Կաշառակեր դասախոսների լուսանկարները Երևանի տարբեր վայրերում փակցնելու վերաբերյալ դժգոհություն հայտնեց ԱԺ պատգամավոր Վարդան Խաչատրյանը, ով այն որակեց` որպես «հազարամյակներով մեր ժողովրդի գոյությունը ապահոված կրթական մակարդակի և ուսումնական համակարգի պատիվը, նրա հանդեպ հասարակական վստահության աստիճանը հարվածի տակ դնող երևույթ»:
Վ. Խաչատրյանը, հարցադրելով, թե արդյո՞ք պարզված են այն հիմքերը, որով տեղի է ունեցել ակցիան, և արդյո՞ք այս ակցիան կապ ուներ բուհական խորհուրդներ հետ, ընդգծեց, որ «բոլորը լավ տեղեկացված են, որ դա կատարվել է «Միակ» կուսակցության կողմից, և որ նրա մեջ բացահայտ երևում է թաքնված կոռուպցիա»: Նա նաև հիշեցրեց, որ «մեր իմաստության մեջ այսպես է, եթե, օրինակ, Աստծո տաճարի սպասավորն ունի արատներ, սահմանափակվում է նրա գործունեությունը, այլ ոչ թե պայթեցվում է Աստծո տաճարը»:
Հարցադրամանը պատասխանեց ՀՀ Կրթության և գիտության նախարար Սպարտակ Սեյրանյանը, ով ընդգծեց, որ կրթական համակարգի սույն կոնֆլիկի մի կողմում դասախոսներն են, մյուս կողմում ուսանողները:
«Ես հեռու եմ սրբացնելուց Հայաստանի պրոֆեսիոնալ դասախոսական ողջ կազմը, ես առավել, քան հեռու եմ սրբացնելուց ուսանողությանը, որովհետև բոլորս էլ գիտենք, որ կոռուպցիա բուհական համակարգում կարող է լինել և կա միայն այն պարագայում, եթե կա չսովորող ուսանող»,- պարզաբանեց Ս. Սեյրանյանը:
Նախարարը տեղեկացրեց, որ բազմաթիվ ուսանողների հորդորել է լսարաններում փակցնել այն ուսանողների լուսանկարները, ովքեր չեն սովորում և գումար են առաջարկում դասախոսներին, և այդպիսով իրենց շարքերը մաքրել նմանօրինակ ուսանողներից: Այս առաջարկը նախարարը բացատրեց այն հանգամանքով, որ նման ակցիաներ անցկացվում են բուհերի կառավարման համակարգերում, և ամեն տարի բուհերից տասնյակ դասախոսներ են աշխատանքից ազատվում` կոռուպցիոն երևույթների բացահայտման արդյունքում:
«Ցանկացած մերկապարանոց հայտարարություն` գրավոր, բանավոր, նկարային, պատկերային, էսեմեսային, էլեկտրոնային և այլն, ես համարում եմ զրպարտություն, քանի դեռ դա չի փաստվել և ապացուցվել: Սակայն ես հակված էլ չեմ ասելու, որ բուհերում կոռուպցիոն երևույթներ չկան և մեր կրթության տաճարում բացառապես հրեշտակներ են»,- հայտարարեց Ս. Սեյրանյանը և հավելեց, որ «որևէ արատավոր երևույթի դեմ պայքարը չպետք է մղվի այնպիսի արատավոր մեխանիզմներով, որոնք կասկածի տակ են դնում հենց պայքարի գաղափարը»:
18.03.2009, 20:39
No comments:
Post a Comment