատգամավորներն առաջարկում են «մի բան, որ իրենք էլ չգիտեն` ինչի՞ մասին են խոսում»:

«Ի՞նչ հարց ես ընդգրկեմ քառօյա նիստ: Ինչի՞ մասին է խոսքը: Եթե ընդհանուր պետք է վերցնենք ու ընդգրկենք Թուրքիա-Հայաստան հարաբերությունները, իմ կարծիքով անիմաստ է»,- ընդգծեց ԱԺ նախագահը ու նշեց, որ հարցի առնչությամբ, ինչպես խոստացել է, «այս երկու օրը կորոշենք, կքննարկենք ու կխորհրդակցենք ֆրակցիաների ղեկավարների հետ»:

ԱԺ նախագահ Հ. Աբրահամյանը հորդորեց յուրաքանչյուր պատգամավորի «իրեն չդրսևորել այնպես, թե ինքն ավելի շատ է Հայաստանի, ժողովրդի, պետության մասին մտածում, քան յուրաքանչյուր մեկ այլ պատգամավոր կամ յուրաքանչյուր քաղաքացի»:

«Ես առաջարկում եմ, որ լինի կառուցողական քննարկում, որ այն ունենա իմաստ, որ իմանանք, թե ինչի՞ մասին ենք խոսելու: Թե չէ, եթե պետք է նստենք, խոսենք ու գործ չանենք, ես դրան դեմ եմ»,- ելույթն ամփոփեց Հ. Աբրահամյանը:

27.04.2009, 20:50

Aysor.am

Հայ-թուրքական հարաբերությունները կդառնա՞ն ԱԺ քննարկման խնդիր

«Արդյո՞ք չենք հավակնում քննարկել Հայաստան-Թուրքիա հարաբերությունների շուրջ ստեղծված նոր իրավիճակը, քանի որ այն երկրի շրջադարձային պահերից մեկն է և արժանի է քննարկման կամ ԱԺ-ի քառօրյա նստաշրջանում, կամ հատուկ հրավիրված խորհրդարանական լսումների ժամանակ»,- ԱԺ նախագահին նման հարց ուղղեց «Ժառանգություն» խմբակցության պատգամավոր Լարիսա Ալավերդյանը:

Ի պատասխան` ԱԺ նախագահ Հովիկ Աբրահամյանը հայտնեց, որ ԱԺ-ն անպայման այդ հարցին կանդրադառնա, բայց, թե քննարկումներն ինչպիսի՞ն և ի՞նչ ձևաչափով կլինեն, այժմ չի կարող ասել: Հ. Աբրահամյանի պատասխանին հետևեց «Ժառանգություն» խմբակցության ղեկավար Արմեն Մարտիրոսյանի հարցն այն մասին, որ ժամանակն է, որպեսզի ԱԺ-ն տեղյակ լինի նաև Մադրիդյան սկզբունքներին:

«Բոլոր ճանապարհները բերում են դեպի Ազգային ժողով: Առանց Ազգային ժողովի ոչ մի հարց չի կարող քննարկվել»,- ասաց Հ. Աբրահամյանն ու նշեց, որ ինքը պաշտպանում է ՀՀ նախագահի դիրքորոշումը արտաքին քաղաքականությունում, և գտնում է, որ ճիշտ է Թուրքիայի հետ հարաբերությունների կարգավորումը` առանց նախապայմանի, և կարծում է, որ «այստեղ որևիցե կապ չունեն Հայոց ցեղասպանության և Լեռնային Ղարաբաղի հարցերը»:

«Եթե այս օրերին հրավիրվում է ՀՀ Ազգային անվտանգության խորհրդի նիստ, եթե ապրիլի 22-ին տարածվում է բոլորիս հոգիները խռովող հայտարարություն, եթե 24-ին թուրքական մամուլի կողմից գաղտնազերծվում են «ճանապարհային քարտեզի» ինչ-որ հանգրվաներ, եթե ամսի 25-ին Թուրքիայի նախագահը սրտնեղում է, թե ինչու՞ ԱՄՆ նախագահ Բարաք Օբաման իր ելույթում չի ասել, որ հայերը կոտորել են հարյուր հազար թուրքերի, ես կարծում եմ, որ ստեղծված իրավիճակն աննախադեպ է, և շատ ցանկալի կլիներ, որ այս քառօրյայի ընթացում Դուք մեր բոլոր գործընկերների հետ կիսվեիք այս հրացերի վերաբերյալ»,- առաջարկեց «Ժառանգության» պատգամավոր Ստյոպա Սաֆարյանը:

ԱԺ նախագահը վստահեցրեց, որ իրենք «ոչ մի բանից հեռու չեն լինլու»: Նա խոստացավ, որ «ես առիթը բաց չեմ թողնի, որպեսզի մեր պետության և մեր ժողովրդի համար այդ կարևոր հարցը միասին քննարկենք և մեր առաջարկություններն ու տեսակետները հայտնենք»:

Ս. Սաֆարյանը զգուշացրեց, որ հնարավոր է` քննարկումը լինի ուշացած և խնդրեց ուրվագծել, թե հարցի քննարկումը ե՞րբ կլինի: Հ. Աբրահամյանը պատասխանեց, որ ինքը չի կարծում, թե «ուշանալու որևէ խնդիր կա»: Նա հայտնեց, որ չի կարող ասել` երբ, քանի որ դեռ չի որոշել, «իսկ երբ որոշեմ, ֆրակցիաներին տեղյակ կպահեմ»:

27.04.2009, 21:25

Aysor.am

Լարիսա Ալավերդյան. «ԱԺ-ն պետք է արագ արձագանքի»

«Ես ոչ միայն առաջարկում եմ, այլ ակնկալում եմ շատ արագ արձագանք` վերին աստիճանի կշռադատված, որովհետև մենք տեսնում ենք, որ մեր հարևանները վերին աստիճանի օպերատիվ են այսպիսի դեպքերում»,- Հայաստան-Թուրքիա հարաբերությունների վերաբերյալ ԱԺ-ի չորրորդ գումարման հինգերորդ նստաշրջանի ապրիլի 27-30-ը քառօրյայի այսօրվա նիստոմ ասաց «Ժառանգություն» խբմակցության պատգամավոր Լարիսա Ալավերդյանը:

Ըստ նրա, Հայաստանի և Թուրքիայի ԱԳ նախարարությունների հայտարարությունը, հայ-թուրքական հարաբերությունների զարգացումները «վերին աստիճանի կարևոր հանգամանքներ են, որոնք շրջադարձային են ինչպես Հայաստան-Թուրքիա, այնպես և արտաքին քաղաքականության մեջ»:

«Կարծես Հայաստանը կիսաննջած մի վիճակում է ուզում մնալ կամ այդպես են ուզում պահել մեր հասարակությանը, այնինչ մեր հորդորը միտված է հնարավորինս շուտ կանխել այն բոլոր բացասական զարգացումները, որոնք արդեն իսկ, առնվազն, սկսվել են` առանց մեր միջամտության»,- հայտարարեց Լ. Ալավերդյանը` ինֆորմացիոն և դիվանագիտական դաշտում ԱԺ-ի անելիքների մասին խոսելով:

Ըստ «Ժառանգություն» խմբակցության անդամի, Հայաստանն արդեն ունի «դառը փորձ», ինչի մասին են վկայում ԼՂ հիմնահարցի շուրջ ձեռքբերված փաստաթղթերի և բանակցությունների «տխուր վիճակը, որին մենք հասել ենք»:

«Այդ դառը փորձը մեզ հուշում է, որ մենք վերին աստիճանի աչալուրջ պետք է լինենք Թուրքիա-Հայաստան հարաբերություններին վերաբերող հարցերում, որովհետև սա ոչ միայն Արցախի` որպես Հայաստանի մեկ մարզի, այլ Հայաստանի ամբողջական վերբերմունքն է»,- ընդգծեց Լ. Ալավերդյանը:

27.04.2009, 20:43

Aysor.am

ՕԵԿ-ը «հասկանալով ու հարգանքով է վերաբերում» ՀՅԴ որոշմանը

«Դաշնակցությունը մեկ դար և ավելի պատմություն ունեցող կուսակցություն է, ունի իր մոտեցումները, և մենք ուղղակի հասկանալով և հարգանքով ենք վերաբերում նրանց` կոալիցիայից դուրս գալու որոշմանը»,- ԱԺ-ում լրագրողների հետ ունեցած ճեպազրույցի ժամանակ հայտարարեց «Օրինաց երկիր» կուսակցության անդամ, ԱԺ Գյուղատնտեսական և բնապահպանական հարցերի մշտական հանձնաժողովի նախագահ Խաչիկ Հարությանը:

Խ. Հարությունյանի կարծիքով, Դաշնակցության դուրս գալուց հետո կոալիցիան «միգուցե որակական առումով տուժի, բայց քանակական առումով չի տուժելու»: Նա նաև նշեց, որ վաղ է քննարկել Դաշնակցության զբաղեցրած պաշտոնները վերաբախշելու մասին հարցը:

Այն հարցին, թե արդյոք ՕԵԿ-ի համար բավարա՞ր են ՀՅԴ` կոալիցիայից դուրս գալու հիմնավորումները, Խ. Հարությունյանը պատասխանեց, որ ինքը «ծանոթ չէ հիմնավորումներին և չի կարող մեկնաբանություններ անել»:

Այնուամենայնիվ հանձնաժողովի նախագահը նշեց, որ «Հայաստանի վարած արտաքին քաղաքականության մեջ փոփոխություններ չի տեսնում»:

«Ի սկզբանե որդեգրված է քաղաքականություն, այն է` Թուրքիայի հետ կարգավորել մեր հարաբերությունները` առանց նախապայմանների: Այս պահին նախապայմաններ չկան»,- ընդգծեց Խ. Հարությունյանը:

27.04.2009, 16:34

Aysor.am

«Դաշնակցության սկզբունքային քայլը փոքր-ինչ ուշացած էր»

«Յուրաքանչյուր քաղաքական ուժ իրավունք ունի ընտրելու իր սեփական սկզբունքները պաշտպանելու ու վերականգնելու ժամկետը, եղանակը և հաճախականությունը»,- ԱԺ-ում լրագրողների հետ ունեցած ճեպազրույցի ժամանակ հայտարարեց «Ժառանգություն» կուսակցության ղեկավար Րաֆֆի Հովհաննիսյանը` Հայ հեղափոխական դաշնակցության` կոալիցիայից դուրս գալու որոշումը որակելով որպես «մի փոքր ուշացած, բայց դրական և իրենց սկզբունքներին համապատասխանող քայլ»:

Վաղ համարելով որևէ մեկնաբանություններ անել ՀՅԴ-ի հայտարարության վերաբերյալ` Ր. Հովհաննիսյանը կարևորեց ոչ թե կոալիցիայից դուրս գալն ու հետագա զարգացումները, այլև այն, թե «ի՞նչ է անելու հայ ժողովուրդն այս ճակատագրական ջրբաժանի ժամանակ»:

«Անհրաժեշտ է դուրս գալ այս կուսակցականացված վիճակից և հասկանալ, որ այսօր զոհասեղանի` համազգային նժարի վրա, դրված է ոչ միայն մեր պատմական արժանապատվությունը, այլև մեր պետական ապագան: Անհրաժեշտ է, որ գործող իշխանությունները գաղտնազերծեն ինչպես Մադրիդյան սկզբունքները, այլնպես էլ «ճանապարհային քարտեզը»` Թուրքիայի հետ ընդունած համաձայնեցրած հիմքը»,- ընդգծեց Ր. Հովհաննիսյանը:

Հայտարարության գաղտազերծումը, ըստ Ր. Հովհաննիսյանի, պետք է իրականացվի «այս շաբաթ, որպեսզի հարցի տերը` հայ ժողովուրդը, հասկանա` բանակցությունները վարվում են առանց նախապայմանների՞, թե՞ իրականությանն են համապատասխանում թուրքական մամուլի հրապարակումները»: Նրա կարծիքով, եթե Թուրքիան առաջ է քաշում նախապայմաններ, ապա Հայաստանն էլ պետք է ներկայացնի «հայ ժողովրդի նախապայմանները` կապված Ցեղասպանության ճանաչման, հատուցման, չլուծված հարցերի և տարածքների հետ»:

Ր. Հովհաննիսյանը հնարավոր համարեց ՀՅԴ-ի հետ համագործակցությունն ընդդիմադիր դաշտում, եթե գտնեն համագործակցության էական բանաձևեր և ասաց` «Բարով եկան»:

ԱՅՍՕՐ, 16:28

Aysor.am

«ՀՅԴ-ն, սկզբունքներից ելնելով, մտահոգություններն արտահայտեց»

