«Ճգնաժամը հաղթահարելու համար կարևոր նախապայմաններ են գործողությունների ճշգրիտ արագությունը` պահանջվող տեմպին համապատասխան, և գործիքների ճշգրիտ կիրառումը», - համոզված է ԱԺ «Ժառանգություն» խմբակցության անդամ Վարդան Խաչատրյանը, ում կարծիքով «մենք անցել ենք ճգնաժամի առավել մեղմ փուլը և մուտք ենք գործում ճգնաժամային սուր փուլ»:
Վ. Խաչատրյանի կարծիքով, ՀՀ Կառավարության կողմից ձեռնարկվող միջոցները ինչ-որ առումով կարող են մեղմել իրադրությունը, սակայն մի շարք խնդիրների լուծումը նա չի պատկերացնում: Այդ թվում, նրա համար անհասկանալի է, թե ինչպես է կատարվելու անցումը դրամի ճկուն կուրսին` աշխատատեղերի կորստի և դրամի արհեստական ֆիկսացիայի պայմաններում:
Քննադատելով որոշ ապրանքների ներկրման մաքսատուրքի բարձրացման միջոցով ներքին արտադրողին խրախուսելու ՀՀ Կառավարության ծրագիրը` Վ. Խաչատրյանը ծրագրի կիրառումը մեզանում գրեթե անհնար է համարում, «քանի որ մեր տնտեսությունն անձնավորված է»:
«Անհատ մարդու վրա դնել հույսը, որ համահասարակական բարօրրությունը հնարավոր է այդ խողովակով առաջ մղել, այն էլ մեր իրավիճակում, բավականին բարդ է, եթե ոչ անհնարին»,- ասում է «Ժառանգություն» խմբակցության անդամը:
Ճգնաժամի հետագա զարգացումների վերաբերյալ, ըստ Վ. Խաչատրյանի, հնարավոր կլինի հստակ խոսել միայն երրորդ եռամսյակից հետո, երբ հնարավոր կլինի ասել` «մենք մուտք կգործենք բացասակա՞ն, թե՞ դրական փուլ»:
«Մենք գտնվում ենք այժմ սուր ճգնաժամի փուլում, որը երրորդն է և ունի երկու զարգացում. կամ ներկա պահին հնարավոր է կասեցնել նեգատիվ ընթացքը, կամ դրան կհաջորդի ճգնաժամի սուր փուլը, որի ժամանակ ոչինչ չես անի, կսպասես մինչև ամեն ինչ մոխրանա, հետո կմատածես մոխրից հառնելու ելքերի մասին»,- բացատրում է Վ. Խաչատրյանը:
02.03.2009, 17:24
No comments:
Post a Comment