«Հնչում են կարծիքներ, որ չի կարող հանդուրժողականության մասին խոսք գնալ մի երկրում, որտեղ լիարժեք չեն գործում օրենքները: Ես ուզում եմ մի հարց բարձրացնել. արդյո՞ք մի երկրում գրված օրենքները կարող են գործել լիրաժեքորեն, եթե անգամ չգրված բարոյական, էթիկական օրենքները գործում են ոչ լիարժեքորեն»,- ԱԺ չորրորդ գումարման հինգերորդ նստածրջանի մարտի 16-19-ի քառօրյայի այսօրվա նիստում հայտարարեց Հանրապետական կուսակցության պատգամավոր, ԱԺ Գիտության, կրթության, մշակույթի և սպորտի հարցերով մշտական հանձնաժողովի նախագահ Արմեն Աշոտյանը` անդրադառնալով երկրում նոր սկիզբ առած հանդուրժողականության, երկխոսությունների շուրջ ծավալված որոշ կարծիքներին` ընդգծելով, որ հանդուրժողականությունը բոլորիս կողմից կարևորվող հասարակական և քաղաքակն ֆենոմեն է:
«Ցավոք սրտի մենք ինքներս, չհետևելով մեր կեցվածքին և քաղաքական ակտիվությանը, հաճախ փորձում ենք ամբողջ մեղքը բարդել քաղաքական հակառակորդների վրա: Ակնհայտորեն, հանդուրժողականության մասին խոսք տանողները պետք է փորձեն այդ հանդուրժողականությունը խարսխել միայն հարգանքի վրա»,- ասաց Ա. Աշոտյանն ու հավելեց. «Բայց ի՞նչ հարգանքի մասին կարող է խոսք գնալ, երբ բավական էր, որ խորհրդարանական ընդդիմության ղեկավարը հայտարարեր, որ վարանում է արտախորհրդարանական ընդդիմության ղեկավարին միանալու հարցում, ապա հաջորդ օրն իսկ մամուլը որակավորեր այդ ամենը որպես խևություն, հաճախորդություն և այլն: Ի՞նչ հարգանքի մասին է խոսք գնում, երբ մեր թեկնածուի դեմ ծավալվում է, բառիս բուն իմաստով, սև քարոզարշավ»:
Նա տեղեկացրեց, որ վերջերս որոշ անալիտիկ կենտրոններ քննարկում էին արել ԱՄՆ նախագահական ընտրությունների և Հայաստանի նախագահական ընտրությունների շուրջ զուգահեռների մասին, և հիշեցրեց, որ «Օբամայի դեմ առաջադրված ծերացած և ռադիկալ Մակքեյնը պարտվեց»:
«Ուզում եմ ասել, որ Երևանի քաղաքապետի ընտրությունները բոլորիս համար` անկախ հաղթանակից, իսկ ես` անձամբ, չեմ կասկածում հաղթանակի վրա, կարևոր են, որպեսզի հաղթահարվի մարտի 1-ի քաղաքական բարդույթը»,- ընդգծեց Ա. Աշոտյանը:
Ա. Աշոտյանն իր հայտարարությունում անդրադարձավ նաև, «այսպես կոչված, «պիառշիկների» ջանքրերին, ովքեր, հոլիվուդյան սցենարիստների օրինակով տոգորվելով, փորձում են Հայաստանի քաղաքական բեմահարթակ վերադարձնել որոշակի «Քինգ-քոնգների»` ասելով, որ դրանք դատապարտված են»:
«Հարգելի պիառշիկներ, ուզում եմ հիշեցնել, որ Քինգ-քոնգի մասին ֆիլմերը, որպես կանոն, ի տարբերություն այլ հոլիվուդյան ֆիլմերի, «հեփիենդով» չեն ավարտվում»,- հայտնեց Ա. Աշոտյանն ու հավելեց` ամփոփելով խոսքը. «Ես կարծում եմ, որ մեր կյանքն այնպիսին է, ինչպիսին այն դարձնում են մեր մտքերը: Եթե մենք ուզում ենք փոխել մեր կյանքը, փոխենք մեր մտածելակերպը, սկսենք մեզանից»:
17.03.2009, 19:17
No comments:
Post a Comment