«Քաղաքական դաշտն այդպիսին է, որ միշտ էլ պետք է տեղատվություններ ունենա, և կարծում եմ, որ այս դեպքում երկրում կձևավորվի կառուցողական մի ընդդիմություն, որի հետ հնարավոր կլինի բանավիճել և ավելի հմուտ և կոնկրետ որոշումների անցնել», - ԱԺ-ում լրագրողների հետ ճեպազրույցի ժամանակ հայտարարեց ԱԺ-ում «Հանրապետական» խմբակցության ղեկավար Գալուստ Սահակյանը` ՀՅԴ-ի կոալիցիայից դուրս գալու որոշման վերաբերյալ:

Լրագրողների այն հարցին, թե այդպիսով կոալիցիան կորուստներ կունենա՞ և արդյոք կթուլանա՞, Գ. Սահակյանը պատասխանեց, որ քաղաքականության մեջ «կորուստներ բառն օգտագործելը սխալ է, և, կարծում է, որ այլ դաշտերում նույնպես խնդիրներ կլինեն, և Դաշնակցության հետ կկարողանան փոխհամագործակցել, ինչը չի կարող կորուստներ ենթավերնագիրն ունենալ»:

«Թուլանալու խնդիր չկա: Քաղաքական դաշտն ավելի կհզորանա, և քանի որ, վերջին հաշվով, այս համապետական ընտրություններից հետո չձևավորվեց մեր երկրի համար անհրաժեշտ քաղաքական ընդդիմություն, կարծում եմ, որ ՀՅԴ-ն` որպես դասական կուսակցություն, ավելի կոռեկտ, ավելի նպատակային գործընթաց կունենա», - մանրամասնեց Գ. Սահկյանն ու հավելեց, որ «պետության համար շատ անհրաժեշտ է ունենալ և´ ուժեղ ընդդիմություն, և´ ուժեղ իշխանություն»:

Գ. Սահակյանը ՀՅԴ որոշումը բացատրում է , որ նրանք «սկբունքային մոտեցումներով մտահոգություններ թերևս ունեն, և փորձել են այդ կերպ արտահայտել»: Որքանո՞վ են հիմնավորված այդ մտահոգությունները հարցին, Հանրապետական խմբակցության ղեկավարը պատասխանեց` ընդգծելով, որ իրենց «կարծիքի կամ քաղաքական սկզբունքների որևէ փոփոխություն չի եղել, ընդ որում, նաև հայ-թուրքական փոխհարաբերությունների առումով»:

«Մենք գտնում ենք, որ Հայաստանը Թուրքիայի հետ պետք է փոխհարաբերություններ ունենա առանց որևէ նախապայմանի, և դա որևէ կերպ չի առնչվելու ոչ Ղարաբաղի հիմնախնդրի, ոչ էլ Ցեղասպանության հետ, նամանավանդ, որ Ցեղասպանության հարցը ոչ թե ներքաղաքական քննարկում է, այլ ամբողջ աշխարհը մտահոգված է դրանով, և մենք որևէ մտահոգություն չունենք Ղարաբաղի հարցը կապել դրա հետ», - պարզաբանեց Գ. Սահակյանն ու խոստացավ «նորից լուսաբանել և հասարակությանը ներկայացնել հայտարարությունը»:

Գ. Սահակյանի խոսքերի համաձայն` Հայաստանի և Թուրքիայի ԱԳ նախարարությունների ապրիլի 23-ի կեսգիշերվա հայտարարությունը «նորություն չէր, քանի որ այդ մասին արդեն 6-7 ամիս խոսվում էր, իսկ հայտարարությունն այն մասով էր, որ մենք ցանկանում ենք իրոք առանց նախապայմանների հարաբերություններ ունենալ»:

«Դեռևս հայ-թուրքական դիվանագիտություն չի սկսվում, ընդամենը առաջին հիմքերն են դրվում: Մենք պնդում ենք, որ որևէ նախապայմանի դեպքում, որևէ փոխհարաբերություն չենք տեսնում Թուրքիայի հետ», - բացատրեց Գ. Սահակյանն ու ավելացրեց, որ «ինչ վերաբերում է բարիդրացիական փոխհարաբերություններին, միայն ժամանակը ցույց կտա, այն էլ այն դեպքում, երբ Թուրքիան ընդունի Ցեղասպանությունը»:

Հանրապետական խմբակցության ղեկավարը վաղ համարեց խոսել ՀՅԴ-ի զբաղեցրած պաշտոնները վերաբաշխելու հարցի մասին: Անդրադառնալով այն տեսակետին, թե Դաշնակցությունն այդպիսով նպատակ ունի Երևանի ավագանու ընտրություններին ձայներ հավաքել, Գ. Սահակյանն ասաց, որ «նման մոտեցումն ինքը ՀՅԴ-ի համար երկրորդական է համարում»:

27.04.2009, 15:54

Aysor.am

Գ. Ծառուկյան. «Կոալիցիան տուժելու է Դաշնակցության դուրս գալուց»

«Կոալիցիան Դաշնակցության դուրս գալուց հետո տուժելու է: Չէ՞ որ այն ինչքան մեծ ու միասնական լինի, այնքան ավելի ուժեղ է», - այսօր ԱԺ-ում լրագրողների հետ զրույցում հայտարարեց «Բարգավաճ Հայաստան» կուսակցության նախագահ Գագիկ Ծառուկյանը:

ԲՀԿ ղեկավարի մեկնաբանմամբ` Հայ հեղափոխական դաշնակցությունը կոալիցիայից դուրս գալու որոշումը կայացրել է «ելնելով իր սկզբունքներից»: Գ. Ծառուկյանը համոզված է, որ ցանկացած ուժ` «լինի դիմություն, թե ընդդիմություն, պետք է որոշումներն ընդունի ի օգուտ մեր ժողովրդի»:

«Կոալիցիա չի նշանակում, որ բոլորս միևնույն հարցերին միանման ենք անդրադառնում և միանման ենք որոշումներ կատարում: Եթե այսօր այս խնդիրն է առաջացել, մենք պետք է ազգովի որոշենք, թե ի՞նչն է օգուտ մեր ժողովրդի համար», - մանրամասնեց Գ. Ծառուկյանը:

Անդրադառնալով թուրքական և ադրբեջանական մամուլում հրատարակված` սահմանի բացմանն առնչվող նախապայմանների վերաբերյալ տեղեկատվություններին` Գ. Ծառուկյանը դրանք «անհեթեթ» անվանեց` հիշեցնելով, որ «երկրի նախագահը բազմաթիվ անգամ ասել է, որ սահմանի բացումը լինելու է առանց նախապայմանների»:

«Ոչ մի նախապայման չկա: Սահմանը բացում են, բայց Ցեղասպանության ճանաչմանն այն չի խանգարում: Եթե որևիցե նախապայման լինի, նույն քայլին կդիմի Բարգավաճ Հայաստան կուսակցությունը», - ընդգծեց Գ. Ծառուկյանը:

ԲՀԿ նախագահի կարծիքով` եթե «առանց նախապայմանի հնարավոր է, որ ճանապարհը բացվի, մենք պետք է համաձայնվենք»: Միևնույն ժամանակ Գ. Ծառուկյանը համոզված է, որ «սա խաղ է, և Թուրքիան առանց նախապայմանի սահմանը չի բացի»: Առանց նախապայմանների սահմանի բացման շուրջ ծավալված խաղը, ըստ Գ. Ծառուկյանի, «ի օգուտ Հայաստանի է, քանի որ այն կօգնի Ցեղասպանության և ԼՂ Հանրապետության միջազգային ճանաչմանը»:

«Եթե մենք այդ հարցը լուծում ենք առանց նախապայմանների, մենք ոչինչ չենք կորցնում: Եթե մենք այսօր կարող ենք զբաղվել Ցեղասպանության ճանաչմամբ, եթե Ղարաբաղը կարող է միջազգային ճանաչում ունենալ, դա միայն լավ է», - բացատրեց Գ. Ծառուկյանն ու հավելեց, որ սահմանի բացմամբ թուրք հասարակությունը, ում «արգելված է արտասանել Ցեղասպանություն բառը, վերջապես հնարավորություն կունենա ճանաչելու ճշմարտությունը` իրենց պապերի կատարածը»:

Որպես ապացույց սահմանն առանց նախապայմանների բացելու իր համոզման` Գ. Ծառուկյանը նշեց, որ նպատակ ունի Ղարաբաղում մարզահամալիր կառուցել և «երբեք ռիսկի չի ենթարկի 2 միլիոն դոլարը»:

ԲՀԿ ղեկավարը նաև անդրադարձավ այն կարծիքներին, թե ՀՅԴ-ն նման քայլի է դիմել Երևանի ավագանու ընտրություններում ավելի շատ ձայներ հավաքելու համար: Գ. Ծառուկյանն անհիմն համարեց նման մոտեցումը, քանի որ, նրա խոսքերի համաձայն, Դաշնակցությունն ունի իր հիմնական ձայները` «դրանք պապական ձայներ են` 10-15 տոկոս»:

27.04.2009, 14:39

Aysor.am

«Հայ-թուրքական հայտարարությունը մարտահրավեր է»

«Տխուր եմ, քանի որ հանցագործի դիվանագիտությունը հաղթեց: Քաղաքակիրթ աշխարհը, խոսելով հայ-թուրքական բարիդրացիական հարաբերությունների մասին, հավասարության նշան է դնում, և դա արվում է Հայաստանի մեղքով», - հայտարարեց ԱԻՄ նախագահ Պարույր Հայրիկյանը` անդրադառնալով Հայաստանի և Թուրքիայի ԱԳ նախարարությունների տարածած համատեղ հայտարարությանը:

Ըստ Պ. Հայրիկյանի` Թուրքիան «մեզ հետ հարաբերությունները սկսում է նախապայմաններով և առաջին նախապայմանն է Կարսի պայմանագրի ճանաչումը»: Մյուս պայմանը, որին անդրադարձավ Պ. Հայրիկյանը, Թուրքիայի կողմից ԼՂ հիմանահարցի կարգավորումն է:

«Երբ Թուրքիան ասում է Հայաստանին, որ դուք պետք է Արցախի հողերը վերադարձնեք, Հայաստանի արժանապատիվ նախագահը պիտի ասեր` դեմ չենք, բայց այդ դեպքում պետք է առաջարկեր Թուրքիային վերադարձնել 1920 թ-ին մեզանից վերցրած Կարսն ու Արդահանը», - նշեց Պ. Հայրիկյանն ու մանրամասնեց. «Բայց ճիշտ կլինի, որ ոչ թե Կարսն ու Արդահանը վերադարձնեք, այլ՝ Սևրի պայմանագրով նախատեսված հողերը: Այդ դեպքում կտեսնեք, թե ինչպես կփակվի թուրքի բերանը»:

Ըստ Պ. Հայրիկյանի, նման հուշագիր ստորագրելով` հայ-թուրքական հարաբերությունների բարելավման գործընթացում Հայաստանը ոչինչ չշահեց, «փոխարենը մեզ ստորացրին և հավասարեցրին հանցագործի հետ»:

Ասուլիսին ներկա մյուս բանախոս «Նորավանք» գիտակրթական հիմնադրամի տնօրեն Գագիկ Հարությունյանը, խոսելով հայ-թուրքական համատեղ հայտարարության դրական և բացասական կողմերի մասին, հայտնեց, որ ցանկացած պայմանագիր Թուրքիայի նման պետության հետ, որն, ըստ «մեր ազգային ռազմավարության փաստաթղթի, հանդիսանում է մեր հիմնական թշնամիներից մեկը, մարտահրավեր է»:

«Միևնույն ժամանակ այդ մարտահրավերն ունի և´ իր հնարավորությունները, և´ իր վտանգները», - ընդգծեց Գ. Հարությունյանը և որպես վտանգ նշեց Թուրքիայի` մոտ մեկ տրիլիոն դոլարի ՀՆԱ, 70 միլիոն բնակչություն, բավական զարգացած տնտեսություն ունենալը և «քաղաքակրթորեն մեզ դեմ թշնամաբար տրամադրված պետություն լինելը»:

25.04.2009, 16:28

Aysor.am

«Ցեղասպանությունը»` ԱՄՆ-ի համար խաղաքարտ

«Եթե ցինիզմ չասենք, ապա Օբաման «Մեծ Եղեռն» բառերն ասելով, այն երկրորդ կարգի Ցեղասպանություն որակեց», - լրագրողների հետ հանդիպման ընթացքում հայտնեց «Նորավանք» գիտակրթական հիմնադրամի տնօրեն Գագիկ Հարությունյանը` մեկնաբանելով ԱՄՆ նախագահ Բարաք Օբամայի Հայոց Ցեղասպանությանը վերաբերող ելույթը:

