Գագիկ Բեգլարյանին Երևանի քաղաքապետի պաշտոնում նշանակելու և քաղաքապետի առաջիկա ընտրությունների մասին այսօր լրագրողների հետ հանդիպման ժամանակ մեկնաբանություններ արեց և կարծիքներ հայտնեց ԱԺ-ում Հայաստանի Հանրապետական կուսակցություն (ՀՀԿ) խմբակցության ղեկավար Գալուստ Սահակյանը:
Գ. Սահակյանը վստահեցրեց, որ Գ. Բեգլարյանին քաղաքապետի պաշտոնում նշանակելը կապված է ոչ թե նրա երիտասարդ լինելու կամ «բարետեսության ու ձայնի տեմբրի հետ», այլ « Հանրապետականների որոշման և քաղաքապետարանի հզոր կառույցները ղեկավարել կարողանալու»:
«Մտածել ենք, որ այսպես ավելի մոտ կլինենք` ավելի շատ ձայն վերցնելուն, առավել ևս որոշակի թարմություն կմտցնենք քաղաքապետարանի աշխատանքներում», - մանրամասնեց Գ. Սահակյանն ու ընդգծեց, որ այդպիսով Երևանի նախկին քաղաքապետ Երվանդ Զախարյանը «չի վարկաբեկվում. նրա ուժերը Հանրապետականը պատրաստ է օգտագործելու»:
ՀՀԿ խմբակցության ղեկավարը խոսեց նաև Երևանի տեղական ինքնակառավարման մարմինների ընտրություններում ընդդիմության մասնակցության մասին: Նրա խոսքերի համաձայն` չնայած «Ժառանգություն» կուսակցությունը չի կարող հաղթահարել 7 տոկոսի շեմը, բայց կշարունակի հասարակությանն ապացուցել, որ ամենաուժեղ և ամենակոշտ ընդդիմությունն իրենք են:
Ընդդիմության «մյուս թևի»` Հայ ազգայնի կոնգրեսի վարած քաղաքկանությունը Գ. Սահակյանն որակավորեց «զգուշավոր և վախեցած»: Ըստ նրա, ՀԱԿ-ը «զգուշավոր է, քանի որ տեսնում է նոր խորհրդրանական ընտրություններ և գտնում, որ այդտեղ առավելություն կունենա, վախեցած է, քանի որ թիմ չէ` հստակ չի երևում, թե բաղկացուցիչներն ովքեր են»:
Այնուամենայնիվ Գ. Սահակյանը վստահեցրեց, որ քաղաքապետի ընտրություններում «իրենց մրցակցությունը լինելու է զուտ կուսակցական, այսինքն` կարևորվելու է, թե ՀՀԿ ցուցակը քանի տոկոս ձայն է վերցնելու այս ընտրություններից»:
Չկարողանալով նախապես կանխատեսումներ անել ընտրությունների արդյունքում ստացած ձայների քանակի մասին` Գ. Սահակյանն ընդգծեց. «Նույնիսկ եթե Հանրապետականն այս ընտրություններին չմասնակցեր, նրա քաղաքական մոտեցումներն այնպիսին են, որ այսպես, թե այնպես Երևան քաղաքում մեծ դերակատարում է ունենալու»:
09.03.2009, 13:57
No comments:
Post a Comment