«Մենք ավելի քան վստահ ենք Հայաստանի ֆինանսական համակարգի կայունության, հաճախորդներին սպասարկելու հնարավորության վրա, այդ իսկ պատճառով այս պահին նման մարտավարությամբ փոխարժեքի թուլացումը հնարավոր եղավ իրականացնել»,- լրագրողների հետ հանդիպման ժամանակ հայտարարեց ՀՀ կենտրոնական բանկի (ԿԲ) փոխնախագահ Վաչե Գաբրիելյանը:
«Կենտրոնական բանկը երբևէ չի հայտարարել, որ անցնում է ամրագրված փոխարժեքի: Սակայն մենք հայտարարել ենք, որ կան խնդիրներ ֆինանսական կայունության հետ, որով էլ պայմանավորված` փոխարժեքը ժամանակավորապես կայունացվել է»,- հստակեցրեց Վ. Գաբրիելյանն ու բացատրեց, թե ինչո՞վ է պայմանավորված դրամի արժեքի կտրուկ անկումն ու ինչու՞ այն իրականացվեց այժմ:
Վ. Գաբրիելյանի բացատրությամբ` բոլոր այն երկրներում, որտեղ կիրառվում է փոխարժեքի աստիճանական թուլացման քաղաքականությունը, գնաճային և դրամի արժեզրկման սպասումները չեն վերանում` ի տարբերություն այն երկրների, որտեղ փոփոխությունները լինում են կտրուկ, որով էլ պայմանավորված է ՀՀ ԿԲ-ի իրականացրած քաղաքականությունը:
Ըստ ԿԲ փոխնախագահի, էական ճնշումներ փոխարժեքի վրա սկսվել են նկատվել աշնանից: Սակայն Վրաստանի պատերազմական դրության հետևանքով Հայաստան ներկրվող բեռները ժամանակին տեղ չհասնելու պայմաններում` փոխարժեքի կայունություն անհրաժեշտ է եղել:
«Հետո, եթե թողներինք փոխարժեքի տատանումներով անկումը, ապա դա կարող էր բերել էական խնդիրների ֆինանսական կայունության տեսանկյունից, ինչպես նաև` խնդիրներ կառաջանային, եթե մենք միանգամից թույլ տայինք ավելի մեծ տատանում»,- պարզաբանում է նա ու հավելում, որ այդ բոլոր ամիսներին ԿԲ-ի կողմից մոնիտորինգի է ենթարկվել բանկային համակարգը:
«Մոնիտորինգի ենթարկելով փետրվարյան զարգացումները և վստահանալով, որ ֆինանսական համակարգը կայուն է և արդեն եղած տատանումների հնարավոր ներուժը մեղմվել է` մենք փոխարժեքի թուլացումն իրականացրեցինք»,- ընդգծեց ԿԲ փոխնախագահը:
Վ. Գաբրիելյանը չբացառեց, որ փոխարժեքի փոփոխման պայմաններում կլինեն դրսից ներկրվող ապրանքների գների փոփոխություններ: Սակայն նա չկարողացավ կանխատեսել, թե ինչպիսին կլինի գնաճը` նշելով, որ «փոփոխության չափը կախված է մի շարք գործոններից` ինչպես համաշխարհային շուկայում տվյալ ապրանքների գների միտումից, այնպես էլ տեղում մրցակցության աստիճանից»:
ԿԲ փոխնախագահը հավաստիացրեց, որ «գնաճային ճնշումների դեմ պայքարելու են մեր դրամավարկային գործիքների պայմաններում» և պարզաբանեց.
«Գնաճային ճնշումները վերացնելը պահանջում է ժամանակ, իսկ մեր վարած քաղաքակնության արդյունավետությունը կախված կլինի թե´ միջազգային շուկայի զարգացումներից, թե´ ներքին շուկայի զարգացումներից»:
04.03.2009, 17:01
No comments:
Post a Comment