Գ. Հարությունյանի խոսքերի համաձայն` Օբաման, Ցեղասպանությունը կոչելու համար օգտագործելով միջանկյալ անվանում, չընդունեց «Ցեղասպանություն» հասկացողության իրավաբանական եզրը: Այս հանգամանքը «սպասելի» համարելով` հիմնադրամի տնօրենը նշեց, որ ԱՄՆ-ի նախագահների կողմից «Ցեղասպանություն» բառը բազմիցս օգտագործվել է Թուրքիայի հետ բանակցություններում:

«Դեռ Բուշի ժամանակից Ցեղասպանության խնդիրը բազմիցս շահարկվել է ԱՄՆ-Թուրքիա բանակցությունների շրջանակում, մասնավորապես կախված քրդական խնդրի հետ, և, կարծես դարձել է մի խաղաքարտ, որը երբեմն օգտագործվում է, որոշակի դիվիդենտներ ստանալու համար», - մանրամասնեց Գ. Հարությունյանը:

Նա համոզված է, որ նույնը շարունակվում է այժմ, բայց «այսօր, ավելին քան նախկինում, Ցեղասպանության գործոնն ավելի է կարևորվում ԱՄՆ-Թուրքիա և ընդհանրապես Թուրքիա-Եվրոպա հարաբերություններում»:

Ասուլիսին ներկա ԱԻՄ առաջնորդ Պարույր Հայրիկյանը, անդրադառնալով Բ. Օբամայի երեկվա ելույթին, իր հերթին ասաց, որ «Օբաման իր ելույթով միայն հայտնեց` ես մնում եմ իմ համոզմունքին, ես իմ տեսակետը չեմ փոխել»:

Այն, որ ԱՄՆ նախագահը «Ցեղասպանություն» բառը չարտասանեց, Պ. Հայրիկյանին այնքան էլ չի մտահոգում, քանի որ «Ցեղասպանության» փաստը բազմաթիվ երկրներ արդեն ընդունել են: Նա ընդգծեց, որ փոխարենը «բավական տխրում է հայ-թուրքական` այսօրվա ձևաչափը ստացած հարաբերությունների համար»:

25.04.2009, 15:39

Aysor.am

«Դաշնակցությունն աթոռից երբեք չի հրաժարվի»

«Դաշնակցությունն աթոռից երբեք չի հրաժարվի, քանի որ Դաշնակցությունը հայրենիքից է հրաժարվել աթոռի համար», - հայտարարեց ԱԻՄ ղեկավար Պարույր Հայրիկյանը օրերս Հայ հեղափոխանական դաշնակցության (ՀՅԴ) տարածած հայտարարության վերաբերյալ:

Հիշեցնենք, որ ՀՅԴ հայտարարության համաձայն` Դաշնակցությունը կարող է դուրս գալ իշխանական կոալիցիայից: ՀՅԴ հայտարարությունը տարածվեց Հայաստանի և Թուրքիայի ԱԳ նախարարությունների ապրիլի 23-ին համատեղ հայտարարությունից հետո:

Պ. Հայրիկյանը ասաց, որ «երանի, թե այս անգամ Դաշնակցության հարցում սխալվի», սակայն հիշեցրեց, որ Դաշնակցությունը մեր ազգի համար վճռորոշ պահերին միշտ էլ հանդես է եկել ի օգուտ «աթոռի»:

«Որպես մասնակիցը 1988-1990 թթ-ի իրադարձությունների` կարող եմ ամենայն պատասխանատվությամբ վկայել, որ մեր ազգի համար ամենավճռական փուլում, «Ազատ, անկախ Հայատան, մահ կամ անկախություն» ասող այդ նույն Դաշնակցությունը նույնիսկ դեմ էր անկախությանը», - հայտնեց Պ. Հայրիկյանը:

Նա հիշեցրեց նաև, որ նույնը կատարվել է 1920 թ-ին, երբ բոլշևիկները Դաշնակցությանը «խոստացել են երկու աթոռ` Հայաստանի փոխարեն»:

«Մեր ազգի հերոս Դրոն 1920 թ-ին իր ստորագրությամբ երկիրը տվել է բոլշևիկներին, իսկ ինքը գնացել է Մոսկվա, կյանք է վայելել, երբ հայ բոլոր սպաներին այստեղ կոտորել են», - նշեց ԱԻՄ ղեկավարն` ընդգծելով, որ «Մահ կամ ազատ Հայաստան, եկ փախչենք արտասահման»-ն է եղել 1920 թ-ին ՀՅԴ կարգախոսը: Հայրիկյանը նաև հավելեց, որ «70 տարի մենք անկախություն չենք ունեցել, քանի որ Դաշնակցությունը մի հոգու չզոհաբերեց անկախության համար»:

«Դաշնակցությունը եղել է, մնում է և, երևի, դեռ երկար կմնա պոռոտախոսների կուսակցություն», - ամփոփելով իր խոսքը` հայտարարեց Պ. Հայրիկյանն ու ավելացրեց, որ «նրանք աթոռը թողնողը չեն, քանի որ առանց աթոռի չկան»:

25.04.2009, 14:54

Aysor.am

Էջմիածնի բնակիչները հարգանքի տուրք են մատուցում

Վաղ առավոտից Էջմիածնի բնակիչներն իրենց հարգանքի տուրքն են մատուցում Հայոց Մեծ Եղեռնի զոհերի հիշատակին` ծաղիկներ ու ծաղկեպսակներ դնելով Էջմիածնի Կոմիտասի անվան հրապարակում հայոց մեծանուն վարդապետ, Հայոց ցեղասպանության խորհրդանիշը դարձած Կոմիտասի արձանի մոտ:

Էջմիածնի, ինչպես նաև շրջակա ավանների ու գյուղերի բնակիչները, իրենց հարգանքի տուրքը մատուցելու համար ծաղիկներ են դնում ոչ միայն Կոմիտաս վարդապետի արձանի մոտ, այլև Մայր Աթոռ Սուրբ Էջմիածնի բակում գտնվող Եղեռնի 50-ամյա տարելիցի կապակցությամբ կառուցված հուշահամալիր կոթողի մոտ:

Էջմիածնի քաղաքապետարանի, մի շարք կազմակերպությունների ու անհատների կողմից դրված ծաղկեպսակների շարքը րոպե առ րոպե ավելանում է. վաղ առավոտվանից խումբ-խումբ մարդիկ ծաղիկներով շարժվում են դեպի հրապարակ և Մար Աթոռ Ս. Էջմիածնի տաճար:

Նշենք, որ այսօր Հայ առաքելական բոլոր եկեղեցիներում, այդ թվում նաև Մայր Աթոռ Ս. Էջմիածնում, զոհերի հիշատակին մատուցվում է Ս. Պատարագ և կատարվում է հոգեհանգստյան կարգ:

24.04.2009, 12:03

Aysor.am

Հայ-թուրքական հարաբերություններն այս օրերին չեն մեկնաբանվի

Կեսգիշերին Հայաստանի ու Թուրքիայի ԱԳ նախարարությունների և Շվեյցարիայի ԱԳ դաշնային դեպարտամենտի տարածած համատեղ հայտարարության վերաբերյալ լրագրողները մեկնաբանություններ խնդրեցին Հայոց Ցեղասպանության թանգարան-ինստիտուտի տնօրեն Հայկ Դեմոյանից:

«Քանի որ իմ կարգավիճակը շատ խոցելի է, այս երկու օրը ես ձեռնպահ եմ մնում ամեն տեսակի քաղաքական բնույթի հայտարարություններից»,- ի պատասխան հայտնեց տնօրենը` չմեկնաբանելով նաև, թե հայտարարությունը հասարակության շրջանում ի՞նչ արձագանք կարող է գտնել, երբ այն հրապարակվում է Հայոց ցեղասպանության տարելիցի նախօրեին:

Այնուամենայնիվ, Հ. Դեմոյանը նշեց, որ լինելով «ինչ-որ առումով նաև վերլուծաբան, մեծ սիրով կկիսվի իր մտորումների մասին ապրիլի 25-ից հետո»:

23.04.2009, 20:04

Aysor.am

Ցուցադրվում են Ցեղասպանությունը պատկերող բնօրինակ լուսանկարները

«Ներկայացված լուսանկարները բնօրինակներն են, որոնք ձեռք են բերվել տարբեր աղբյուրներից և ներկայացնում են տեսարաններ` ինչպես սպանված հայերի, այնպես էլ տեղահանության ճանապարհների և հայ գաղթականների լուսանկարներ»,- հայտնեց Հայոց ցեղասպանության թանգարան-ինստիտուտի թանգարանային գծով փոխտնօրեն Արփինե Բաբլումյանը:

Տեղեկացնենք, որ Հայոց ցեղասպանության թանգարան-ինստիտուտում վավերագիր օրիգինալ լուսանկարները ցուցադրության են ներկայացված 2-3 օրով, որոնք թանգարանի կողմից ձեռք են բերվել վերջին 1 տարվա ընթացքում:

Նշենք նաև, որ Հայոց ցեղասպանություն թանգարան-ինստիտուտի ջանքերով, բոլորովին հայտնաբերվել և թվայնացվել է շուրջ 250 բացառիկ լուսանկարների օրիգինալ ապակե կրիչներ, որոնք ներկայացնում են Եղեռնից փրկված հայ տարագրյալներին Սիրիայում հումանիտար օգնություն ցուցաբերելու դրվագներ:

Թանգարանում ցուցադրվում է նաև «Հոգիների աճուրդ» ֆիլմի պահպանված և թանգարանի կողմից ձեռք բերված 20 րոպեն: Ա. Բաբլումյանը պատմեց, որ ֆիլմը նկարահանված է Խարբերդի մարզի Չմշկածակ քաղաքի կոտորածներից փրկված 15-ամյա Արշալույս Մարդիգանյանի պատմությունը ներկայացնող «Խոշտանգված Հայաստան» գրքի հիման վրա:

23.04.2009, 19:48

Aysor.am

Թանգարանը համալրվել է Ցեղասպանության մասին պատմող եզակի գրքերով

Այս տարի փետրվարին, ՀՀ նախագահ Սերժ Սարգսյանի աջակցությամբ, Հայոց ցեղասպանության թանգարան-ինստիտուտը կարողացել է ձեռք բերել շուրջ հարյուր արժեքավոր ու հազվագյուտ գրքեր, որոնք կարևոր սկզբնաղբյուրային արժեք են ներկայացնում Հայոց ցեղասպանության ուսումնասիրման գործում: Այս մասին լրագրողներին հայտնեց թանգարանի տնօրեն Հայկ Դեմոյանը:

Տնօրենի խոսքերով, Հայոց ցեղասպանության հիմնախնդրով զբաղվող հաստատության համար շատ կարևոր է ունենալ հարուստ գրադարան, հնատիպ գրականությամբ և դրանց առաջին հրատարակություններով: Այդ պատճառով հետևողականորեն համալրվում է գրադարանային հավաքածուն: Ձեռքբերված գրքերի մի մասը ներմուծվել է թանգարանի մշտական ցուցադրության մեջ:

«Միսիոները, ով ականատես է եղել ցեղասպանությանը, տնային պայմաններում, ձեռքի մամլիչով իր հուշերն է տպագրել հարյուր օրինակով, որոնք այսօր իրենցից թանգարանային արժեք են ներկայացնում»,- ներկայացնելով ձեռքբերված մի քանի գրքերի պատմությունը` նշեց Հ. Դեմոյանը:

Նախագահի աջակցությամբ ձեռքբերված գրքերը հիմնականում անգլալեզու են, կան ֆրանսերեն, գերմաներեն հրատարակություններ: Դրանք Ցեղասպանությունից շատ կարճ ժամանակ անց են հրատարակվել: Ձեռքբերված գրքերը հիմնականում առաջին հրատարակություններ են, որոնցից շատերը առաջին հրատարակությունից հետո չեն վերահրատարակվել:

Սույն գրքերի մեջ կան այնպիսի հրատարակություններ, որոնք բացառիկ լուսանկարներով ու վկայություններով պատմում են Արևմտյան Հայաստանի տարբեր քաղաքներում հայերի կոտորածների մասին: Ինչպես հայտնեց Հ. Դեմոյանը դրանք ականատեսների օրագրերն են, նրանց հուշերը, վկայությունները:

Թանգարանի գրադարանային բաժինը, ըստ տնօրենի, ունի ցուցադրության տեղի խնդիր: Ինչպես տեղեկացրեց Հ. Դեմոյանը, Կառավարությանը ծրագիր է ներկայացվելու` Ցեղասպանության 100-ամյակին նոր ցուցադրության հարթակ ստանալու համար: Բացի այդ, ծրագիր է մշակվում հազվագույտ արժեք ներկայացնող գրքերը թվայնացնելու ուղղությամբ:

