Ալեքսանդր Թամանյանի թանգարան-ինստիտուտը կազմակերպում է «Ավանդույթներ և հետևորդներ» խորագրով լուսանկարչական բաց մրցույթ: Այս մասին Aysor.am-ին տեղեկացրեց թանգարան-ինստիտուտի գլխավոր ֆոնդապահ Անահիտ Պետրոսյանը:
Տեղեկացնենք, որ մրցույթը նվիրված է հայ 4 ճարտարապետներ` Զավեն Բախշինյանի, Աննա Տեր-Ավետիքյանի, Կորյուն Հակոբյանի և Ռաֆայել Իսրայելյանի 100-ամյա հոբելյաններին: Ցուցահանդեսը կոչված է լուսաբանել վերջիններիս ստեղծագործությունները, ճանաչելի դարձնել նրանց կառույցները, բևեռել հանրության ուշադրությունը դրանք պահպանելու անհրաժեշտության վրա:
Ցանկացողները կարող են մրցույթին մասնակցել` ներկայացնելով ցանկացած տիպի լուսանկարներ, որոնցում պետք է պատկերված լինեն վերոնշյալ ճարտարապետների հեղինակած կառույցները, դրանց ներսույթները, ճակատները, մանրամասերը, այդ շինություններն ընդգրկող բնապատկերներ, տեսարաններ, ինչպես նաև` հիշյալ կառույցներով ստեղծված միջավայրում տեղի ունեցած ուշագրավ դրվագների ու իրադարձությունների պատկերումներ:
Ա. Պետրոսյանը տեղեկացրեց, որ մրցանակները հանձնվելու են երեք անվանակարգերում` «Ճարտարապետական կառույց», «Մարդը ճարտարապետական միջավայրում» և «Կորուստներ»: Մրցույթի արդյունքները որոշելու է մրցութային հանձնաժողովը` ճարտարապետ, պատմական և մշակույթի հուշարձանների պահպանման գործակալության տնօրեն Արտյոմ Գրիգորյանի նախագահությամբ:
Հանձնաժողովի անդամներն են լուսանկարիչ, «Ֆոտոլուր» գործակալության տնօրեն Մելիք Բաղդասարյանը, ճարտարապետ, ճարտարապետության տեսաբան, պատմաբան Դավիթ Քերթմենջյանը և կինոռեժիսոր, սցենարիստ, հրապարակախոս Տիգրան Խզմալյանը:
Նշենք, որ հայտերի ընդունման վերջնաժամկետը ապրիլի 5-ն է:25.03.2009, 19:20
No comments:
Post a Comment