Այսօր ԱԺ չորրորդ գումարման հինգերորդ նստաշրջանի քառօրյայի նիստում քննարկման դրվեց «Ոստիկանության զորքերի մասին» ՀՀ օրենքում փոփոխություն կատարելու մասին», «Ոստիկանության մասին» ՀՀ օրենքում փոփոխություններ կատարելու մասին» և ««Ոստիկանությունում ծառայության մասին» ՀՀ օրենքում փոփոխություն կատարելու մասին» օրինագծերի փաթեթը:
Նշենք, որ օրինագծերի փաթեթը ԱԺ ներկայացվել է ՀՀ Կառավարության կողմից: Օրենքը պատգամավորներին ներկայացրեց ՀՀ ոստիկանության պետի տեղակալ Հովհաննես Հունանյանը, ում խոսքերով օրենքների փոփոխությունները կապված են հիմնականում ոստիկանության զորքերի խնդիրների և գործառույթների փոփոխման և հստակեցման հետ:
«Օրենքի փոփոխման ամենակարևոր հանգամանքը պայմանագրային զինծառայության անցնելն է», - ընդգծեց Հ. Հունանյանը, ինչը բացատրեց «2010 թ-ին ժամկետային զինծառայողների ավելի շատ կարիք ունենալով»: Նշենք, որ օրենքով նախատեսվում է արդեն 2012 թ-ին ունենալ բացառապես ոստիկանության պայմանագրային զինծառայողներ:
Տեղեկացնենք, որ օրենքի ընդունման պարագայում ոստիկանության զորքերի խնդիրների շարքից դուրս են գալիս քրեակատարողական հիմնարկների պահպանությունը, ազատազրկման ձևով պատիժ կրող դատապարտյալներին և կալանքի տակ գտնվող անձանց ուղեկցելը: Օրինագծի ընդունման արդյունքում «կբարելավվի և կբարձրանա ուղեկցումների արդյունավետությունը և անվտանգությունը, ինչպես նաև միասնական կարգավորում կստանան ձերբակալված և կալանավորված անձանց ուղեկցումների հետ կապված հարաբերությունները»:
Պատգամավորների կողմից մի քանի հարցադրումներ հնչեցին օրինագծում` հատուկ միջոցների կիրառման մասին դրույթներն ընդհանրացված ձևով ներկայացնելու վերաբերյալ, ինչը ոմանց կողմից «անընդունելի», ոմանց կողմից էլ «անհասկանալի» դիտարկվեց:
Հ. Հունանյանը պատասխանեց հարցերին ` նշելով, որ փոփոխությունը վերաբերում է «միայն մասսայական անկարգությունների ժամանակ կիրառվելիք հատուկ միջոցներին, որի պարագայում անհնար է գործողություններն իրականացնել միայն հրամանատարի հրամանով»:
Հիմնական զեկուցողը խոստացավ, որ պատգամավորների կողմից կատարված նկատողություններն անպայման կքննարկվեն և կներառվեն օրինագծերի փաթեթի մեջ` երկրորդ ընթերցմանը ներկայացնելու ժամանակ:
18.03.2009, 14:39
No comments:
Post a Comment