23.04.2009, 17:21

Aysor.am

Թանգարանը մեկ տարում բացառիկ արդյունք է գրանցել

«Մեկ տարվա ընթացքում թանգարանը բացառիկ արդյունք է գրանցել` ինչպես միջազագային լսարանին ներկայացնելու առումով, այնպես էլ թանգարանի գիտական ակտիվության և գիտական ֆոնդերի ու արխիվի համալրման տեսանկյունից», - հայտարարեց Հայոց ցեղասպանություն թանգարան-ինտիտուտի տնօրեն Հայկ Դեմոյանը` ներկայացնելով 2008 թ-ի ապրիլից թանգարանի գործունեության համառոտ հաշվետվությունը:

Ըստ Հ. Դեմոյանի` մեկ տարվա ընթացքում թանգարանը ձեռք է բերել բացառիկ նշանակությամբ օրիգինալ լուսանկարներ, նյութական իրեր, արևմտահայերի գործունեությանն առնչվող նյութեր, որոնք հիմնականում նվիրատվությունների տեսքով են եղել: Նվիրատվություններ կատարվել են ինչպես միսիոներների ընտանիքների անդամների ցանկությամբ, այնպես էլ հայ և այլազգի ահնատների: Խոշոր հավաքածուներ են, վավերագիր նյութեր, ձեռագրեր, նամականի, ինչպես նաև օրիգինալ ձեռագիր-օրագրեր` ականատեսների վկայությամբ:

Թանգարանի տնօրենը տեղեկացրեց նաև, որ գնվել են հարյուրավոր բացառիկ նշանակության թանգարանային նյութեր, որոնք ցուցադրության առայժմ չեն ներկայացվում, փոխարենը մշակվում, պահպանվում են և զետեղվում են թանգարանի ֆոնդերում` հաջորդ տարվանից ստեղծվելիք հայեցակարգային և տեխնիկական նոր լուծումների վրա ստեղծված ցուցադրությանը ներկայացվելու համար:

«10 հազարից ավելի լուսանկար է թվայնացվել, որոնք տեղ են գտնելու ապագա ցուցադրության մեջ», - նշեց Հ. Դեմոյանը` հավելելով, որ ցանկացած թանգարանային նյութ թվայնացվելու է և հասանելի է դառնալու նաև համակրգչի միջոցով:

Տեղեկացնենք, որ թանգարանը այցելուներին հասանելի է Հայոց ցեղասպանություն թանգարան-ինտիտուտի պաշտոնական կայքի (www.genocide-museum.am) միջոցով:

Թանգարանի տնօրենը տեղեկացրեց, որ վերջին մեկ տարվա ընթացքում խորացել են թանգարան-ինստիտուտի կապերը ինչպես հայաստանյան, այնպես էլ Սփյուռքի հայկական գիտական ու կրթական հաստատությունների հետ, կապեր են հաստատվել նաև արտասահմանյան գիտական կենտրոնների, հետազոտողների, տարբեր երկրների բազմաթիվ կրթական հաստատությունների` դպրոցների ու վարժարանների աշակերտության հետ:

23.04.2009, 15:48

Aysor.am

Երկրպագուները հանդես են գալիս երգով, պարով և կոչերով

«Ինգա և Անուշ Արշակյանները նամակներ են ստացել նույնիսկ «Եվրատեսիլին» մասնակցության իրավունք չունեցող երկրներից` Ավստրալիայից և Թայլանդից, ովքեր հետաքրքրված են երգչուհիներով»,- լրագրողների հետ հանդիպման ընթացքում հայտնեց «Եվրատեսիլում» Հայաստանը ներկայացնող Ինգա և Անուշ Արշակյանների հայաստանյան PR-ով զբաղվող Աննա Ավանեսյանը:

Ինգա և Անուշ Արշակյանների միջազգային գծով PR-ով զբաղվող Իզաբելլա Մանասարյանը մանրամասնեց` տեղեկացնելով, որ եվրոպական մի շարք երկրների հետ, մասնավորապես Պորտուգալիայի, Մալթայի, Ուկրաինայի, Ռուսաստանի, Բելգիայի, Կիպրոսի, Մոլդովայի, Լիտվայի, կան փոխադարձ առաջխաղացման պայմանավորվածություններ:

Ի. Մանասարյանը տեղեկացրեց նաև, որ երգչուհիները բազմաթիվ արձագանքներ են ստանում աշխարհի տարբեր երկրներում գտնվող իրենց երկրպագուներից, սփյուռքահայերից:

«Նույնիսկ երկրպագուներից մեկը գերմաներեն կայք է բացել Ինգա և Անուշ Արշակյանների անունով և ակտիվ վարում է այդ կայքը` այնտեղ տեղադրելով երգչուհիներին վերաբերող բոլոր նորությունները»,- մանրամասնեց Ի. Մանասարյանը, ով նշեց նաև, որ երկրպագուների կողմից երգչուհիներին սատարելու բազմաթիվ առաջարկություններ են ստանում:

«Հետաքրքիր է նաև, որ մեզ տեսաձայնագրություններ են ուղարկում այն մասին, թե ինչպես են տարբեր մարդիկ պարում տեսահոլովակի պարը»,- ընդգծեց Ի. Մանասարյանը, ով տեղեկացրեց նաև, որ կոչերի, ինչպես նաև` երկրպագուների կողմից ուղարկվող երգի ռեմիքսների լավագույն տարբերակները կհրապարակվեն:

Երգչուհիների ձայնասկավառակներն են խնդրում նաև տարբեր երկրների ԴիՋեյ-ները` ակումբներում և ռադիոալիքներով այն հեռարձակելու համար: Հենց բազմակողմանի տարվող աշխատանքների շնորհիվ, ըստ Ինգա և Անուշ Արշակյանների, համերգներին հանդիսատեսը «մեզ հետ հավասար երգում է երգը և փորձում պարել տեսահոլովակի պարը»:

Երգչուհիների PR-ով զբաղվող մասնագետները նաև նշեցին, որ երգչուհիները գրանցված են գրեթե բոլոր սոցիալական ցանցերում և, իրենց հետ աշխատողների օգնությամբ, պատասխանում են բոլոր երկրպագուների հարցերին:

22.04.2009, 20:27

Aysor.am

Ինգան և Անուշը մեկնում են Մոսկվա` վերջին շտրիխները կատարելու

«Եվրոպացի հանդիսատեսի կողմից բավականին լավ է ընդունվում «Ջան-ջան» երգը, քանի որ նոր և հետաքրքիր է նրանց համար»,- հայտնեց երգչուհի Ինգա Արշակյանը` Մոսկվա մեկնելուց առաջ վերջին ասուլիսի ժամանակ:

Կազմակերպիչները տեղեկացրեցին, որ Ինգա և Անուշ Արշակյանները ապրիլի 25-ին մեկնում են Մոսկվա` մայիսի 12-ին «Եվրատեսիլի» կիսաեզրափակիչ համերգից առաջ նախապատրաստական աշխատանքների վերջին «շտրիխները» ավարտին հասցնելու համար:

Երգչուհիների խոսքերով, երգը բավական լավ ճանաչում է գտել Եվրոպայում: Իրենց հետ աշխատող թիմի շնորհիվ այն հասանելի է դարձել բոլորին` հեռուստառադիո հեռարձակումների և ինտերնետի միջոցով:

Բացի այդ, Ինգա և Անուշ Արշակյանները համերգներով հանդես են եկել Մոսկվայում, Փարիզում, Հոլանդիայի Ամստերդամ և Ալմելո քաղաքներում, բազմաթիվ հարցազրույցներ են ունեցել տարբեր երկրների լրատվամիջոցների հետ:

Ինգա և Անուշ Արշակյանները խոսեցին նաև Եվրատեսիլին ներկայացվելիք կերպարների մասին` ասելով, որ թե´ կերպարները, թե´ պարային համարը ունենալու են հայկական տարրեր, սակայն այն, ինչ լինելու է բեմում, լինելու է «թարմ և նոր»:

«Շոուն շատ հետաքրքիր կլինի եվրոպացի հանդիսատեսի համար: Այն նոր, մեզ համար շատ ծանոթ և շատ երազկոտ կերպար է լինելու»,- վստահեցրեցին երգչուհիները և հավելեցին, որ բեմում իրենց հետ աշխատելու են միայն 4 պարուհիներ, իսկ «ոկալի որակի ողջ պատասխանատվությունը կրելու են միայն իրենք»:

Նշենք, որ Հայաստանը ներկայացնող երգչուհիները համագործակցում են մոսկովյան «Ֆռեշ Արտ» («Fռesh Art») դիզայներական ընկերության հետ: Հենց ընկերության կողմից էլ մշակվել են քույրերի բեմական կերպարները և Եվրատեսիլին ներկայացվելիք բեմական համարը:

22.04.2009, 18:00

Aysor.am

ՕԵԿ-ը «լավ» ծրագիր է ներկայացրել հանուն … Երևանի

«Մեր կուսակցությունը մասնակցում է ընտրություններին հանուն վաղվա բարեկեցիկ, մաքուր, արդար և գեղեցիկ Երևանի»,- հայտարարեց «Օրինաց երկիր» կուսակցության անդամ, «Օրինաց երկիր» խմբակցության քարտուղար, պատգամավոր Արծրունի Աղաջանյանը:

Չնայած այն հանգամանքին, որ Ա. Աղաջանյանի կարծիքով, Հայաստանում ընտրությունները լարված են անցնում, նա հույս հայտնեց, որ «ինչքան կազմակերպված անցկացվեն ընտրությունները, ինչքան լավ տրվեն առկա խնդիրների լուծումները, այնքան Երևանը դրական ազդեցություն կունենա և´ աշխարհի, և´ Հայաստանի մարզերի քաղաքների վրա»:

Նախընտրական քարոզարշավից առաջ չցանկանալով մանրամասնություններ հայտնել ՕԵԿ նախընտրական ծրագրից, պատգամավորը տեղեկացրեց, որ կուսակցությունը «պատրաստել է լավ ծրագիր, որը կընդունվի երևանցիների կողմից»:

Ասուլիսին ներկա ՕԵԿ ավագանու թեկնածու Ջուլիետա Թադևոսյանը, նշելով, որ Հայաստանի հասարակությունը չափազանց քաղաքականացված է, հույս հայտնեց, որ «ընտրողը կառաջնորդվի կուսակցությունների ներկայացրած ծրագրերով և թեկնածուների գործունեությամբ, նրանց ողջ կեցվածքով»:

Թեկնածուները տեղեկացրեցին, որ նկատում են ընտրողների քանակի աճ: Ըստ Ա. Աղաջանյանի, եթե նախագահական ընտրություններից հետո «շատերը չէին հասկանում ՕԵԿ-ի կատարած քայլը (նկատի ունի իշխանական կոալիցիա կազմելը), ապա այսօր դրական են գնահատում դա»:

«Համայնքի ընտրություններին մասնակցող բոլոր քաղաքական ուժերն էլ ցանկանում են ճշգրտել` ինչքանո՞վ է իրենց վարած քաղաքականությունն ընկալելի ընտրողների համար»,- մանրամասնեց Ա. Աղաջանյանը` ընդգծելով, որ նկատելի տեղաշաժը կորոշակիանա ընտրություններից հետո:

22.04.2009, 19:14

Aysor.am

ՕԵԿ. «Կոալիցիայում միմյանց նկատմամբ հավատ է ձևավորվել»

«Հայաստանում կան բոլոր նախադրյալները, որպեսզի Հայաստանը ֆինանսատնտեսական ճգնաժամի պայմաններում կարողանա դիմադրել բոլոր մարտահրավերներին և ճգնաժամից դուրս գա և´ քաղաքականապես, և´ տնտեսապես կայացած և հզորացած»,- հայտարարեց «Օրինաց երկիր» խմբակցության քարտուղար, պատգամավոր Արծրունի Աղաջանյանը:

Հակիրճ ներկայացնելով ՕԵԿ-ի վարած մեկամյա գործունեությունը` որպես կոալիցիոն իշխանության անդամ, Ա. Աղաջանյանը «բարձր գնահատեց կատարված քայլերը» և նշեց, որ մեկ տարվա ընթացքում աշխատել են «վստահության մթնոլորտում և ձևավորել են միմյանց նկատմամբ հավատ»:

ՕԵԿ անդամը կարևորեց նաև ԵԽԽՎ-ում Հայաստանի վերաբերյալ քննարկվող բանաձևերը: Լինելով ԵԽԽՎ-ում Հայաստանի պատվիրակության անդամ` Ա. Աղաջանյանը նշեց, որ հունվարյան նստաշրջանում Հայաստանի մասին բոլոր զեկույցներում ասվում էր, որ «չի կարելի և անիմաստ է Հայաստանի պատվիրակությանը` ներկայացուցչական մարմնին, զրկել ձայնի իրավունքից»:

