«Մեր գնահատականներով, որոնց մենք հանգում ենք բանկերից և արժույթի փոխանակման կետերից ստացված տեղեկատվությունից, իրավիճակն ավելի հանգիստ է, շատ ավելի քիչ մարդիկ են արտարժույթ գնում, քանի որ հետագա անկման սպասելիքներն էականորեն նվազել են»,- հայտնեց Հայաստանի Կենտրոնական բանկի (ԿԲ) փոխնախագահ Վաչե Գաբրիելյանը` պատասխանելով Aysor.am-ի` դրամի արժեզրկման պայմաններում հասարակության շրջանում դրամը արտարժույթով փոխելու միտումների մասին հարցին:Վ. Գաբրիելյանի տեղեկացմամբ` փոխարժեքը կայունանում է: Թե ինչպիսի՞ն կլինեն հետագա զարգացումները, ԿԲ փոխնախագահը դժվարանում է ասել, բայց ընդգծում է, որ «իրենց համոզմամբ` այդ միտումները շատ շուտով պետք է դադարեն, քանի որ ճշգրտումը զգալի էր»:
Անդրադառնալով խնայողությունները դրամով կամ դոլարով պահելու խնդրին` Վ. Գաբրիելյանը խորհուրդ տվեց խնայողությունները պահել այն արժույթով, որով տվյալ անձը կատարում է իր ծախսերը:
«Մեր կարծիքով, Հայաստանի ազգաբնակչությունը պետք է խնայողություներ և ծախսեր կատարի ազգային արժույթով, սակայն, եթե դուք ունեք ծախսեր, որոնք, օրինակ, կապված են ներկրման, արտասահման մեկնելու հետ, ապա տրամաբանական է, որ դուք ձեր խնայողությունների մի մասը պահեք արտարժույթով»,- բացատրեց ԿԲ փոխնախագահը:
Վ. Գաբրիելյանը փաստեց, որ որոշ քաղաքացիներ տատանման հետևանքով ունեցել են որոշակի կորուստներ, սակայն նշեց, որ այս փոփոխությունը որոշակի խթան կհանդիսանա արտահանման համար և մի քանի տոկոսով տնտեսական աճ կգրանցվի:
04.03.2009, 19:57
No comments:
Post a Comment