«Հայաստանը առաջին հերթին գրավիչ է իր հրաշալի ժողովրդով: Ես այդ միշտ համարում եմ համար առաջին գրավչությունը, քանի որ զբոսաշրջիկը միշտ նախընտրում է այն երկիրը, որտեղ իրեն ընդունված է զգում», - հայտարարեց ՀՀ Էկոնոմիկայի նախարարություն Զբոսաշրջության և տարածքային տնտեսական զարգացման վարչության պետ Մեխակ Ապրեսյանը:
Նրա խոսքերի համաձայն, Հայաստանը զբոսաշրջիկների համար գրավիչ է նաև «հարուստ պատմամշակութային ժառանգությամբ, բնությամբ, ստեղծագործ ունակություններ ունեցող մասնավոր հատվածով, իսկ ուղղակիորեն Նոյ նահապետի ազգ և առաջին Քրիստոնյա երկիր լինելը` Հայաստանի բացառիկ առանձնահատկություններից է»:
Մ. Ապրեսյանը տեղեկացրեց, որ Հայաստանը զբոսաշրջիկների համար ավելի գրավիչ դարձնելու նպատակով պետության և մասնավոր հատվածի համատեղ աշխատանքի շնորհիվ մշակվում և իրագործվում են մի շարք ծրագրեր:
«Կառավարության առաջարկությամբ` ԱԺ-ում քննարկվում է «Պետական տուրքի մասին» ՀՀ օրենքում փոփոխություն կատարելու մասին» օրենքի նախագիծը, որտեղ բացի 120 օր տևողությամբ մուտքի վիզայից, որի դրույքաչափը կազմում է 15.000 դրամ, նախատեսվում է սահմանել նաև 21 օր տևողությամբ մուտքի վիզա, որի դրույքաչափն ընդամենը 3 000 դրամ է, ինչը զգալիորեն նվազեցնում է զբոսաշրջային փաթեթի գինը և ավելի գրավիչ դարձնում զբոսաշարջիկի համար Հայաստան այցելությունը», - տեղեկացրեց Մ. Ապրեսյանը:
Զբոսաշրջության փաթեթների արժեքը հնարավորինս նվազեցնելու, համեմատաբար ցածր և մրցունակ գին սահմանելու նպատակով, Մ. Ապրեսյանի տեղեկացմամբ, պետությունը մասնավոր հատվածի հետ համատեղ ձևավորել է աշխատանքային խումբ, որը զբաղվելու է անհրաժեշտ ենթակառուցվածքների ստեղծման, ներդրումների ներգրավման, բարենպաստ բիզնես միջավայր ձևավորելու խնդիրներով:
«Աշխատանքային խումբը մշակելու և սահմանելու է այնպիսի չափանիշներ, որ ենթակառուցվածքները ձևավորվեն մեր պատմամշակութային ժառանգությանը հարիր և համապատասխանեն մեր ճարտարապետական միջավայրին: Այդ չափանիշների համապատասխան առանց խոչընդոտների կկատարվեն հողահատկացումներ և կհրավիրվեն ներդրողներ` ենթակառուցվածքներ ստեղծելու համար ներդրումներ կատարելու», - մանրամասնեց Ա. Մեխակյանը:
Aysor-ի հարցին, թե ի՞նչ միջոցառումներ են ձեռնարկվում անհատական զբոսաշրջիկների այցելությունը առավել ինքնուրույն և արդյունավետ դարձնելու համար, Զբոսաշրջության և տարածքային տնտեսական զարգացման վարչության պետը պատասխանեց. «Դա այն խնդիրներից է, որ լուծում է պահանջում: Օրինակ` ճանապարհների կահավորման հարցը, ըստ որի, ճանապարհները պետք է լինեն կահավորված տեղեկատվական ցուցանակներով, որպեսզի անհատ զբոսաշրջիկը կարողանա հեշտ կողմնորոշվել: Սա խնդիր է, որն ընդգրկված է մեր հայեցակարգից բխող ծրագրերի միջոցառումներում»:
Մ. Ապրեսյանը նաև նշեց, որ Հայաստան զբոսաշրջիկներն այցելում են հիմնականում Ռուսաստանից, Վրաստանից, Իրանից, Եվրամիության անդամ-երկրներից, ինչպես նաև աճել է զբոսաշրջիկների թիվը Թայլանդից, Թայվանից և Ճապոնիայից:
11.03.2009, 15:02
No comments:
Post a Comment