«Առավել ևս, երբ այն հարցերը, որոնք քննարկվում էին, գործադիր իշխանության խնդիրներն էին և ոչ թե ԵԽԽՎ-ում Հայաստանի պատվիրակության թերացումները, բացի այդ` ԵԽ-ի կողմից բարձրացված խնդիրները լուծման ընթացքի մեջ էին»,- մանրամասնեց պատգամավորը:

Անդրադառնալով հայ-ադրբեջանական հարաբերություններին` մասնավորապես ԼՂ հակամարտության խնդրին, պատգամավորը հայտնեց, որ ՕԵԿ-ը «միանշանակ սատարում է ՀՀ նախագահ Սերժ Սարգսյանի դիրքորոշմանը` գտնելով, որ պետք է պաշտպանվի ԼՂՀ անվտանգությունը, ԼՂՀ-ն չի կարող լինել Ադրբեջնի կազմում, և ԼՂ հիմնահարցի հետ կապված բանակցությունները պետք է ընդանան ԼՂՀ ներկայացուցիչների մասնակցությամբ»:

Հայ-թուրքական հարաբերությունների վերաբերյալ խոսելիս` Ա. Աղաջանյանն ընդգծեց, որ ՕԵԿ-ը «կողմ է սահմանի բացմանը, նաև այն նկատառումով, որ Հայաստանի դիրքն այնպիսին է, որ չի կարող լինել շրջափակման մեջ և պետք է հարաբերություններ ունենալ հարևան բոլոր երկրների հետ»:

22.04.2009, 18:10

Aysor.am

Ճարտարապետ. «Երևանն ունի թերությունները վերացնելու կարողություն»

«Ես կարծում եմ, որ շատ խորհրդանշական է, որ Սփյուռքի նախարարության կողմից նախաձեռնված առաջին համաժողովն անցկացվում է հայ ճարտարապետների մասնակցությամբ: Խորհրդանշական է, որովհետև հայ ճարտարապետությունը միշտ էլ եղել է հայտնի, և պատահական չէ, որ այօր Հայաստանում են 15 երկրներից հայազգի լավագույն մասնագետները, որպեսզի քննարկեն արդի ճարտարապետության խնդիրներն ու ազգային ճարտարապետության զարգացման ուղիները»,- ողջույնի խոսքում ասաց ՀՀ ԱԺ փոխնախագահ Հրայր Կարապետյանը, ով հանդիպեց «Հայկական ճարտարապետությունը և 21-րդ դարը» ճարտարապետների համահայկական համաժողովի սփյուռքահայ մասնակիցների հետ:

Հ. Կարապետյանը համագումարի մասնակիցներին մաղթեց հաջողություններ` կարևորելով հայ ճարտարապետության դերն ու զարգացումը: Նշենք, որ հանդիպմանը ներկ էր նաև ՀՀ Սփյուռքի նախարար Հրանուշ Հակոբյանը: Հիշեցնենք, որ համագումարի մասնակիցներն առավոտյան հանդիպում են ունեցել ՀՀ վարչապետ Տ. Սարգսյանի հետ:

Տեղեկացնենք, որ համագումարի մասնակիցները ևս բարձր են գնահատում նման նախաձեռնությունը` ընդգծելով, որ այն «համագործակցելու, փորձ փոխանակելու և սովորելու հիանալի առիթ է»:

«Վերջին տարիներին մեծ ուժ դրվեց քաղաքաշինության մեջ և հիմա պետք է մտածենք` ինչպե՞ս այն շարունակել: Դրա համար է, որ մենք, շփվելով ճարտարապետների հետ, մասնակցելու ենք քաղաքաշինությանը` ավելի լավ ապագա ստեղծելու նպատակով»,- հայտնեց Ֆրանսիայի հայ ճարտարապետների և հեղինակողների միության հիմնադիր անդամ Ալեն Դարոնյանը:

Ա. Դարոնյանը քաղաքաշինության թերություններից չխոսեց` դրանք աննշան համարելով: Միայն ընդգծեց, որ «Երևանը շատ ուժեղ քաղաք է և ունի թերությունները վերացնելու կարողություն, որոնք չեն կարող այսօր վնասել Երևանին»:

21.04.2009, 18:21

Aysor.am

«Արծվիկ Մինասյանն իրավունք չունի մասնակցելու ընտրությանը»

«Արծվիկ Մինասյանն այսօր անօրինական է առաջադրված և նա ընդհանրապես իրավունք չունի մասնակցելու ընտրությանը»,- հայտարարեց ՀԱԿ ավագանու թեկնածու Ռուբեն Թորոսյանը:

Նշենք, որ հանդիպման նպատակն էր տեղեկացնել, որ նախընտրական խախտումների վերաբերյալ ՀԱԿ-ը դիմում է ներկայացրել Սահմանադրական դատարան: Ռ. Թորոսյանի ներկայացմամբ` «ընտրական իրավունքի խախտում» է նաև ՀՅԴ նախընտրական ցուցակը գլխավորող Արծվիկ Մինասյանի` թեկնածու առաջադրվելը:

«Արծվիկ Մինասյանը հաշվառված էր Բաղրամյանի Շեմիկ գյուղում, հետո գնում է ոստիկանություն տեղեկանք ստանալու, ոստիկանությունն էլ չի տալիս տեղեկանք Երևանում 3 տարվա բնակության մասին: Նա էլ դիմում է Վարչական դատարան, որտեղի դատավորն ասում է` ոստիկանությունը սխալ է, գնացեք, ձեր դիմումը վերցրեք»,- մանրամասնում է Ռ. Թորոսյանը:

Նրա խոսքերով, «Շենիկ գյուղում հաշվառված Արծվիկ Մինասյանը վերցնում է այդ տեղեկանքը և գալիս, առաջադրվում է ու ցանկանում է դառնալ Երևանի քաղաքապետ` չունենալով հաշվառում Երևան քաղաքում»: Ռ. Թորոսյանը նշում է, որ ՀՀ Ընտրական օրենսգրքի համաձայն` Երևան քաղաքում ավագանու թեկնածու կարող է առաջարվել այն անձը, ով Երևանի 3 տարվա բնակիչ է և ունի ՏԻՄ ընտրությունների համար սահմանված իրավունք»:

«Այդ իրավունքը հաշվառում է պահանջում, իսկ Արծվիկ Մինասյանը չունի հաշվառում»,- ընդգծեց Ռ. Թորոսյանն ու հավելեց, որ, իբր Ա. Մինասյանը, հարցազրույցներից մեկում ասել է, որ «հիմա ես գնացել եմ հաշվառման եմ կանգնել, որպեսզի ընտրությանը մասնակցեմ»:

Ի հակասություն այս «բացահայտ» խախտման` ՀԱԿ թեկնածուն ներկայացրեց «Բարգավաճ Հայաստան» կուսակցության ղեկավարի հայտարարությունն այն մասին, որ Գագիկ Ծառուկյանը չի մասնակցում ընտրություններին և «չի առաջադրվում առաջին հորիզոնականում, որովհետև չունի Երևանի գրանցում»:

Ռ. Թորոսյանը համոզված է, որ ԿԸՀ կա´մ չի տիրապետում, կա´մ չի ցանկանում տիրապետել օրենքին, որ «թույլ է տալիս այսպիսի խախտումներ»:

21.04.2009, 16:57

Aysor.am

ՀԱԿ-ը դիմել է Սահմանադրական դատարան

«Մենք գտնում ենք, որ Երևան քաղաքի բնակիչն իրավունք ունի ընտրությանը մասնակցել միայն այն պարագայում, երբ իր անձնագրում ունի հաշվառում, իսկ Կենտրոնական ընտրական հանձնաժողովը գտնում է, որ հաշվառում չունեցող քաղաքացիներն իրավունք ունեն ընտրություններից առաջ դիմել համայնքի ղեկավարին կամ լիազոր անձին և մասնակցել ընտրություններին»,- լրագրողների հետ հանդիպման ընթացքում հայտարարեց ՀԱԿ նախընտրական դաշինքի լիազորված ներկայացուցիչ Պատվական Հովակիմյանը, ով տեղեկացրեց, որ այս հակասությունը շտկելու և սահմանադրական խախտումը վերացնելու նպատակով ՀԱԿ-ը դիմել է Սահմանադրական դատարան:

Պ.Հովակիմյանը տեղեկացրեց նաև, որ իրենք սահմանադրական խախտման և ընտրություններից առաջ իրենց կողմից արձանագրած մի շարք խախտումների վերաբերյալ մինչ այդ դիմել են Վարչական դատարան, որտեղից մերժում են ստացել:

Ասուլիսին ներկա ՀԱԿ ավագանու թեկնածու Ռուբեն Թորոսյանը նշեց, որ հարցը վերաբերում է ՀՀ Ընտրական օրենսգրքի 2-րդ հոդվածի խախտմանը, որում մասնավորապես ասվում է, որ «… ՏԻՄ ընտրությունների ժամանակ ընտրության իրավունք ունեն նաև համապատասխան համայնքում առնվազն մեկ տարվա հաշվառում ունեցող և փաստացի բնակվող յուրաքանչյուր ոք»:

«Հոդվածի վերաբերյալ ԿԸՀ տվել է պարզաբանում, ըստ որի` Հայաստանի ցանկացած ընտրող իրավունք ունի գալ և քվեարկել Երևան քաղաքում, ինչը բացատրվում է նրանով, որ ընտրության հայտ կարող են ներկայացնել նաև հաշվառում չունեցող քաղաքացիները», - մանրամասնեց Ռ. Թորոսյանը:

Բանախոսների կարծիքով, ԿԸՀ-ը «պարտավորություններից ազատել է հաշվառում չունեցող քաղաքացիներին, սակայն նրանց տվել է ընտրելու իրավունք, ինչը ոտնահարում է Երևանի քաղաքցիների ընտրելու իրավունքը»:

Բացի այս, ՀԱԿ ներկայացուցիչները նշեցին, որ Սահմանադրական դատարան են դիմելու նաև այլ ընտրախախտումների վերաբերյալ: Ըստ բանախոսների, մինչ նախընտրական քարոզչության մեկնարկը, «քարոզչություն է ծավալվում Հայաստանի Հանրապետական կուսակցության թեկնածուի օգտին, ՀՀԿ-ի կողմից դպրոցներում, պետական կառույցներում, զորամասերում 100 տոկոսանոց ցուցակներ են իջեցվում, իսկ քաղաքի տարբեր վայրերում ստեղծվում են նախընտրական շտաբեր, որոնք օրենքի բացահայտ խախտման օրինակներ են»:

21.04.2009, 15:42

Aysor.am

Մեկտեղվեցին «Հայ լուսանկարիչներ» պատկերագիրքն ու ցուցահանդեսը

«Մենք այսօր խորին շնորհակալություն պետք է հայտնենք Վահան Քոչարին` այն բանի համար, որ նա ստեղծել է «Հայ լուսանկարիչներ» պատկերագիրք, իսկ այդ պատկերագիրքը և´ հանրագիտարան է, և´ տեղեկագիրք, և´ ինֆորմացիայի լավագույն աղբյուր, որտեղ ներկայացված են 488 հայ լուսանկարիչների գործեր»,- հայտարարեց ՀՀ Սփյուռքի նախարար Հրանուշ Հակոբյանը հայտնի լուսանկարիչ Վահան Քոչարի «Հայ լուսանկարիչներ» բառարանային պատկերագրքի շնորհանդեսի և սփյուռքհայ 15 լուսանկարչների ցուցահանդեսի բացման ժամանակ:

Տեղեկացնենք, որ «Հայ լուսանկարիչներ» պատկերագիրքը լույս է տեսել 2007 թ-ի վերջին` Հայաստանի նախկին վարչապետ Անդրանիկ Մարգարյանի հովանավորությամբ: Գրքում ներառված հայ լուսանկարիչներից 300-ը ներկայացված են իրենց կենսագրականներով և լուսանկարներով, իսկ 180-ի անունները հայտնաբերվել են տարբեր լուսանկարչական կնիքների և ծրարների վրայից:

Սփյուռքի նախարարի խոսքերով` պատկերագիրքը հետաքրքրական է, քանի որ այնտեղ զետեղված են նաև սփյուռքահայերի աշխատանքները, և այն հայրենիք-սփյուռք գործածության փայլուն մի հուշամատյան է: Ըստ Հ. Հակոբյանի, Քոչարն իրենցից շուտ մտածել է հայկական լուսանկարիչների ցանց ստեղծելու մասին:

«Գրքի շնորհանդեսը և ցուցահանդեսը, որոնք այսօր ներկայացվում են, հորս ցանկություններն են»,- հայտնեց Վահան Քոչարը և տեղեկացրեց, որ գրքի` մի շարք միջազգային ցուցահանդեսներում ներկայացվելը բերել է այն համոզմանը, որ պետք է ստեղծվի գրքի անգլերեն տարբերակը:

