«Ճշգրիտ պատասխանել, թե ինչպիսի՞ն կլինի համաշխարհային ֆինանսական ճգնաժամի ազդեցությունը Հայաստանում հարցին, գործնականում հնարավոր չէ երկրի որևէ քաղաքական գործչի համար», - ասաց ՀՀ ԱԺ Ֆինանսաբյուջետային հարցերի հանձնաժողովի նախագահ Գագիկ Մինասյանը, ում կարծիքով, սակայն, կիրականանան իշխանության կողմից արված կանխատեսումները:
Գ. Մինասյանը վստահեցրեց, որ «մեզ իսկապես հաջողվեց, այլ երկրների համեմատությամբ, ճգնաժամի առաջին փուլն անցնել ավելի մեղմ»: Խոսելով ապագա զարգացումների մասին` Ֆինանսաբյուջետային հարցերի հանձնաժողովի նախագահն անդրադարձավ գազի, էլեկտրաէներգիայի, ջրի թանկացումներին: Նրա կարծիքով, այդ թանկացումների համար «բավականին տանելի ֆոն են ստեղծում շուկայում սպասվող գնանկումները»:
«Սա ևս մեկ անգամ թույլ է տալիս պնդելու, որ իշխանությունների կողմից իրականացվող տնտեսական քաղաքականությունը իսկապես արդարացված է»,- ընդգծեց Գ. Մինասյանն ու հավելեց, որ իշխանությունների վարած քաղաքականությունը «կարողացավ ապահովել մեղմ ցնցումներ` հասարակության առավել անապահով խավերի համար»:
Փաստելով, որ «տարին բարդ ու ծանր է լինելու»` Գագիկ Մինասյանը հավաստիացրեց, որ «լինելու է խնդիրների բավականին մեղմ հաղթահարում»: Նման հայտարարություն անելու համար` որպես նպաստավոր պայմաններ Գ. Մինասյանը մատնանշեց նախևառաջ գնանկումը, ապա ներքին արտադրողին խրախուսող` ՀՀ Կառավարության կողմից իրականացվող քաղաքականությունը և նախորդ տարիների ընթացքում ունեցած 800 միլիարդ դոլար կուտակումները:
«Կարծում եմ, որ առաջիկա տարվա բարդությունները նույնպես կհաղթահարենք մեղմ, ազգաբնակչության համար նվազ զգալի, ինչպես դա կարողացանք իրականացնել անցյալ տարվա ընթացքում», - կարծում է Գ. Մինասյանը:
Ավելի ճշգրիտ կանխատեսումներ անելու համար Գագիկ Մինասյանը մեջ բերեց միջազգային փորձագետների կանխատեսումները:
«Երրորդ եռամսյակը լինելու է ճգնաժամի գագաթնակետը, որից հետո տնտեսությունը պետք է կամաց-կամաց դուրս գա ճգնաժամի ազդեցությունից: Իհարկե, կանցնեն տարիներ` մինչև տնտեսական իրավիճակը կգա նախաճգնաժամայինի: Սակայն լույսը թունելի վերջում, արդեն երևում է, որն էլ չորրորդ եռամսյակի սկիզբն է: Դրանից հետո ավելի վատ չի լինի, կլինի ավելի լավ», - հույս հայտնեց ԱԺ Ֆինանսաբյուջետային հարցերի հանձնաժողովի նախագահը:
02.03.2009, 14:44
No comments:
Post a Comment