«Մեր քաղաքական թիմի բոլոր կազմակերպությունները պատրաստ են մասնակցել ընտրություններին: Մենք վերապատրաստական աշխատանքներ ենք կատարում մեր կուսակցության հանձնաժողովի անդամների և վստահված անձերի հետ, որպեսզի իրենք լիարժեք տիրապետեն այն պահանջներին, որոնք իրենք պետք է իմանան և կատարեն, ինչը թույլ կտա հնարավոր կեղծիքների դեմն առնել», - հայտարարեց «Օրինաց երկիր» կուսակցության փոխնախագահ Հեղինե Բիշարյանը:
Չնայած Հ. Բիշարյանը նշեց, որ «միամիտ չէ, որ մտածի, թե ընտրությունները լիարժեք թափանցիկ և մաքուր են անցնում, այդպիսին են եղել կամ կլինեն», այնուամենայնիվ հույս հայտնեց, որ իրենց կուսակցության նման, ընտրությանը մասնակցող բոլոր քաղաքական ուժերը «աշխատեն հնարավորինս պահպանել թափանցիկություն»:
Երևանի քաղաքապետի ընտրություններում առաջադրված բոլոր թեկնածուներին Հ. Բիշարյանը համարեց «հավասար» մրցակիցներ` առավելությունը չտալով ոչ մեկին, ասաց. «Բոլորս էլ մրցակիցներ ենք` մեկս մյուսի համար, և ժամանակը ցույց կտա, թե ով ավելի ձայներ կհավաքի»:
Ընդդիմության մասնակցությունը, ըստ Հ. Բիշարյանի, շատ կարևոր է, քանի որ այն օգնում է աշխատանքներն «ավելի ճիշտ և ավելի զգոն կազմակերպել»: Այն հարցին, թե արդյոք կարո՞ղ է ընտրություններին մասնակցել ցանկացող քաղաքական ուժերի միավորում տեղի ունենալ, ՕԵԿ թեկնածուն հնարավոր չհամարեց:
Անդրադառնալով այն կարծիքներին, թե հունիսի 1-ին հնարավոր է կրկնվի «մարտի 1-ը», Հ. Բիշարյանն ուղղակի ասաց, որ «չի կարելի աթոռի կռիվ տալու համար արյուն թափել, և «Օրինաց երկիր» կուսակցությունը դեմ է նման մոտեցումներին»:
«Կոնկրետ մենք, երբ նախագահական ընտրությունների ժամանակ մեր ձայները տեսանք, կանգ առանք: Պետք է կանգ առնել և հաշտվել իրականության հետ և չգնալ առաջ ու ժողովրդի արյան գնով աթոռակռիվ անել», - հայտարարեց Հ. Բիշարյանն ու ընդգծեց. «Չի կարելի երկու աթոռ ավել ունենալու համար գնալ ծայրահեղության և հետո մտածել, թե ով է մեղավոր: Մեղավորը մեկն է, ով առաջնորդում է նման մոտեցումները»:
26.03.09, 14:16
No comments:
Post a Comment