Խոսելով Վահան Քոչար անհատականության մասին` Հ. Հակոբյանն ընդգծեց, որ Քոչարը մի մարդ է, ով «իր ամբողջ կյանքը նվիրել է լուսանկարչությանը, ով ժառանգել է իր հոր` լուսանկարիչ Անդրանիկ Քոչարի տաղանդը և շարունակում է նրա գործը»:

Ցուցահնդեսին ներկայացված 15 լուսանկարիչների աշխատանքները վերցված են «Հայ լուսանկարիչներ» պատկերագրքից: Նշենք նաև, որ գրքի շնորհանդեսն ու ցուցահնդեսի բացումը տեղի ունեցավ «Ակադեմիա» պատկերասրահում:

20.04.2009, 20:15

Aysor.am

Ֆրանսահայ դերասանուհուն մտահոգում է «ճիշտը և սերնդափոխությունը»

Ֆրանսահայ դերասանուհի Նորա Արմանին, ով այս տարի Հայաստանում է գլխավորապես Համահայկական թատերական նախագծի շրջանակներում «Առանց վերադարձի իրավունքի» ներկայացումով հանդես գալու համար, բարձր է գնահատում Հայաստանի թատերական կյանքը, դերասանների ու թատերական փառատոնների մակարդակը և, նույնիսկ, տարեց տարի աճ է նկատում:

Նորա Արմանիի կարծիքով, այն խնդիրները, որոնց մասին Հայաստանում հիշատակվում են, բնորոշ են նաև այլ երկրներին: Նրա խոսքերով, աշխարհում թատրոնը միշտ էլ «ճգնաժամում է և մնում է կինոյի ու հեռուստատեսության աղքատ ընկերը»:

«Այն, ինչ ես տեսել եմ Հայաստանում, ոչնչով հետ չի մնում աշխարհի թատրոններից»,- ընդգծեց ֆրանսահայ դերասանուհին, ով խաղում է աշխարհի շատ երկրների բեմերում:

«Կարևորը շփումն է, իսկ փառատոները ստեղծում են այդ շփումը և արդյունքում հարստանում են և նրանք, ովքեր Հայաստան են եկել արտերկրից, և այստեղի թատերական գործիչները»,- բացատրում է Ն. Արմանին, ում կարծիքով մենք` հայաստանիցիներս, «աճն այնքան լավ չեք նկատում, քանի որ մշտապես ներսից եք դիտում»:

«Միակ մտահոգիչն այն է, որ մարդիկ կարծում են, որ ամենաճիշտն իրենք են: Այս հանգամանքը կա Հայաստանում, և այդ պարագայում չգիտես, թե ինչպե՞ս քեզ պահես, և հենց այդտեղ էլ վերջանում է շփումը»,- խոսելով Հայաստանում արվեստագետին անհանգստացնող խնդիրներից` ասաց Նորա Արմանին:

«Հայաստանում մեկ ուրիշ խնդիր էլ կա վախենալու, այն է, որ մեծերից փոքրեր սերնդային անցումը լավ չի ստացվում, որովհետև որոշ սերունդ կա, որ կարչել է և չի ուզում տեղից շարժվել»,- նշեց դերասանուհին և ընդգծեց. «Պետք է հասկանալ, որ նոր միտքը, նոր մտածելակերպը, նոր աշխատելաոճը շատ կարևոր է»:

20.04.2009, 17:19

Aysor.am

Ֆրանսահայ դերասանուհի Նորա Արմանին Հայաստանում է

«Այս անգամ Հայաստանում եմ Համահայկական թատերական նախագծի շրջանակներում առաջին` «Առանց վերադարձի իրավունքի» ներկայացման մեջ խաղալու համար, որը խաղալու եմ Արմեն Ջիգարխանյանի հետ»,- հայտնեց ֆրանսահայ դերասանուհի Նորա Արմանին լրագրողների հետ հանդիպման ընթացքում:

Տեղեկացնենք, որ «Առանց վերադարձի իրավունքի» ներկայացումը Հայոց Ցեղասպանության թեմայով է: Պիեսը, որի հեղինակն է բելգիահայ բեմադրիչ, դերասանուհի և դրամատուրգ Կարոլին Սաֆարյանը, պատմում է հայ և թուրք հասարակություններում նոր սերնդի ներկայացուցիչների փոխհարաբերություններ մասին:

Դերասանուհին տեղեկացրեց նաև, որ ինքը Հայաստանում է արդեն երկու շաբաթ և այդ ընթացքում մասնակցել է «Արմմոնո» թատերական փառատոնին` ներկայացնելով «Ոգեկոչում Հայաստանի» բեմականացումը, իսկ «Բազմոցին Նորա Արմանիի հետ» ներկայացումը Նորա Արմանին խաղացել է Կապանում:

«Թող ինձանից չնեղանա Երևանի հանդիսատեսը, Կապանի հանդիսատեսը այնքան ջերմությամբ ինձ ընդունեց, որ ես նույնիսկ կատակում եմ` ասելով, որ ես այնքան հարստացած եմ գնալու Հայաստանից, որ ինձ օդանավակայանում բռնելու են և ասելու` ուր ես տանում այսքան հարստությունը»,- կատակում է դերասանուհին:

Նշենք, որ «Առանց վերադարձի իրավունքի» ներկայացման պրեմիերան տեղի է ունենալու ապրիլի 23-ին Հակոբ Պարոնյանի անվան պետական երաժշտական կոմեդիայի թատրոնում:

20.04.2009, 16:38

Aysor.am

ՕԵԿ-ի թեկնածուների նպատակը «պաշտոններ գրավելը չէ»

Երևանի տեղական ինքնակառավարման մարմինների ընտրություներին մասնացությունը «Օրինաց երկիր» կուսակցության ընտրացուցակի երրորդ հորիզոնականը զբաղեցնող տնտեսական գիտությունների դոկտոր Գրեգորի Վահանյանը բացատրեց առաջինը` երևանիցի լինելով, երկրորդը` հայ լինելով, և նպատակն ամփոփեց «մենք ուզում ենք, որ մեր զավակները լավ ապրեն և ուզում ենք իրականացնել մեր նախնիների պատգամները» խոսքերով:

«Մենք ուզում ենք, որ մեր Երևանը լինի ոչ միայն մաքուր և գեղեցիկ, այլև մշակույթի, գիտության ու երիտասարդների քաղաք»,- ընդգծեց Գ. Վահանյանը և ավելացրեց, որ շատ կարևոր է հաշվի առնել այն, ինչ կատարվում է աշխարհում, և ֆինանսատնտեսական ճգնաժամի պայմաններում իրենք ոչ միայն չեն կարող թույլ տալ, որ Երևանի հետ կատարվի այն, ինչ կատարվում է աշխարհի շատ երկրներում, «այլև դիմադրելով պետք է գնանք առաջ` դեպի Արարատ»:

ՕԵԿ ընտրացուցակի երկրորդ հորիզոնականում ներկայացված բժշկական գիտությունների դոկտոր-պրոֆեսոր, առողջապահական գիտությունների թեկնածու Հենրի Բակունցը, լինելով «պրակտիկ բժշկության աշխատող», գտնում է, որ այն խնդիրները, որոնք կուտակվել են առողջապահական համակարգում, հրատապ են և լուծման ենթակա, և, ավագանու անդամ լինելով, նա կարող է հնչացնել այդ խնդիրները և տալ դրանց լուծումները»:

ՕԵԿ ավագանու թեկնածուները լրագրողներին տեղեկացրեցին, որ «մենք նպատակ չունենք պաշտոններ գրավելու, քանի որ աշխատում ենք մեր մասնագիտություններում, ունենք բարձր պաշտոններ»:

«Բայց մեր կուսակցության ծրագիրը բավականին մրցունակ է, գիտատար և պրակտիկ ու կոնկրետ, և մենք ներկայացնում ենք մեր ժողովրդի խնդիրները ու այն ռազմավարական նպատակները, որոնք փորձում ենք իրականացնել»,- մանրամասնեց Գ. Վահանյանը:

Հ. Բակունցի կարծիքով, մեր անհաջողություններից մեկն այն է, որ մարդիկ քաղաքականությունում ներգրավված են` չունենալով «հասարակական կշիռ և ոչ էլ քաղաքական փորձ»:

«Անտարբերությունը շատ ավելի դատապարտելի է, քան այն, երբ մասնագետներն են ներգրավվում քաղաքականության մեջ: Որքան հասարակական լայն շերտեր ներգրավվեն այս գործընթացների մեջ, այնքան մեր հաջողություններն ավելի ակնհայտ կլինեն»,- ընդգծեց Հ. Բակունցը:

20.04.2009, 16:14

Aysor.am

ՕԵԿ-ի թեկնածուների նպատակը «պաշտոններ գրավելը չէ»

Երևանի տեղական ինքնակառավարման մարմինների ընտրություներին մասնացությունը «Օրինաց երկիր» կուսակցության ընտրացուցակի երրորդ հորիզոնականը զբաղեցնող տնտեսական գիտությունների դոկտոր Գրեգորի Վահանյանը բացատրեց առաջինը` երևանիցի լինելով, երկրորդը` հայ լինելով, և նպատակն ամփոփեց «մենք ուզում ենք, որ մեր զավակները լավ ապրեն և ուզում ենք իրականացնել մեր նախնիների պատգամները» խոսքերով:

«Մենք ուզում ենք, որ մեր Երևանը լինի ոչ միայն մաքուր և գեղեցիկ, այլև մշակույթի, գիտության ու երիտասարդների քաղաք»,- ընդգծեց Գ. Վահանյանը և ավելացրեց, որ շատ կարևոր է հաշվի առնել այն, ինչ կատարվում է աշխարհում, և ֆինանսատնտեսական ճգնաժամի պայմաններում իրենք ոչ միայն չեն կարող թույլ տալ, որ Երևանի հետ կատարվի այն, ինչ կատարվում է աշխարհի շատ երկրներում, «այլև դիմադրելով պետք է գնանք առաջ` դեպի Արարատ»:

ՕԵԿ ընտրացուցակի երկրորդ հորիզոնականում ներկայացված բժշկական գիտությունների դոկտոր-պրոֆեսոր, առողջապահական գիտությունների թեկնածու Հենրի Բակունցը, լինելով «պրակտիկ բժշկության աշխատող», գտնում է, որ այն խնդիրները, որոնք կուտակվել են առողջապահական համակարգում, հրատապ են և լուծման ենթակա, և, ավագանու անդամ լինելով, նա կարող է հնչացնել այդ խնդիրները և տալ դրանց լուծումները»:

ՕԵԿ ավագանու թեկնածուները լրագրողներին տեղեկացրեցին, որ «մենք նպատակ չունենք պաշտոններ գրավելու, քանի որ աշխատում ենք մեր մասնագիտություններում, ունենք բարձր պաշտոններ»:

«Բայց մեր կուսակցության ծրագիրը բավականին մրցունակ է, գիտատար և պրակտիկ ու կոնկրետ, և մենք ներկայացնում ենք մեր ժողովրդի խնդիրները ու այն ռազմավարական նպատակները, որոնք փորձում ենք իրականացնել»,- մանրամասնեց Գ. Վահանյանը:

Հ. Բակունցի կարծիքով, մեր անհաջողություններից մեկն այն է, որ մարդիկ քաղաքականությունում ներգրավված են` չունենալով «հասարակական կշիռ և ոչ էլ քաղաքական փորձ»:

«Անտարբերությունը շատ ավելի դատապարտելի է, քան այն, երբ մասնագետներն են ներգրավվում քաղաքականության մեջ: Որքան հասարակական լայն շերտեր ներգրավվեն այս գործընթացների մեջ, այնքան մեր հաջողություններն ավելի ակնհայտ կլինեն»,- ընդգծեց Հ. Բակունցը:

20.04.2009, 16:14

Aysor.am

ՕԵԿ-ը պատրաստ է համագործակցել ՀԱԿ-ի հետ

Օրինաց երկիր կուսակցությունը Երևանի տեղական ինքնակառավարման մարմինների ընտրություններից հետո պատրաստ է համագործակցել Հայ ազգային կոնգրեսի հետ, եթե ձևավորվի մի կոալիցիա, որում ընդգրկված լինի նաև ՀԱԿ-ը: Այս մասին լրագրողների հետ հանդիպման ժամանակ հայտնեց կուսակցության ընտրացուցակի երկրորդ տեղը զբաղեցնող բժշկական գիտությունների դոկտոր-պրոֆեսոր, առողջապահական գիտությունների թեկնածու Հենրի Բակունցը:

