Հայաստանի տնտեսությունը զարգացնելու համար Հայաստանի ազգային մրցակցության հիմնադրամը (ՀԱՄՀ) նախաձեռնել է զարկ տալ զբոսաշրջությանը: Հենց այս նպատակով էլ ՀԱՄՀ-ն մշակել է «Տաթևի վանք. վերակառուցում և վերածնունդ» ներդրումային ծրագիրը:
Ինչպես լրագրողների հետ հանդիպման ժամանակ հայտնեց Հիմանդրամի գործադիր տնօրեն Բեկոր Փափազյանը, Հայաստանի զբոսաշրջության բնագավառն ունի մեծ ներուժ, սակայն այդ ներուժը բավարար չափով չի իրացվում, այդպիսով` բավարար արդյունքներ չեն գրանցվում:
Բ. Փափազյանը տեղեկացրեց, որ ծրագրի շրջանակներում նախատեսվում է հետազոտություն կատարել Տաթևի վանքի և ենթակառութցվծքի հնարավոր վերականգնման տեխնոլոգիաների վերաբերյալ, իրականացնել վանքի վերականգնողական աշխատանքները, վանքի մերձակա` Հալիձորի կիրճի վրա ճոպանուղի, իսկ ճոպանուղու հարևանությամբ` հյուրանոցային համալիր կառուցել:
Հիմնադրամի գործադիր տնօրենը բացատրեց նաև, որ ճոպանուղին ոչ միայն հնարավորություն կստեղծի կրճատել համալիրին հասնելու ժամանակահատվածը 45 րոպեով, այլև կապահովի ճոպանից բացվող հիասքանչ տեսարանով զմայլվելու հնարավորություն, իսկ հյուրանոցային համալիրի կառուցումը կստեղծի նոր աշխատատեղեր:
Տաթևի վանքի վերակառուցումը և ճոպանուղու կառուցումն իրականացնելու համար ծախսվելու է 20 մլն դոլար, որը, Բ. Փափազյանի տեղեկացմամբ, արդեն ներգրավված է:
Զբոսաշրջության բնագավառում իրականացվելիք մյուս ծրագիրը Սպիտակում Վարպետաց թաղամասի ստեղծումն է, որը կապված է Սպիտակի և Գյումրիի սոցիալական բնակարանների կառուցման ծրագրի հետ և ֆինանսավորվում է այդ ծրագրի շրջանակներում: Ինչպես մանրամասնեց ՀԱՄՀ զբոսաշրջության գրասենյակի տնօրեն Արմեն Հովհաննիսյանը, թաղամասն ունենալու է պատմամշակութային արժեք` ծառայելով հայկական ավանդական արհեստների վերականգմանը և սերունդներին փոխանցմանը:
«Այն կլինի Հայաստանի համար նոր, ավելի հետաքրքիր զբոսաշրջության կենտրոն և կծառայի տեղի բնակչության սոցիալական-տնտեսական խնդիրների լուծման համար»,- ընդգծեց Ա. Հովհաննիսյանը:
Հիմնադրամի գործադիր տնօրեն Բ. Փափազյանը համոզված է, որ ներդրումային ծրագրերը բարենպաստ պայմաններ կստեղծեն նաև այլ ոլորտների համալիր զարգացման համար և կապահովեն ներդրումների վերադարձելիությունը:
Նշենք, որ ՀԱՄՀ-ն ներկայումս արդեն կազմել և սկսելու է իրագործել նաև միջուկային բժշկության ասպարեզում տարածաշրջանում միակ ուռուցքաբանական կենտրոնի ստեղծումը և Թումանյան այգում կրթական համալիրի կառուցումը:
10.03.2009, 17:13
No comments:
Post a Comment