Եվրոպական մի շարք օպերաների մենակատար, տենոր Վաննո Թադեոն (իսկական անունը` Վահրամ Թադևոսյան) համերգային այցով Հայաստանում է: Ինչպես լրագրողների հետ հանդիպման ժամանակ տեղեկացրեց երգիչը, առաջիկա մեկ-երկու ամիսների ընթացքում Մեծ Եղեռնին նվիրված համերգներով Վաննո Թադեոն ելույթներ է ունենալու ինչպես Երևանում, այնպես էլ Հայաստանի մի շարք քաղաքներում, այդ թվում` Վանաձորում, Գյումրիում, նաև Սյունիքի և Լեռնային Ղարաբաղի Հանրապետության քաղաքներում:
Օպերային երգչի խոսքերի համաձայն` Հայաստնում նախատեսված համերգներին ընդգրկված ստեղծագործությունները կատարվել են աշխարհի մեծ բեմերում: Ծրագրում նաև ընդգրկվել են Կոմիտասի և Մ. Երկմալյանի ստեղծագործությունները:
«Ստեղծագործություններն իրենց երանգով մոտ են Եղեռնին, դրանք հիմնականում դրամատիկ բնույթի գործեր են», - մանրամասնեց Վ. Թադեոն և նշեց, որ կլինեն նաև այնպիսի ստեղծագործություններ, որոնք Հայաստանում կատարվելու են առաջին անգամ, որպեսզի մեր հանդիսատեսն «ավելի լայն պատկերացումներ ունենա դասական ոկալի արվեստից և չսահմանափակվի միայն իրեն քաջ ծանոթ ստեղծագործություններով»:
Համերգներն անցկացվելու են երկու մասով: Առաջին մասում լինելու են զուտ դրամատիկական, ակադեմիական ստեղծագործություններ, իսկ երկրորդ մասում կլինեն Կոմիտասի մշակումներով ժողովրդական երգեր, Երկմալյանական պատարագից հատվածներ, ինչպես նաև դասական էստրադայի ոճով ստեղծագործություններ:
Տեղեկացնենք, որ Վահրամ Թադևոսյանն արդեն 8 տարի ապրում և ստեղծագործում է Իսպանիայում: Երգչի առաջին ելույթը տեղի է ունեցել 1996 թ-ին Իսպանիայում ` Ամենայն հայոց կաթողիկոս Գարեգին I-ի հովանավորությամբ, որտեղ Վ. Թադևոսյանը Ֆրանցիսկո Վինյասի անվան մրցույթում արժանացել է դիպլոմի և Վերդիի անվան մրցանակի:
ԱՅՍՕՐ, 15:23
No comments:
Post a Comment