«Շատ ճիշտ ճանապարհ է, երբ իշխանությունը և ընդդիմությունը պայմանագիր են կնքում, որպեսզի լուծեն այն խնդիրները, որոնք առկա են մեր հասարակության մեջ», - հայտարարեց Հենրի Բակունցը` հիշեցնելով, որ 2008 թ-ի նախագահական ընտրություններից հետո, իրենք, լինելով ընդդիմություն, «միացան իշխանությանը` իրականացնելու այն խնդիրները, որոնք առկա են մեր պետությունում»:

Հ. Բակունցի կարծիքով, եթե նույնը լիներ 1996 թ-ին, այն է` պայմանագիր կնքվեր Լևոն Տեր-Պետրոսյանի և Վազգեն Մանուկյանի միջև, «տգեղ երևույթները, որոնք տեղի ունեցան, չէին լինի»:

«Ինչու՞ մեր հայ ազգը պետք է ունենա երկու ճամբար, որոնք այդպիսի անհանդուրժողական մոտեցումներ են դրսևորում: Նրանք պարտավոր էին նստել դեմ դիմաց, պայմանավորվել և ժողովրդին սխալ ճանապարհով չտանել», - կարծիք հայտնեց Հ. Բակունցն ու հայտարարեց, որ 1996 թ-ին տեղի ունեցած դեպքերի համար ինքը «մեղավոր է համարում երկու կողմի` և իշխանության, և ընդդիմության քայլերը»:

Այն հարցին, թե ո՞վ էր մեղավոր 2008 թ.-ի մարտյան իրադարձությունների համար, Հ. Բակունցը պատասխանեց. «Իշխանությունը քայլ արեց` առաջարկեց ընդդիմությանը լիդերներին միավորվել` դառնալ կոալիցիոն իշխանության անդամ»:

«Նրանցից մեկի կողմից (Aysor` ի նկատի ունի ՕԵԿ-ին) առաջարկն ընդունվեց, մյուս կողմը` այդ համաձայնությանը չգնաց և գերադասեց դուրս գալ փողոց: Թե չընդունելն ինչո՞վ վերջացավ, ականատեսը եղաք դուք», - հայտնեց առողջապահական գիտությունների թեկնածուն:

20.04.2009, 14:47

Aysor.am

«Սահմանը բացելու նախապայմաններ պետք է ներկայացնի Հայաստանը»

«Արցախի հարցն ընդհանրապես պետք է բանակցություններից դուրս լինի, քանի որ այն Հայաստան-Ադրբեջան-Արցախ հարաբերությունների խնդիր է»,- ասաց «Հայկական ճարտարապետությունն ուսումնասիրող» հասարակական կազմակերպության գիտաշխատող, թուրքագետ Րաֆֆի Քորթոշյանը և ավելացրեց. «Եթե Թուրքիան մեզ մեղադրում է, որ մենք տարածքներ ենք գրավել Ադրբեջանից, նախ և առաջ պետք է մտածի Կիպրոսի հետ իր արածի մասին, ու, որ, ի տարբերություն իրեն, ոչ մի եվրոպական պետություն սահմները չի փակել իր առաջ»:

Ր. Քորթոշյանի կարծիքով, եթե Թուրքիան` որպես սահմանը բացելու նախապայման ներկայացնում է Ցեղասպանության հարցը, ապա Հայաստանը պետք է ներկայացնի «Էջմիածնին, Կոստանդնուպոլսի պատրիարքարանի, Կիլիկիո կաթողիկոսությանը պատկանող կալվածքների հարցը, եթե ուզում են արխիվներ բացեն, մենք պետք է պահանջենք, որ բացեն նաև իրենց կադաստրները և հարցնենք` ի՞նչ եղան Օսմանյան պետությունում բնակվող հայերի սեփականությունները»:

«Ինչ վերաբերում է Կարսի պայմանագիրի ստորագրմանը, ապա մենք չենք կարող ոչ ասել, բայց մենք այդ ժամանակաշրջանի մեջ ստորագրել ենք նաև Սևրի, Լոզանի պայմանագրեր, և պետք է քննարկվեն այդ պայմանագրերն էլ»,- մանրամասնում է թուրքագետը: Ըստ նրա, Հայաստանը պետք է այս ամենը ներկայացնի Թուրքիային, որ ոչ թե «մենք մերժենք նախապայմաններն ու ասենք` ոչ, այլ իրենք ասեն` ոչ»:

Ր. Քորթոշյանը համոզված է, որ Հայաստանի կողմից Կարսի պայմանագիրը ստորագրելուց հետո, Թուրքիան մյուս երկու նախապայմանները պարտադրելու է` իր ուզած ձևով: Այդ է պատճառը, որ, ըստ նրա, «մեզ պետք է ժամանակ` պատրաստվելու ամեն կողմից, հաշվելու, թե ի՞նչ կտա մեզ սահմանի բացումը»:

«Թուրքիան մեր սև աչքերի համար չէ, որ ուզում է սահմանները բացել: Մենք հիմա քաղաքական խաղի մեջ ենք: Եթե ճիշտ կարողանանք խաղալ, պայքարել, մենք կշահենք, եթե ոչ` կշահի հակառակ կողմը»,- ընդգծեց Ր. Քորթոշյանը, ով նաև հավելեց, որ, ի տարբերություն Թուրքիայի, «մենք մտածում ենք ոչ թե ազգային, այլ տնտեսական շահի մասին, իսկ վերջին հաշվով, ազգային շահերին ձգտողն է, որ հաղթող է դուրս գալիս»:

«Եթե մենք այսօր ստորագրենք Կարսի պայմանագիրը, վաղը սահմանը բաց կլինի: Կանխատեսումս այս է»,- ամփոփելով իր խոսքը` ասաց թուրքագետ Ր. Քորթոշյանը:

18.04.2009, 18:17

Aysor.am

Թուրքիայի «խաբուսիկ» պայմանները` Հայաստանի համար ծուղակ

«Չի կարելի միանշանակ դիտել թուրք հասարակությանը, որովհետև թուրքիայում ապրում են տարբեր ցեղեր, կա սահմանի մոտ և սահմանից հեռու հասարակություն, որոնց մեջ մեծ տարբերություններ կան: Ինչ վերաբերում է մամուլում հայ-թուրքական սահմանի բացման մասին հրապարակումներին, ապա Թուրքիայում խոսվում է 3 նախապայմանի մասին»,- հայտնեց «Հայկական ճարտարապետությունն ուսումնասիրող» հասարակական կազմակերպության գիտաշխատող, թուրքագետ Րաֆֆի Քորթոշյանը:

Ըստ Ր. Քորթոշյանի, Հայաստանում խոսվում է միայն երկու նախապայմանի մասին, որոնք «խաբուսիկ են, և որոնց միջոցով Թուրքիան ուզում է մեզ ծուղակի մեջ գցել»: Նա նշեց, որ Թուրքիայի ներկայացրած առաջին նախապայմանը Լեռնային Ղարաբաղի հակամարտության հարցն է, երկրորդը` Ցեղասպանության հարցն է, երրորդը` 1921 թ-ի Կարսի պարմանագրի` Հայաստանի կողմից ստորագրումն է:

«Առաջին երկու պայմանները խաբուսիկ են, քանի որ Թուրքիան լավատեղյակ է, որ Հայաստանը սահմանը բացելու համար երբեք չի նվիրի Արցախը: Թուրքիան մեծ շահ չունի, որ նախապայման ներկայացնի Ցեղասպանության հարցը չքննարկել բարձր ատյաններում, քանի որ Թուրքիան դարձյալ շատ լավ գիտի, որ, եթե Հայաստանը նույնիսկ չքննարկի այդ հարցը, Սփյուռքը քննարկելու է»,- մանրամասնեց թուրքագետը:

Ր. Քորթոշյանի համոզմամբ` Թուրքիայի «հիմնական շահը, որի մասին, դժբախտաբար, Հայաստանում չի խոսվում, Կարսի պայմանագրի ստորագրումն է, որը, եթե ընդունենք, ապա վերջնականապես կկորցնենք Արևելյան Հայաստանի Կարսն ու Սուրմալուն, հետևաբար ողջ Արևմտյան Հայաստանը»:

«Եթե չստորագրենք, Թուրքիան կասի` ինչպե՞ս բացեմ սահմանը, եթե դու իմ անկախությունը չես ճանաչում, ու այդ հանգամանքը կդարձնի մատի փաթաթան ամբողջ աշխարհի առաջ, ինչպես արեց Կիպրոսի դեպքում»,- ընդգծեց թուրքագետն ու հավելեց, որ նման իրավիճակում չհայտնվելու համար, մենք պետք է ներկայացնենք հակակշիռ նախապայմաններ:

18.04.09, 18:03

Aysor.am

Կանխատեսումներ անել հնարավո՞ր չէ

«Թուրքիան արտաքին նոր քաղաքականությունը որդեգրելու հետ մեկտեղ դիվանագիտական դաշտում փորձում է ամեն ինչ լավագույնս օգտագործել իր ազգային շահին ենթարկելու համար»,- կարծում է ԳԱԱ Արևելագիտության ինստիտուտի գիտաշխատող, թուրքագետ Անուշ Հովհաննիսյանը, ով հայտնեց, որ Թուրքիայի արտաքին քաղաքականությունում Հայաստանի նկատմամբ «որակական տեղաշարժ չի նկատվել, չնայած որոշակի քայլեր արվում են»:

Ա. Հովհաննիսյանի մեկնաբանությունների համաձայն` տեղի ունեցող իրադարձությունների ֆոնում «Ամերիկայի և Թուրքիայի մեծ առևտուրն է, ինչի ականատեսը եղանք Օբամայի` Թուրքիա կատարած այցի ժամանակ»:

Խոսելով հասարկության շրջանում գոյություն ունեցող տրամադրություններից` Ա. Հովհաննիսյանը հայտնեց, որ թուրքական որոշ քաղաքական կուսակցությունների համար նույնիսկ անսպասելի էր ամերիկյան մամուլում հրապարակված այն տեղեկատվությունը, որի համաձյան, անգամ հայ-թուրքական սահմանի բացման հստակ օր էր նշվում: Նա նաև նշեց, որ կուսակցությունների կողմից կոչեր են հնչում «երբեք չհրաժարվել ադրբեջանական եղբայրությունից», ինչպես նաև` շրջանառվում է այն տեսակետը, որ սահմանի բացումը հնարավոր է փուլ առ փուլ:

«Հնարավոր չէ նման պայմաններում կանխատեսումներ անել»,- ընդգծեց Ա. Հովհաննիսյանը` պարզաբենելով, որ բանակցային գործընթացի վերաբերյալ մանրամասները հայտնի չեն, իսկ «այստեղ-այնտեղից ստացված ինֆորմացիայով հնարավոր չէ ճիշտ վերլուծություն կատարել»:

Չնայած դրան Ա. Հովհաննիսյանի կարծիքով, Թուրքիան շահագրգռված է բանակցային գործընթացով, ինչի ապացույցն էր Թուրքիայի ԱԳ նախարար Ալի Բաբաջանի` Հայաստան կատարած այցը: Ինչ վերբերում է հետագա զարգացումներին, ապա, ըստ թուրքագետի, դրանք ակնհայտ կլինեն Թուրքիայի վարչապետ Ռեջեփ Թայիփ Էրդողանի` Ռուսաստան կատարվելիք այցից ու նախագահ Դմիտրի Մեդվեդևի հետ հանդիպումից հետո:

18.04.09, 17:19

Aysor.am

Որդու ստեղծագործությունները` նվիրված Մինաս Ավետիսյանի 80-ամյակին

Այսօր Երևանի քաղաքապետարանում բացվելու է Նարեկ Ավետիսյանի անհատական ցուցահանդեսը` նվիրված հոր` Մինաս Ավետիսյանի ծննդյան 80-ամյա հոբելյանին: Այս մասին Aysor-ին հայտնեց հենց ինքը` նկարչի որդին:

Ն. Ավետիսյանի խոսքերով, ցուցահանդեսը կրում է «Ետդարձ» խորագիրը, որտեղ ներկայացված են իր տարբեր ժամանակների ստեղծագործությունները:

Aysor-ի այն հարցին, թե ինչու՞ է ցուցահանդեսը կրում «Ետադարձ» խորագիրը, Ն. Ավետիսյանը պատասխանեց. «Ետդարձն արվեստի ուղին է: Արվեստն ամենամեծ ազատություն է: Ետադարձը հենց վերադարձ է այդ ազատությանը, որը կարող էր ժամանակակից արվեստի մեր վերջին տարիների զարգացման ընթացքում տուժել, ինչու՞ չէ, նաև իմ կողմից»,- բացատրեց նկարիչը:

Ըստ Ն. Ավետիսյանի, ամեն ինչ իր ժամանակն ունի` «գալիս է մի պահ, որ ազատությունը զգում ես այնքանով, որ պատկերում ես քո մեջ եղող տեսանկյունները»: Նրա կարծիքով, այսպիսի մի փորձ է նաև այս ցուցահանդեսը:

Ձեզ համար որտե՞ղ է սահմանը Մինաս արվեստագետի և Մինաս ծնողի միջև: Պատասխանելով Aysor-ի այս հարցին` նկարիչ Ն. Ավետիսյանն ասաց, որ իր համար մեծ պատիվ ու պատասխանատվություն է լինել «նման մարդու զավակ»:

«Իհարկե, որպես արվեստագետի, ես չեմ անձնավորում իրեն: Ես նայում եմ Մինասին` որպես արվեստագետ, ով ինձ համար նույնպես օրինակ է ծառայել ու ծառայում է` որքան էլ փորձեմ լինել ինքնուրույն»,- մանրամասնեց Ն. Ավետիսյանը:

Ամփոփելով զրույցը` նկարիչ Նարեկ Ավետիսյանն ասաց, որ հոր հանդեպ պարտականություն ունենալն է նաև նրա հիշատակին նվիրված ցուցահանդես կազմակերպելը, քանի որ միշտ էլ ցանկացել է հարգանքի տուրքը մատուցել նրան:

18.04.09, 12:07

Aysor.am

«Եթե չկարգավորվեն գյուղական գրադարանները, գյուղը կդատարկվի»

«Գրադարաններն անընդհատ զարգացող օրգանական մարմիններ են, նրանք պետք է համահունչ ընդանան հասարակական, մշակութային, քաղաքական զարգացումներին, այսինքն` կյանքը որքան զարգանա, այդքան էլ պետք է զարգանա գրադարանը, այս է պատճառը, որ գրադարանը միշտ էլ ունենլու է խնդիրներ»,- Aysor.am-ի հետ զրույցում ասաց Հայաստանի Ագային գրադարանի տնօրեն և Հայկական գրադարանային ասոցիացիայի նախագահ Դավիթ Սարգսյանը:

Պատասխանելով Aysor.am-ի այն հարցին, թե ինչպիսի՞ հիմնական խնդիրներ ունեն հայաստանյան գրադարանները` Դ. Սարգսյանն ասաց. «Այն ինչ-որ կատարվում է մեր` գլխավորապես համայնքային գրադարաններում, սոսկալի է»:

«Եթե մենք անհապաղ գյուղական գրադարնները չկարգավորենք, չնպաստենք դրանց համալրմանը, չնպաստենք, որ գյուղական բնակավայրերում մեր հայրենակիցները ապահովված լինեն համապատասխան տեղեկատվությամբ, այն ամենով, ինչով ապահովված են մայրաքաղաքի գրադարանները` համակարգչներով, ինտերնետային կապով, գրքային համալրումներով, շենքային պայմաններով և այլն, մենք կկորցնենք, մեր մտավոր ներուժի զգալի հատվածը»,- կարծում է Հայաստանին Ազգային գրադարանի տնօրենը:

Նա մտահոգություն ունի, որ նմանատիպ պայմանների պարագայում «երիտասարդությունը գյուղից կտեղափոխվի քաղաք, մենք կկորցնենք գյուղը, կթողնենք բոլոր գյուղական խնդիրները, և գյուղը կդատարկվի»:

«Մշակութային հաստատությունները ճիշտ նույն դերակատարությունն ունեն խաղաղ պայմաններում, ինչ ռազմական ստորաբաժանումները պատերազմական պայմաններում»,- համոզված է Դ. Սարգսյանը, ով կարծում է, որ ժամանակակից տեխնիկայով և գրականությամբ հարուստ գրադարաններ ունենալը ևս «անվտանգության խնդիր է»:

Խոսելով գրադարանային խնդիրների մասին`Հայկական գրադարանային ասոցիացիայի նախագահն անդրադարձավ նաև համապատասխան կադրերի պակասին, ինչպես նաև` «գրադարանային արվեստի դասավանդմանը»:

«Մենք պետք է կրթենք գրադարանային դպրոց, որ գրադարանավարներն, օրինակ, բարձր դասարաններում դասավանդեն գրադարանային արվեստ: Երեխաները գոնե պրակտիկայի շրջանակներում գրադարան կայցելեն, կիմանան ինչպե՞ս օգտվել գրադարանից, գրքից, ի՞նչ է քարտարանը և այլն»,- մանրամասնեց Դ. Սարգսյանն, ով համոզված է, որ այդպիսով «երեխան լիարժեք կտիրապետի տեղեկատվությունը ձեռքբերելու և տեղեկատվությունից օգտվելու բոլոր հմտություններին»:

17.04.09, 17:43

Aysor.am

Ցեղասպանության ճանաչումն` ի օգուտ Թուրքիայի

«Ամերիկայի նախագահն իր հաղթանակն ունեցավ փոփոխությունների կոչով, բնականաբար ԱՄՆ-ի մինչ այդ վարած քաղաքականությունը պետք է այսօր վերանայվի: Չեմ կարծում, որ իր մանր հարցերը լուծելու համար ԱՄՆ-ը այս բարոյական հարցը կդնեն հարցականի տակ, առավել ևս, որ այն իր համար ավելի շատ խղճի, քան զուտ տարածաշրջանային հարց է»,- ասաց ՀՅԴ երիտասարդական թևի ներկայացուցիչ Սասուն Սարգսյանը` պատասխանելով Aysor-ի այն հարցին, թե հնարավո՞ր է, որ ԱՄՆ-ն օգտագործում է «ցեղասպանություն» բառն արտասանել կամ չարտասանելը Թուրքիայից իր որոշակի պահանջները ստանալու նպատակով:

Հիշեցնենք, որ Հայաստանի Հանրապետական կուսակցության, ՀՅԴ և «Բարգավաճ Հայաստան» կուսակցության երիտասարդական թևերը բաց նամակ են գրել ԱՄՆ նախագահ Բարաք Օբամային` կոչ անելով ապրիլի 24-ի իր ելույթում օգտագործել «Ցեղասպանություն» բառը: Այս մասին լրագրողների հետ հանդիպման ընթացքում հայտնեցին կուսակցությունների երիտասարդական թևերի ներկայացուցիչները:

«Եղել են այդպիսի երկրներ, որոնք Հայոց Ցեղասպանության ճանաչման հարցը օգտագործել են Թուրքիայից որոշակի դիվիդետներ շահելու նպատակով»,- հավելեց ՀՀԿ երիտասարդական թևի ներկայացուցիչ Գեորգի Գաբրիելյանը, ով կարծում է, որ «նման երևույթները բարոյական չեն»:

Երիտասարդներն անդրադարձան նաև Ցեղասպանությունը` որպես բարոյական խնդիր ընդունելու հարցին: Նրանց կարծիքով Ցեղասպանության բարոյական ճանաչումն է հանգեցնելու դրա իրավական ճանաչմանը:

«Եթե Թուրքիան իմանար, որ Ցեղասպանության ճանաչումը միայն բարոյական հարց է, չէր հապաղի ընդունել այն»,- ընդգծեց Ս. Սարգսյանն ու հավելեց, որ Թուրքիան «շատ լավ գիտակցում է, որ Ցեղասպանությունը ճանաչելուց հետո ի հայտ են գալու մի շարք պարտավորություններ կատարելու հարցեր, որոնք նաև միջազգային մակարդակի լուծում են պահանջում»:

Այդուամենայնիվ ՀՅԴ երիտասարդական թևի ներկայացուցիչ Ս. Սարգսյանը համոզված է, որ Ցեղասպանության ճանաչումը Թուրքիայի կողմից ի օգուտ Թուրքիայի է:

«Անգամ Սևրի պայմանագրում կա այսպիսի արտահայտություն, որ «հարցը լուծվել է ի օգուտ Թուրքիայի», այսինքն` այդ հողերը, որ տրվելու էին հայերին, ևս ի օգուտ Թուրքիայի էին»,- իր տեսակետը բացատրեց Ս. Սարգսյանն ու հավելեց. «Եթե Թուրքիայն գիտակցի, որ Ցեղասպանության ճանաչման գործընթացը ոչ թե ի վնաս, այլ ի օգուտ իրեն է` թե´ ժողովրդավարության, թե´ քաղաքակիրթ աշխարհում իր ուրույն դերն ունենալու իմաստով, Ցեղասպանության ճանաչման քայլերը չի դիտի` որպես հակաթուրք քաղաքականություն»:

17.04.09, 14:58

Aysor.am

Հայ երիտասարդները դիմել են Օբամային

«Հաշվի առնելով, որ Թուրքիայում վերջերս քարոզչություն է տարվում, թե Ցեղասպանության ճանաչման հետապնդման նախաձեռնությունը սփյուռքահայ համայնքների գործունեությունն է, իսկ Հայաստանում հասարակական կազմակերպություններն ու երիտասարդ միությունները չեն զբաղվում դրանով, մենք որոշեցինք այս քայլով ասել, որ Ցեղասպանությունը ոչ միայն Սփյուռքի հարցն է, այլև Հայաստանում գործող կազմակերպությունների և երիտասարդների` ի դեմս բոլոր քաղաքական ուժերի», - հայտարարեց Հայ հեղափոխական դաշնակցության (ՀՅԴ) Հայաստանի երիտասարդական միության անդամ Սասուն Սարգսյանը:

Տեղեկացնենք, որ Հայաստանի Հանրապետական կուսակցության, ՀՅԴ և «Բարգավաճ Հայաստան» կուսակցության երիտասարդական թևերը բաց նամակ են գրել ԱՄՆ նախագահ Բարաք Օբամային` կոչ անելով ապրիլի 24-ի իր ելույթում օգտագործել «Ցեղասպանություն» բառը: Այս մասին լրագրողների հետ հանդիպման ընթացքում հայտնեցին կուսակցությունների երիտասարդական թևերի ներկայացուցիչները:

Նշենք, որ նամակում մասնավորապես ասվում է, որ ԱՄՆ նախագահ Բարաք Օբաման «այժմ էլ պետք է կատարի իր տված խոստումը, այն է ապրիլի 24-ի ուղերձում ի լուր աշխարհի` այս անգամ որպես ԱՄՆ նախագահ, կճանաչի պատմական ճշմարտությունը»:

Երիտասարդները հայտնեցին, որ նամակը հանձնել են Հայաստանում Ամերիկայի դեսպանատան հասարակայնության հետ կապերի բաժնին, որտեղ էլ խոստացել են նամակն ուղարկել Սպիտակ տուն և հասու դարձնել Բարաք Օբամային:

«Կան հարցեր, որոնց շուրջ Հայաստանի, ինչպես նաև արտերկրի հայ երիտասարդները միակարծիք են և պատրաստ են համագործակցել», - ընդգծեց ԲՀԿ երիտասարդական թևի անդամ Վահե Էնֆիաջյանը:

Նամակում երիտասարդներն ասում են նաև, որ «իրենք մեծապես ոգևորված են, որ Ցեղասպանության 94-ամյակի տարելիցից ընդամենը մի քանի օր առաջ Օբամայի ծննդավայր Հավայի նահանգի օրենսդիր մարմինը ևս պաշտոնապես ճանաչել է Հայոց Ցեղասպանությունը և դատապրտել է Թուրքիայի ժխտողական քաղաքականությունը` դառնալով այդ տեսակետից ԱՄՆ-ի 42-րդ նահանգը»:

«Հայոց Ցեղասպանությունը, ոչ միայն հայերի խնդիրն է, այլև ողջ առաջադեմ մարդկության, քանի որ Ցեղասպանությունը ճանաչելն առաջին հերթին նշանակում է կանխել», - համոզված է ՀՀԿ երիտասարդական թևի անդամ Գեորգի Գաբրիելյանը, ով կարծում է, որ Օբաման նախընտրական քարոզարշավի ընթացքում Ցեղասպանության ճանաչման մասին խոստումը ոչ միայն տվել է հայերին, այլև Ամերիկայի ու ողջ աշխարհի հասարակությանը:

Երիտասարդները տեղեկացրեցին, որ իրենց միանալու կոչը մերժել է Հայ ազգային կոնգրեսի երիտասարդական թևը, իսկ «Օրինաց երկիր» և «Միակ» կուսակցությունների երիտասարդական թևերը չեն միացել` պատճառաբանելով, որ իրենցից յուրաքանչյուրը հանդես է գալու այլ հայտարարությունով:

Նշենք, որ երեք կուսակցություններից բացի, բաց նամակին են միացել նաև շուրջ 30 ուսանողական խորհուրդներ և մի շարք հասարակական ու այլ կազմակերպություններ: Երիտասարդները նաև հույս հայտնեցին, որ իրենց նախաձեռնությանը միացողներ դեռ կգտնվեն:

17.04.09, 13:48

Aysor.am